Anna á Hesteyri - undarlegt aksturslag

  Anna frænka á Hesteyri var um sextugt þegar einn frændi okkar gaf henni bíl og bílpróf.  Nýkomin með ökuréttindi brá hún sér upp á Hérað.  Vegurinn upp úr Mjóafirði var einbreiður og lélegur malarruðningur.  Kannski þess vegna vandi hún sig á að keyra aldrei hraðar en í öðrum gír.  

  Er Anna nálgaðist Egilsstaði var hún skyndilega komin á fínan tvíbreiðan malbikaðan veg.  Hún tók upp á því að keyra eftir honum miðjum.  Þetta olli öðrum bílstjórum vandræðum með að taka framúr eða mæta henni. 

  Einhver gerði lögreglunni viðvart.  Hún brunaði á móti Önnu;  stöðvaði hana með blikkandi ljósum og sírenu.  Önnu var illa brugðið.  Lögreglan bað hana að gera grein fyrir þessu undarlega aksturslagi.  Hún sagðist hafa orðið svo ánægð með breiða malbikaða veginn að henni datt í hug að leika sér;  leyfa öðrum ökumönnum að ráða hvoru megin þeir vildu mæta henni eða taka framúr. 

  Laganna vörður benti Önnu á að í gildi væru umferðarreglur sem öllum bæri að fylgja. 

  "Þarna er komin skýring á því hvers vegna allir flautuðu svona mikið á mig," hrökk upp úr Önnu. Síðar játaði hún að hafa skammast sín rosalega mikið.   

Athugasemdir

[Sigurður I B Guðmundsson, 12.8.2024 kl. 10:38]

Svo var það ökumaðurinn sem var að keyra í svarti þoku en sá þá afturljós á bifreið fyrir framan sig og ákvað að elta þau. Það gekk vel lengi vel en allt í einu stoppaði bílinn fyrir framan hann þá fór ökurmaðurinn út úr bílnum og spurði hinn ökumanninn afhverju hann væri stopp? Það er vegna þess svarði ökumaðurinn að ég er kominn heim til mín. 

[Jens Guð, 12.8.2024 kl. 11:23]

Sigurðu I B,  þessi er frábær!

[Jóhann Elíasson, 12.8.2024 kl. 18:13]

Hún Anna átti alltaf til svör sem gerðu það að verkum að gera spyrjandann "KJAFTSTOPP" án þess að reita hann til reiði.  Yndisleg persóna sem aldrei kemur til með að eiga sinn líkan....

[Jens Guð, 12.8.2024 kl. 18:31]

Jóhann,  svo sannarlega rétt!