Bráðsniðug uppfinning

  Einn kunningi minn er það sem kallast "þúsund þjala smiður".  Hann á létt með að gera við alla bilaða hluti;  hvort heldur sem er heimilistæki,  bíla eða hvað sem er.  Allt leikur í höndunum á honum.  Sjaldnast þarf hann annað en svissneska hnífinn sinn til að koma hlutunum í lag.  Hann grípur það sem hendi er næst og breytir því í varahlut.  Þetta getur verið tappi af kókflösku,  spýtubrot eða plastpoki.  

  Maðurinn er frjór í hugsun og stöðugt að finna upp nýja nytjahluti.  Eitt sinn hannaði hann dósapressu með teljara.  Mjög flott græja.  Er hann fór að kanna með að setja hana í fjöldaframleiðslu kom í ljós að samskonar tæki var til sölu í Húsasmiðjunni. 

  Þá snéri hann sér að því að hanna blaðsíðuteljara.  Dögum saman kannaði hann hina ýmsu möguleika.  Hann reiknaði og teiknaði.  Markmiðið var að tækið yrði ódýrt,  einfalt og þyrfti hvorki batterí,  rafmagn né aðra orkugjafa. 

  Eftir margra daga puð mætti uppfinningamaðurinn á bar í Ármúla,  Wall Street.  Hann sagði viðstöddum frá blaðsíðuteljaranum og vinnunni við að koma honum á koppinn.  Gleðitíðindin voru þau að hönnunin var komin á lokastig.  Þetta yrði jólagjöf næstu ára því margir fá bækur í jólagjöf.  Næsta skref yrði að koma tólinu á heimsmarkað.

  "Er ekki einfaldara að fletta upp á öftustu síðu til að sjá blaðsíðufjöldann?" spurði Siggi Lee Lewis.    

  Aldrei aftur var minnst á blaðsíðuteljarann.  

Athugasemdir

[Jóhann Elíasson, 22.5.2024 kl. 09:24]

Svona menn eru þjóðinni og öllum alveg nauðsynlegir en þeir fara stundum fram úr sér og öðrum.......

[Jens Guð, 22.5.2024 kl. 09:32]

Jóhann,  ég tek undir það!

[Stefán (IP-tala skráð) 22.5.2024 kl. 09:39]

Ég tel mig vita nákvæmlega hvaða forseta frambjóðanda þessi maður muni kjósa. Týpan sem hefur látið allskonar innihaldslausan loforðaflaum yfir sig ganga og er orðinn svo vanur því að ekkert gangi upp, bæði hjá sjálfum sér og síðustu ríkisstjórnum. 

[Jens Guð, 22.5.2024 kl. 10:17]

Stefán,  hann ætlar ekki að kjósa.  

[Sigurður I B Guðmundsson, 22.5.2024 kl. 11:05]

Er þetta óútkomin bók sem fjallar um mistök Katrínar í stjórnmálum og svikin loforð?

[Jens Guð, 22.5.2024 kl. 11:18]

Sigurður I B,  góður!

[Stefán (IP-tala skráð) 22.5.2024 kl. 12:52]

Sigurður I B, mistök Katrínar og svikin loforð kalla á þriggja binda ritsafn. Áðan var að ræða við fjóra eldri borgara og aðeins einn þeirra ætlar að kjósa Katrínu, af því að ,, hann er svo mikill sjálfstæðismaður ,, sögðu félagar hans og gerðu gys að honum . Um daginn spurði ég nokkra miðaldra sem voru að fara að kjósa utankjörstaða vegna utanlandsferðar: Hvað ætlið þið að kjósa ,, Einn svaraði ,, Við kjósum allavega ekki sama frambjóðanda og vinirnir Bubbi Morthens og Hannes Hólmsteinn hafa sameinast um ,,.