Guddi í áflogum við mannýg naut

  Guddi hét maður.  Hann varð heimilisvinur foreldra minna á Hrafnhóli í Hjaltadal.  Kom og dvaldi þar dögum saman.  Ég var fluttur að heiman.  Hitti hann aðeins einu sinni er ég heimsótti foreldrana.

  Þegar ég hitti hann þá sagði hann mér margar grobbsögur af sér.  Þær líktust sögum Munchausens.  Ein var af því þegar nautahjörð réðist á hann.  Nautin komu hlaupandi í halarófu að honum með hausinn undir sig.  Hátt í tuttugu skepnur.  Hraðinn á þeim var svo mikill að Guddi sá að vonlaust væri að flýja.  Eina ráðið var að standa gleiður og takast á við nautin.  Hann greip um hornin á þeim og snéri svo hratt upp á þau að kvikindin urðu afvelta.  Hann snéri þeim til skiptis til vinstri og hægri.  Þegar atinu lauk var hjörðin í tveimur hrúgum.  Svo dösuð var hún að Guddi gat gengið í rólegheitum á braut.  En nokkuð móður.

  Hann sagðist hafa sagt fólki í - eða frá - Keflavík frá þessu.  Það hefði ekki trúað sér.  Ég svaraði því til að það væri afar dónalegt að rengja frásagnir fólks.  Guddi sagði:  "Þú ert góður maður.  Ég ætla að gefa þér skyrtuna mína."  Svo reif hann síg úr skyrtunni og rétti að mér.  Ég sagðist eiga alltof margar skyrtur og bað hann um að fara aftur í skyrtuna sína.  Enda dálítið kjánalegt að sjá hann sitja beran að ofan við eldhúsborðið.  

 

      

 

Athugasemdir

[Þorsteinn Briem, 8.8.2020 kl. 00:17]

Karlinn hefur verið nautsterkur.

Formaður Miðflokksins hefur líka lent í því að honum er ekki trúað og það víðar en í Keflavík.

[Þórhallur Pálsson, 8.8.2020 kl. 11:21]

Þekki sögu annars manns sem varð fyrir því að mannýgt naut réðist að honum.
En maðurinn var svo heppinn að vera með broddstaf meðferðis.  Komst hann aftur fyrir nautið, stakk stafnum upp í óæðri endann á því og stýrði því síðan inn í girðingarhólf.

[Sigurður I B Guðmundsson, 8.8.2020 kl. 11:45]

Átti frænda sem nú er látinn sem náði að "skrúfa" naut niður sem reðst á hann en nautið var með hring í nefinu sem hann notaði til fella nautið. En Guddi þinn var greinilega engum líkur!

[Stefán (IP-tala skráð) 8.8.2020 kl. 12:58]

Það virðist vera ríkt í Skagfirðingum að rífa af sér fötin af minnsta tilefni , samanber Gudda og Gunnar Braga. 

[Jens Guð, 8.8.2020 kl. 13:13]

Steini,  ég hef meira að segja heyrt að honum sé ekki trúað í útlöndum!

[Jens Guð, 8.8.2020 kl. 13:14]

Þórhallur,  takk fyrir frábæra sögu!

[Jens Guð, 8.8.2020 kl. 13:28]

Sigurður I B,  hlutverk hringsins er einmitt að hægt sé að stýra nautinu.  Hreyfing á hringnum veldur sársauka og nautið eltir hreyfingu hans.  Migf grunar að sumum nautum flott að vera með hring.  Ég ólst upp í útjaðri Hóla í Hjaltadal.  Á Hólum voru naut með hring í nefi.  Mér þótti sport að grípa í hringinn og láta nautið hrista hausinn. 

[Jens Guð, 8.8.2020 kl. 13:30]

Stefán,  þetta er skagfirskt blæti.

[Þorsteinn Briem, 8.8.2020 kl. 13:45]

Í minni sveit var þetta nú kallað miðsnesi en Jens er að sjálfsögðu með bein í nefinu og engan hring, eins og nú er í tísku.

"Miðsnesi (eða miðnesi) er brjóskveggurinn á milli nasaholanna í nefinu.

Talað er um miðsnesi bæði á mönnum og dýrum (til dæmis nautum sem oft eru með hring í miðsnesinu)."

[Jens Guð, 8.8.2020 kl. 14:24]

Steini (# 9),  takk fyrir ábendinguna.  Í Svarfaðardal eru menn nákvæmari í lýsingum en við hinumegin við fjallið.  

[sigurður bjarklind (IP-tala skráð) 9.8.2020 kl. 08:50]

Eins og rjúpnaskyttan með 99 rjúpur sagði: Maður gerir sig nú ekki að lygara fyrir eina rjúpu!

[Jens Guð, 9.8.2020 kl. 10:27]

Sigurður Bjarklind,  ég man eftir þeirri sögu :)