Auglýsingabrella

  Bestu auglýsingarnar eru þessar óbeinu;  að komast í fréttirnar.  Tróna á forsíðum dagblaða.  Verma toppsætið yfir mest lesnu fréttir í netmiðlum.  Vera fyrsta frétt í fréttatímum ljósvakamiðla.  Vera dag eftir dag umfjöllunarefni í dægurmálaþáttum ljósvakamiðla.  Vera í umræðunni á samfélagsmiðlum dögum saman.  Þetta vita markaðsmenn og kunna hjá Ikea.  Enda löng reynsla komin á þetta hjá þeim.  Erlendis og hérlendis.

  Hvenær hefst jólavertíðin?  Hún hefst þegar jólageitinni er stillt upp.  Þetta er ekki alvöru geit heldur geit úr afar eldfimu efni,  þurrheyi.  Utan um hana er reist girðing.  Lág og ræfilsleg.  Hún heldur hrossum og kindum frá því að éta heyið.  En mannfólk stikar yfir hana.  Til þess er leikurinn gerður.

  Þetta ögrar.  Þetta er ungum mönnum áskorun um að kveikja í kvikindinu.  Sem þeir gera.  Ár eftir ár.  Í fyrra varð óvænt bið á því.  Þá kveikti geitin í sér "sjálf".

  Ef að geitin væri eitthvað annað en auglýsingabrella þá væri hún byggð úr eldheldu efni.  Nóg er til af svoleiðis í Ikea.  Jafnframt væri girðingin utan um hana höfð mannheld.  Ikea býr að hópi fólk sem hannar eldhúsinnréttingar, baðherbergi, stóla og borð.  Meira að segja kjötbollur.  Þýðir að segja einhverjum trúgjörnum frá því að þetta fólk kunni ekki að hanna mannhelda girðingu?

      

Jólageitin brann í nótt

Athugasemdir

[Guðmundur Ásgeirsson, 14.11.2016 kl. 16:40]

Spurning hvort þessi geit myndi yfir höfuð standast úttekt slökkviliðs á brunavörnum?

Hversu mörg ár í röð þarf hún að brenna svo menn uppgötvi að þetta sé brunagildra?

[Sigurður I B Guðmundsson, 14.11.2016 kl. 17:51]

Þú segir fréttir!

[Helgi Armannsson (IP-tala skráð) 14.11.2016 kl. 21:31]

ég get ekki anað en verið 100% sammala þér Jens.en hvernig stendur a því að geit varð firrir valinu en ekki hreindýr,skildi það vera út af trúarbrögðum eigenda ikea

[Halldór Egill Guðnason, 15.11.2016 kl. 05:02]

Af hverju ekki okkar yndislega sauðkind, Helgi? Þetta geitarruslaralíkan IKEA þarna suður í Garðabæ, er avona álíka dapurlegt og auglýsing um megrunarkrem. Megi hún hverfa með öllu. Seríunum meðtöldum. Andskotann hefur meðaljóninn með það að gera að vera áreittur af jólarugli í Október?  Fólk þrælar út um víða veröld, til að gera þessari keðju kleift að undirbjóða aðra. Hefur einhver rannsakað hvað það er mikið kjöt í sænskum kjötbollum, sem IKEA selur á "kostakjörum". Hver á IKEA á Íslandi?

 Góðar stundir, með kveðju að sunnan.

[Jens Guð, 15.11.2016 kl. 17:50]

Guðmundur,  geitin er ekki brunavarin á neinn hátt.  Þvert á móti. Henni er ætlað að vera brunamatur.  

[Jens Guð, 15.11.2016 kl. 17:51]

Sigurður I B,  það er mitt hlutverk!

[Jens Guð, 15.11.2016 kl. 17:59]

Helgi,  geitin er rótgróið norrænt jólatákn, að því er ég best veit.  Líkast til hefur það ekki náð að ráði inn í íslenskt jólahald (fyrr en með auglýsingabrellu Ikea) vegna þess að Íslendingar halda ekki geitabú.   

[Jens Guð, 15.11.2016 kl. 18:05]

Halldór Egill, ég veit ekki hverjir eiga Ikea í dag.  Fyrir bankahrun var það Baugsveldið (Hagkaup+Bónus).  Hugsanlega eru lífeyrissjóðir komnir inn í dæmið,  rétt eins og þeir eru komnir á kaf í matsölustaði sem selja ruslfæði. Já, og ómerkilega tuskubúð í London sem skilaði l´ðifeyrissjóðnum hálfan milljarð í tap á örstuttum tíma.  Góðu fréttirnar eru að stjórnendur og stjórnarmenn lífeyrissjóðanna eru með hátt á aðra milljón króna í mánaðarlaun.  Líka þeir sem sitja aðeins klukkutíma fund á mánuði.