Plötuumsögn

Titill:  Seljan

Flytjandi:  Jóhanna Seljan

Einkunn: ****

  Reyðarfjörður hefur alið af sér fjölda tónlistarmanna - þó fram að álveri hafi þorpið verið fámennt.  Nefna má gítarleikarann Andra Frey (Bisund, Botnleðja, Fidel),  trommufeðgana snjöllu og söngvarann Birki Fjalar (Bisund, Stjörnukisi, I Adapt, Celestine, Hellvar) og Viðar Júlí Ingólfsson (Frostmark, Jarlar);  Einar Ágúst (Skítamórall) og fleiri.  Þar á meðal Jóhönnu Seljan Þóroddsdóttur.  Hún er dúndurgóð söngkona með sterka tilfinningu fyrir djassi og blús.  Sveiflast lipurlega á milli blíðra tóna og þaninna raddbanda.  

  Þessi fyrsta plata hennar geymir níu lög.  Sjö þeirra eftir hana sjálfa.  Hin tvö eru annarsvegar eftir Jón Hafliða Sigurjónsson og hinsvegar Bergstein Þórsson.  Allt saman flott lög. 

  Sjö textanna eru eftir Jóhönnu.  Hinir eru úr smiðju Helga Þórssonar og Halldórs Laxness.  Textarnir klæða lögin vel. Ég tel mig greina að lögin séu samin við textana.  Þeir eru ljóðrænir.  Fjalla um mannlegar tilfinningar:  Söknuð, vonir, þrár, einmanaleika, ástarsorg...  Þeir eru ýmist á íslensku eða ensku. 

  Jóhanna á ekki langt að sækja skáldagáfuna.  Afi hennar,  Helgi Seljan,  var landsfrægur hagyrðingur.  Hann skemmti áratugum saman með söng og frumsömdum gamanvísum. 

  Tónlistin á plötunni er blanda af blús og ljúfum djassi.  Góð blanda.  Hljóðfæraleikur er eðal.  Valinn maður í hverju rúmi:  Birgir Baldursson á trommur, Jón Hafliði Sigurjónsson á bassa,  Jón Hilmar Kárason á gítar og Kjartan Valdemarsson á hljómborð.  Þeir fá að njóta sín.  Þeir eru meira eins og hljómsveit heldur en "aðeins" undirleikarar.  Þegar gítarleikur er á hæsta flugi kemur Gary Moore upp í hugann.

  Platan er pínulítið seintekin.  Lögin eu ekki Ob-La-Di barnagælur.  Þau eru fullorðins og vinna bratt á við hverja spilun.  Ég elska að spila þessa plötu.  Vert er að geta að hljóðheimur hennar (sánd) er sérlega hreinn og tær.  Hlustandinn er nánast eins og staddur inni á stofugólfi hjá flytjendum.  Þetta er í alla staði afskaplega vel heppnuð, skemmtileg og notaleg plata.  Hún er fjölbreytt en jafnframt með sterkan heildarsvip.

    

Athugasemdir

[Þorsteinn Briem, 5.9.2020 kl. 14:02]

Seljan-ættin er glæsileg!

Og ég gæti best trúað að Miskunnsami Samherjinn hafi styrkt þessa plötuútgáfu.

[Jens Guð, 5.9.2020 kl. 14:31]

Steini,  vissulega er Seljan-ættin glæsileg.  Ég þekkti Helga heitinn Seljan vel.  Hann var mikill húmoristi og vildi öllum vel.  Hann tók óbeðinn að sér aldraðan heimagang minn,  Jón Þorleifsson (sem ég hef bloggað um).  Jón hafði ekki staðið skil á skattskýrslum til áratuga og allt var í rugli hjá honum.  Hann fékk ekki ellilífeyrisgreiðslur vegna þessa.  Helgi lagði mikla vinnu í að koma málum Jóns á þurrt land.  Seint og síðarmeira fékk Jón - á tíræðisaldri - inni á elliheimili og fékk ellilífeyri.  Þökk sé Helga.  Annað mál er að Jón lenti strax í útistöðum við aðra vistmenn og borgaði aldrei fyrir dvölina.  Haldnir voru margir fundar með honum sem áttu að vera sáttafundar.  En Jón gaf sig ekki.  Hann vísaði bara á að Gvendur Jaki,  óvinur sinn,  ætti að borga.

  Samherjinn styrkti ekki plötuútgáfu Jóhönnu,  að því er ég best veit.  Hún var fjármögnuð í gegnum Karolina.Found.   

[Sigurður I B Guðmundsson, 6.9.2020 kl. 20:42]

 Gaman hvað þú fylgist vel með íslenskri tónlist.

[Jens Guð, 6.9.2020 kl. 21:16]

Sigurður,  ég er áhugamaður um íslenska tónlist.  Og reyndar um tónlist yfir höfuð.  Á ensku kallast þessi ástríða "music lover".  Ég ver miklum tíma í að hlusta á músík og lesa um músík.  Til margra ára var ég áskrifandi að mörgum erlendum músíktímaritum.  Í dag ligg ég yfir músíksíðum á netinu.