Þetta vissir þú ekki um Paul McCartney

   Paul McCartney fagnaði áttræðisafmæli um helgina. Ýmissa hluta vegna vita fleiri flest um John Lennon. Færri vita flest um félaga hans, Paul McCartney. Ástæðan er margþætt. Til að mynda sú að Lennon var myrtur í blóma lífsins 1980. Eftir það hafa verið gefnar út margar ævisögur um hann. Einnig hafa verið gerðar um hann nokkrar kvikmyndir. Þar fyrir utan var John kjaftfor, yfirlýsingaglaður, afar orðheppinn, árásagjarn, opinskár og uppátækjasamur með afbrigðum. Hann var jafnframt stofnandi og forsprakki Bítlanna framan af.

  Paul McCartney hinsvegar er afskaplega diplómatískur, hógvær og kurteis. Prúður og ljúfur drengur. Hann varð í raun hljómsveitarstjóri Bítlanna síðustu árin - eftir að Lennon hvarf á vit gífurlegrar eiturlyfjaneyslu og varð að samlokunni John & Yoko.

  Paul var og er ofvirkur (og vinnualki). Margir hafa lýst því hvað Paul keðjureykti - og reykir áreiðanlega ennþá - sígarettur af miklum ákafa. Hann nánast borðar þær.

  Hér eru nokkrir punktar um Paul McCartney sem þú vissir ekki um (nema ákafur aðdáandi):

  - 1960 var Paul handtekinn í Hamborg í Þýskalandi fyrir íkveikju. Hann var settur í varðhald í marga klukkutíma og sparkað úr landi. Hann var reyndar á leið úr landi hvort sem var. Ástæða íkveikjunnar var að hann var einmitt að pakka niður í ljóslausu herbergi fyrir heimferð. Til að sjá í kringum sig kveikti hann af hvatvísi í smokkum og einhverju dóti. Það fór aðeins úr böndunum.

  - Féll á inntökuprófi í drengjakór. Já, þessi einn besti og frægasti söngvari tónlistarsögunnar féll tvívegis á inntökuprófi í drengjakór. Til gamans: Keith Richards var í drengjakór.

  - Klúðraði söng á fyrstu hljómleikum með hljómsveitinni The Quarrymen (sem síðar breyttist í Bítlana). 1957 kom Paul fyrst fram opinberlega með hljómsveitinni. Hann var svo svakalega taugatrekktur að í fyrsta laginu sem hann söng forsöng þá brast röddin. Ekki bætti úr skák að við það klúður fékk John hláturskast.

  - Paul var upphaflega trompetleikari. 14 ára byrjaði hann að spila á trompet. Fljótlega áttaði hann sig á því að ekki er hægt að syngja og spila á trompet samtímis. Hann skipti þess vegna yfir á gítar. Með The Quarrymen og á upphafsárum Bítlanna var Paul gítarleikari. Þegar bassaleikarinn Stu Sutcliffe hætti í hljómsveitinni vildi Paul að George Harrison tæki við bassanum. Hann varð að bíta í það súra epli - þegar á reyndi - að George var flinkari gítarleikari. Paul tók við bassagítarnum með ólund. Í uppreisn gegn því hlutverki tók Paul upp á því að spila söngrænan bassagang. Frekar en rígbinda sig við hefðbundinn bassagang leyfði Paul sér að spila bassalínur sem hann heyrði í hausnum á sér. Útkoman varð byltingarkenndur og frábær bassaleikur. Hann átti meira að segja til að syngja bassalínuna í stað þess að spila á bassagítar. Þannig er það í I Will. Enginn bassagítar. Paul syngur bassalínuna.

 

Athugasemdir

[Jósef Smári Ásmundsson (IP-tala skráð) 19.6.2022 kl. 09:45]

Paul McCartney átti tvífara. Sá var örvhentur. Og átti sextugsafmæli í gær. Hinn rétthenti Paul dó hinsvegar 1966 langt fyrir aldur fram. Þetta vissir þú ekki um Paul McCartey,

[Jens Guð, 19.6.2022 kl. 10:14]

Jósef Smári,  það var mikið fjallað um þetta 1966 og ennþá meira 1967.

[Sigurður I B Guðmundsson, 19.6.2022 kl. 11:20]

Áhugavert eins og þér einum er lagið. Var að hlusta á Jón Ólafsson áðan og las hann plötugagnrýni eftir þig í þjóðviljanum um fyrstu plötu Björgvins Gíslasonar. 

[Jens Guð, 19.6.2022 kl. 11:59]

Sigurður I B,  takk fyrir upplýsingarnrar.  Ég fletti í snatri upp á Jóni góða.  Vona að plöturýnin standist tímans tönn.

[Theódór Norðkvist, 19.6.2022 kl. 12:12]

Áhugaverðar lítt þekktar staðreyndir. Það er þakkarvert að við höfum fengið að njóta hæfileika þessa frábæra tónlistarmanns í 60 ár. Megi Paul verða 100 ára. Ótrúlegt að hann hafi enn heilsu og krafta til að koma fram, kominn á níræðisaldurinn.

Bassalínan í Rocky Raccoon er líka stórskemmtileg, mjög seiðandi. Hér er stórgóð kráka af því, aftur Reina del Cid og gengið sem spilar oft með henni, allt stórgóðir ungir tónlistarmenn.

Rocky Raccoon (feat. The Other Favorites)

Að öðru ótengdu, var að velta fyrir mér hvað gerðist með texta færslunnar þegar þú sendir inn bloggfærsluna. Hann er bara einn stór tengill og ef maður smellir, leiðir það til stjórnborðsins, sem krefst auðvitað innskráningar.

[Jens Guð, 19.6.2022 kl. 12:39]

Theódór,  takk fyrir þessa áhugaverðu Rocky Racoon kráku.  Ég bæti hér við lítt þekktu lagi með Paul.  Það gaf hann út undir dulnefninu Fireman (ásamt Youth úr Killing Joke.  Liðsmenn Killing Joke bjuggu á Íslandi snemma á níunda áratugnum).  Þarna sendir Paul sinni fyrrverandi konu,  Heather Mills,  tóninn). 

  Ég kann ekkert á tæknimál bloggsins.  Þetta gæti verið vegna þess að ég skrifaði bloggfærsluna í áföngum og geymdi hana þess á milli áður en ég loks póstaði henni.  Eitthvað svoleiðis.

[Jens Guð, 19.6.2022 kl. 12:40]

https://youtu.be/ZpOk0rIaJno

[Stefán (IP-tala skráð) 21.6.2022 kl. 19:04]

Hverju er hægt að bæta við þegar farsælasti og stærsti tónlistarmaður okkar tíma á stórafmæli og er til umfjöllunar hér eins og á netmiðlum um allan heim ?  T.d. því að nú eru menn farnir að kíttast um það í mesta bróðerni þó hver sé mesti Paul McCartney aðdáandi Íslands. ,, Ég er tíu sinnum meiri McCartneymaður en næstmesti McCartneymaður landsins ,, skrifar blaða og tónlistarmaðurinn Jakob Bjarnar Grétarsson. Í Fréttablaðinu í dag er Grímur Atlason með skemmtilega umfjöllun um McCartney og einlæga aðdáun sína á honum. Grímur gerir nánast tilkall til þess að standa jafnfætis Jakobi Bjarnari sem McCartneymaður númer 1 hér á landi. Grímur er m.a. bassaleikari í hljómsveit Dr. Gunna sem er mikill McCartneymaður og gaf sjálum sér hljómleika með meistararnum í 40 ára afmælisgjöf ef ég man rétt. Ragnheiður Eiríksdóttir ( Heiða í Unun ) er mikill McCartneyaðdáandi og Heiða var jú í Unun með Dr. Gunna. Salka Sól og Una Stefáns fóru ekki leynt með aðdáun sína á McCartney í útvarpsþáttum sínum á Rás 2 um síðust helgi. Gunnar Þórðarson hefur löngum nefnt McCartney sem sinn uppáhalds tónlistarmann ásamt Burth Bacharach og Brian Wilson. Mikill McCartneymaður Davíð Steingrímsson rak í nokkur ár Bítlabarinn Ob-La-Di Ob-La-Da og er eftirsjá af þeim ágæta skemmtistað. Sjálfur er ég mikill McCartneymaður en þó umfram allt mikill Bítlamaður.     

[Jens Guð, 21.6.2022 kl. 19:34]

Stefán,  ég tek undir hvert orð.  Sérstaklega:  "Sjálfur er ég mikill McCartneymaður en þó umfram allt mikill Bítlamaður."  Vinur minn,  Davíð Steingrímsson, rekur ennþá Bítlabarinn Ob-La-Di en núna á Spáni.