Vandræðaleg mistök

  Tilvera aldraðrar brasilískrar konu hefur alla tíð snúist að miklu leyti um bænahald.  Mörgum sinnum á dag leggst hún á bæn og brúkar talnaband.  Til að skerpa á mætti bænarinnar hefur hún notast við litla styttu af heilögum Anthony.  Hann er eitt af stærstu númerum kaþólskra dýrlinga og mjög kröftugur.  Að því er mér skilst.  

  Konunni áskotnaðist styttan fyrir nokkrum árum.  Eftir að styttan fékk lykilhlutverk í bænahaldinu þá var eins og ótal dyr opnuðust.  Konan varð bænheit.  Bænir hennar hrifu sem aldrei fyrr.  Hún fór reyndar aldrei fram á mikið.  Var hvorki hégómleg í ákallinu né ósanngjörn.

  Nýverið uppgötvaði ömmustelpa hennar að styttan væri ekki af heilögum Anthony heldur plastleikfang úr Hringadróttinssögu.  Hringadróttinssaga byggir á norrænu goðafræðinni.  Gandalf er Óðinn og fígúran sem gamla konan á kallast Elrond.   

  Þrátt fyrir þessa uppgötvun getur gamla konan ekki hugsað sér að biðja án þátttöku leikfangsins.  Reynslan af því er svo góð.  

Athugasemdir

[Ásthildur Cesil Þórðardóttir, 20.1.2017 kl. 15:39]

Frábær saga, takk fyrir að bjarga deginum mínum. 

[Ásthildur Cesil Þórðardóttir, 20.1.2017 kl. 15:40]

Frábær saga, takk fyrir að bjarga deginum mínum.  Reyndar ætti fyrirsögnin að vera trúin flytur fjöll.  

[Grrr (IP-tala skráð) 20.1.2017 kl. 15:45]

Vegir Elronds eru órannsakanlegir

[Sigurður I B Guðmundsson, 20.1.2017 kl. 16:46]

Mér sýnist styttan líkjast þér ef þú værir skegglaus!!

[Axel Jóhann Hallgrímsson, 20.1.2017 kl. 17:41]

Máttur bænarinnar ræðst aðallega af því hvernig fólki tekst að aðlaga væntingar sínar að bláköldum veruleikanum.

[Jens Guð, 21.1.2017 kl. 19:36]

Ásthildur Cesil,  takk fyrir það.

[Jens Guð, 21.1.2017 kl. 19:36]

Grrr, svo sannarlega.

[Jens Guð, 21.1.2017 kl. 19:37]

Sigurður I B,  svo sannarlega.  Ég nánast þekki mig í plastleikfanginu.  

[Jens Guð, 21.1.2017 kl. 19:39]

Axel Jóhann,  við skulum ekki vanmeta mátt bænarinnar - með eða án plastleikfangs.