Afi tískufrumkvöðull

1.8.2020 | 20:51

Undir lok sexunnar (sjöunda áratugarins) datt afa í hug gott sparnaðarráð. Í stað þess að fara til hárskera á Sauðárkróki - með tilheyrandi kostnaði - gæti ég klippt hann. Ég var um það bil 12 - 13 ára. Uppskriftin var sú að renna greiðu um hársvörð hans og klippa hárin sem stóðu upp úr greiðunni.

Til að gera þetta skemmtilegra þá brá ég á leik. Ég fylgdi uppskriftinni að undanskildu því að ég lét afa safna skotti neðst í hnakkanum. Afi vissi aldrei af þessu. Lyftigeta handa hans náði ekki til hnakkans.

Klippingin vakti undrun og kátínu hvert sem afi fór. Foreldrar mínir stóðu í þeirri trú að afa þætti þetta flott. Sennilega laug ég því í þau. Einhverra hluta vegna nefndi enginn þetta við afa. Mér er minnisstætt er mágkona pabba tók mömmu afsíðis og spurði hvaða uppátæki þetta væri hjá afa að vera með skott. Þær voru sammála um að þetta væri furðulegt uppátæki hjá tengdapabba þeirra en svo sem ekkert furðulegra en margt annað í hans fari.

Svo skemmtilega vildi til að um og uppúr 1980 komst svona skott í tísku. Bæði hérlendis og erlendis. Afi var fyrstur. Hann var frumkvöðullinn.

&nbsp;

Meginflokkur: Vinir og fjölskylda | Aukaflokkar: Lífstíll, Spaugilegt, Spil og leikir | Breytt 2.8.2020 kl. 12:10 | Facebook

Athugasemdir

Margt er Jens Guðs prakkara plott,
púkinn dregur dárið,
afar flott það skagfirska skott,
skondið afa hárið.

Þorsteinn Briem, 1.8.2020 kl. 23:53

Þetta gæti nú talist siðferðilega ámælisvert Jens. Að klippa afa þinn asnalega og láta fólk svo hía á hann í laumi hingað og þangað um Sauðárkrók. Ekki viss um að hann Gunnar Bragi væri hrifinn af þessu.

Þorsteinn Siglaugsson, 2.8.2020 kl. 00:22

Steini, bestu þakkir fuyrir stökuna.

Jens Guð, 2.8.2020 kl. 01:06

Þorsteinn, Skagfirðingar höfðu margt annað spaugilegt um afa að segja. Í einum situr að Gannar Bragi þótti spar á sinnepið í bensínsjoppunni Ábæ. Þórólfur er búinn að refsa honum rækilega fyrir það.

Jens Guð, 2.8.2020 kl. 01:10

Varst það ekki þú sem varst frumkvöðullinn???

Sigurður I B Guðmundsson, 2.8.2020 kl. 09:59

Það er líka útsmoginn hrekkur að klippa þingmann þannig að hann líti út eins og strákústur. mbl.is 21.01.19 ,, Týndi fötunum og man ekki neitt ,, Veit einhver hvort Gunnar Bragi fann fötin sem hann týndi á fylleríinu fræga og var hann þá á hlaupum á sprellanum, er slíkt ekki bannað með lögum ?

Stefán (IP-tala skráð) 2.8.2020 kl. 10:20

Sigurður, jú í raun var ég hönnuðurinn.

Jens Guð, 2.8.2020 kl. 11:22

Stefán, þetta er þörf vangavelta. Annars skilst mér að hann sé - eða allavega hafi verið - töluvert á hlaupum á sprellanum.

Jens Guð, 2.8.2020 kl. 11:24