Veitingaumsögn

 - Réttur:  Beikon ostborgari

 - Staður:  TGI Fridays í Smáralind

 - Verð:  2895 kr.

 - Einkunn:  ****

  TGI Fridays er fjölþjóðleg matsölukeðja með bar.  Fyrsti staðurinn var opnaður í New York á sjötta áratugnum.  Staðirnir eru mjög bandarískir,  hvort heldur sem eru innréttingar, veggskreytingar, matseðill eða matreiðsla.   

  Beikon ostborgarinn (World Famous Bacon Cheeseburger) er matmikill hlunkur.  Sjálfur borgarinn er 175 gr nautakjöt.  Ofan á hann er hlaðið stökku beikoni,  hálfbráðnum bragðgóðum bandarískum osti,  tómatsneiðum,  rauðlauk og  salatblaði.  Á kantinum eru franskar (úr alvöru kartöflum) og hunangs-sinnepssósa.  Sú er sælgæti.  

  Bæði borgarinn og frönskurnar eru frekar bragðmild.  Það var ekkert vandamál.  Á borðinu voru staukar með salti og pipar.  Ég bað um kartöflukrydd sem var auðsótt mál.

  Ég er ekki mikill hamborgarakall en get með ánægju mælt með þessum. 

Athugasemdir

[Þorsteinn Briem, 25.4.2022 kl. 09:31]

Ertu nú byrjaður að graðga í þig bandarískan ost í Kópavoginum, Jensinn minn?!

Ég á nú von á yfirlýsingu frá Bændasamtökum Mörlands og Umferðarmiðstöðinni út af þessu atriði.

[Jens Guð, 25.4.2022 kl. 10:24]

  Þorsteinn,  tengdafaðir minn var bandarískur.  Ég var í fæði hjá honum í Bandaríkjunum heilu mánuðina til margra ára.  Það mótaði matarsmekk minn að hluta. 

[Stefán (IP-tala skráð) 25.4.2022 kl. 11:35]

Þessi hamborgari lítur svakalega vel út á myndinni, en oftast er útlitið allt annað þegar matur á veitingahúsum er kominn á borðið. Minn uppáhalds hamborgara staður er Lebowsky Bar á Laugavegi 20. Gómsætur matur, góð þjónusta og alltaf góð og vel valin tónlist - líka fótbolti á skjám þegar eru beinar útsendingar. 

[Jens Guð, 25.4.2022 kl. 11:47]

Stefán,  hamborgarinn stendur næstum því undir myndinni.  Ég þarf að tékka á Lebowsky Bar.  Kvikmyndin er góð. 

[Bjarni4 (IP-tala skráð) 25.4.2022 kl. 14:38]

Þykktin á þessum borgara gefur til kynna að neytandinn þurfi að vera einstaklega kjaftstór.

[Jens Guð, 25.4.2022 kl. 14:44]

Bjarni4,  já og svangur.  Ég notaði hinsvegar hníf og gaffal og sneiddi borgarann niður eins og tertusneiðar. 

[Sigurður I B Guðmundsson, 26.4.2022 kl. 16:04]

Girnilegt, en gamli vill frekar kótilttur í raspi. 

[Jens Guð, 26.4.2022 kl. 17:21]

Sigurður I B,  ég tek undir það.  Kótelettur í raspi eru mitt uppáhalds kjötmeti.  Ég fæ mér þær stundum í Matstöðinni upp á Höfða á laugardögum.