Íslensk gælunöfn útlendra heimilisvina

 

  Íslendingar hafa löngum íslenskað nöfn útlendinga.  Ekki allra útlendinga.  Alls ekki.  Eiginlega bara þeirra útlendinga sem okkur líkar virkilega vel við.  Þeirra sem við lítum á sem einskonar heimilisvini.  Dæmi um það eru Prince Charles sem við köllum Kalla Bretaprins.  Annað dæmi er Juan Carlos sem var lengst af kallaður Jóhann Karl Spánarkonungur.  

  Bandaríski rokkarinn Bruce Springsteen er iðulega kallaður Brúsi frændi.  Í Bandaríkjunum er hann kallaður the Boss.  Kántrý-boltinn Johnny Cash er Jón Reiðufé.  Breska hljómsveitin the Beatles er Bítlarnir.  The Rolling Stones eru Rollingarnir.  John Lennon er Hinn eini sanni Jón.  Kántrý-söngonan Emmylou Harris er Emma frænka.

  Bandaríski kvikmyndleikarinn John Wayne var ýmist kallaður Jón Væni eða Jón Vein.  Leikkonan Catherine Zeta Jones er kölluð Kata Sæta-Jóns.  

  Nú höfum við eignast nýjan heimilisvin.  Hann er sá ljúfi og litríki forseti Bandaríkja Norður-Ameríku, Donald Trump.  Beinast liggur við að kalla gleðigjafann - á vinarlegum nótum - Dóna Trump.  Ekki Dóna Prump.              

  

            

Einangraður og finnst að sér þrengt

Athugasemdir

[Hrólfur Þ Hraundal, 6.2.2017 kl. 21:17]

Og ekki máttu gleyma henni Möggu Tótu frænku.  

[Sigurður I B Guðmundsson, 7.2.2017 kl. 10:21]

Svo voru líka búnar til vísur um suma kappa eins og t.d. þessi:

Water water everywher

platan fæst í Vesturver.

Hana syngur hann Tommi Stíl

sem keyrir kassabíl!!

[Stefán (IP-tala skráð) 7.2.2017 kl. 18:45]

 ,, Njáll Ungi " er nú nafn sem vert er að nefna í þessu samhengi og sá kann nú ekki að meta hinn appelsínugula Dóna Trump frekar en aðrir vitibornir menn.

[Jens Guð, 7.2.2017 kl. 19:55]

Hólfur, já, að ógleymdri Járnfrúnni (Iron Maiden).

[Jens Guð, 7.2.2017 kl. 19:56]

Sigurður I B,  skemmtileg vísa. Ég hef ekki heyrt hana áður.  

[Jens Guð, 7.2.2017 kl. 19:59]

Stefán,  "I was married Neil Young," (Ung var ég gefin Njáli) er haft eftir Bergþóru í Njálu.