Áfall!

  Ég verð seint sakaður um að horfa of mikið og of lengi á sjónvarp.  Síst af öllu að horfa á línulaga dagskrá.  Þess í stað fletti ég upp á dagskrá Rúv á heimasíðu þess og hlera hvort þar hafi verið sýnt eitthvað áhugavert.  Ég er ekki með neina keypta áskrift.  

    Í gær fletti ég upp á endursýndri spurningakeppni framhaldsskólanna, Gettu betur.  Það er fróðlegt og skemmtilegt sjónvarp.  Í kjölfarið birtist óvænt Hemmi Gunn á skjánum.  Mér var illa brugðið.  Gleðipinninn féll frá fyrir 11 árum.  Þetta var áfall.  Mér skilst að Sjónvarpið hafi hvorki varað ættingja hans né vini við.  Þetta var svakalegt.

  Við nánari könnun kom í ljós að um var að ræða endursýningu á gömlum skemmtiþætti,  Á tali hjá Hemma Gunn. Sem betur fer var tali sjónvarpsstjörnunnar ekki breytt með gervigreind.  Það var lán í óláni.

  Ég vara viðkvæma við að "skrolla" lengra niður þessa bloggsíðu.  Fyrir neðan eru nefnilega myndir af Hemma.

Athugasemdir

[Sigurður I B Guðmundsson, 12.1.2024 kl. 11:44]

Ég kynntist Hemma og það fór vel á með okkur. 

[Jens Guð, 12.1.2024 kl. 13:24]

Sigurður I B,  hann var hvers manns hugljúfi og vinamargur. 

[Sigurður Kristján Hjaltested, 12.1.2024 kl. 18:08]

Perla af manni hann Hemmi.

[Jens Guð, 12.1.2024 kl. 18:30]

Sigurður Kristján,  hann var gleðigjafi hvar sem hann fór - að öllu jöfnu.  

[Stefán (IP-tala skráð) 13.1.2024 kl. 10:33]

Mér brá vissulega að sjá okkar ástkæra Hemma Gunn birtast svona ,, ljóslifandi ,, í frábæru Áramótaskaupi, en svo kom það fram að höfundar voru búnir að aðvara nánustu ættingja, enda fagmenn þar á ferð. Mér brá líka áðan þegar ég var að hlusta á fráttir á RÚV kl 10 þann 13 Jan. Þar kom fram frétt sem þú ættir að kafa ofan í Jens. Það að agaleysi nemenda í Færeyjum sé orðið það alvarlegt að þeir séu að beita kennara ofbeldi, ráðast á þá, sparki í þá og að kennarar séu hræddir við að hafa samband við foreldra viðkomandi. Þetta ástand mun hafa varað árum saman og fer versnandi. Öðruvísi mér áður brá.  

[Jens Guð, 13.1.2024 kl. 11:16]

Stefán,  þetta er víst þróunin í öðrum Norðurlöndum.  Þar meðtalið Íslandi.  Sem betur fer er ég hættur að kenna,  bæði á Íslandi og í Færeyjum! 

[Stefán (IP-tala skráð) 13.1.2024 kl. 12:37]

Nemendur eru að kasta ýmsu í kennara í Færeyjum. Mér dettur í hug aukinn handboltaáhugi þar, enda landsliðið að keppa á EM.

[Jens Guð, 13.1.2024 kl. 16:41]

Stefán (# 7),  frést hefur af barni í Færeyjum sem henti blýanti að kennara.   

[Stefán (IP-tala skráð) 13.1.2024 kl. 18:15]

Ég er auðvitað kominn langt út fyrir upphaflegt umræðuefni hér og þá ekki í fyrsta skipti, en datt þetta bara í hug af því að mér brá við þessar skelfilegu ofbeldisfréttir í færeyskum skólum, sem nú dynja hér yfir í íslenskum fjölmiðlum. Kannski er gert of mikið úr þessu ástandi hjá frændum vorum til að leiða athyglina frá ástamdinu í íslenskum skólum. 

[Jens Guð, 14.1.2024 kl. 11:47]

Stefán (# 9), ég verð ekki var við umræðu um þetta í færeyskum fjölmiðlum - ef frá er talið viðtal í Kringvarpinu við formann kennarasambandsins.  Reyndar kemst fátt annað að í færeyskum miðlum þessa dagana en handbolti.

[Stefán (IP-tala skráð) 17.1.2024 kl. 11:57]

Að sjálfsögðu stökkva Færeyingar nú til og hefja söfnun fyrir Grindvíkinga í gegn um Rauða Krossinn þar -  Bestu vinir okkar !

[Jens Guð, 17.1.2024 kl. 17:31]

Stefán (# 11),  verst að Íslendingar kunna ekki að meta ausnaskap Færeyinga í okkar garð.  Dæmi:  Í kjölfar snjóflóðsins á Flateyri safnaði færeyskur almenningur fyrir fullbúnum leikskóla sem þeir reistu á Flateyri.  Nokkrum misserum síðar sá ég að leikskólabyggingin var auglýst til sölu.  Ég klagaði í Færeyinga.  Þeir urðu miður sín og þótti sér misboðið.  Salan var dregin til baka.