Anna frænka á Hesteyri hringdi á lögguna

  Fyrir nokkrum árum hringdi Anna Marta á Hesteyri í eldri frænku okkar í Reykjavík.  Það var alvanalegt.  Konan var nýbúin að setja lit í hárið á sér   Hún beið eftir að hann verkaðist áður en hann yrði skolaður.  Hún upplýsti Önnu um stöðuna.  Bað hana um að hringja aftur eftir 10 mínútur.  

  Í þann mund er konan skolaði hárið mundi hún eftir því að kartöflur og mjólk vantaði.  Komið fast að kvöldverðartíma og eiginmaðurinn væntanlegur úr vinnu.  Hún skrapp í matvörubúðina skammt frá.  Aðeins ein stelpa var á afgreiðslukassanum.  Hún var nýbyrjuð og óörugg.  Gerði einhver mistök með tilheyrandi töfum.  Röðin við kassann lengdist.   

  Er konan hélt heim blöstu við blikkandi ljós á sjúkrabíl og lögreglubíl í innkeyrslu  hennar.  Lögreglumaður upplýsti að tilkynnt hafi verið að kona væri steinrotuð og slösuð á baðherberginu.

  Konan sýndi lögreglunni inn í baðherbergi og útskýrði að um misskilning væri að ræða.  Síðan hringdi hún í Önnu fjúkandi reið.  Anna sagðist hafa hringt í hana 10 mínútum eftir að konan bað hana um það.  Síminn hringdi út.  Aftur og aftur.  Hún hafi þá lagt saman 2 og 2 og fengið þá niðurstöðu að konan hefði runnið til við að skola hárið og skollið harkalega á gólfið.  

  Konan bannaði Önnu að senda aftur á sig sjúkrabíl og lögreglu.  Anna svaraði:  "Jú,  ef ég verð vör við að þú liggir slösuð þá hringi ég í neyðarlínuna!  Ef þú hefðir slasast núna þá værir þú að þakka mér en ekki skamma mig."

Athugasemdir

[Jóhann Elíasson, 12.11.2024 kl. 10:33]

Frænkan hefði nú kannski mátt lýta á þessi viðbrögð sem UMHYGGJUSEMI.......................

[Stefán (IP-tala skráð) 12.11.2024 kl. 10:38]

Fallega hugsað hjá Önnu Mörtu, en auðvitað alveg út úr kortinu að hringja í vælubíl. Það er enginn að hringja í vælubíl fyrir Jón Gunnarsson sem sér um það sjálfur, annað væri auðvitað út úr kortinu. Frændsemi og ættartengsl eru allavega og misjöfn. 

[Jens Guð, 12.11.2024 kl. 10:55]

Jóhann,  svo sannarlega!

[Jens Guð, 12.11.2024 kl. 10:56]

Stefán,  Anna Marta var mjög góð kona.  

[Ómar Geirsson, 12.11.2024 kl. 13:09]

Takk fyrir að deila þessari sögu af Önnu, einum merkasta nágranna okkar Norðfirðinga fyrr og síðar.

Svona minningar um fólk og tíma sem eru liðnir ylja hjartarætur.

Blessuð sé minning Önnu Mörtu.

Kveðja að austan.

[Jens Guð, 12.11.2024 kl. 13:43]

Ómar,  takk fyrir það.  Skemmtileg uppátæki Önnu mega ekki gleymast. 

[Sigurður I B Guðmundsson, 12.11.2024 kl. 17:09]

Þetta minnir mig á vin minn sem fór til Akureyrar um Verslunarmannahelgi til að "djamma". (Fyrir ca. 50árum). Hann var eitthvað búinn að sofa lítið og drekka mikið og ráfaði um og kom þar sem prestur var að predika undir berum himni og þá heyrði hann prestinn segja: Verði sól og það varð sól. Vinur hrópaði þá: Þá segi ég líka verði sól en hér er bara helvítis rigning. Hann var fljótt fjarlægður af staðnum að lögreglu!!

[Jens Guð, 12.11.2024 kl. 20:42]

Sigurður I B,  góður að vanda!

[Stefán (IP-tala skráð) 13.11.2024 kl. 18:55]

Var að norfa á skemmtilegt viðtal í fréttatíma Stöðvar 2 rétt í þessu. Það var eitthvað á þessa leið  ,, Pabbi minn ætlar að redda öllu fyrir aðal og pabbi minn er vinur aðal og líka aðal, aðal ,,. Verst er fyrir aðal og aðal, aðal að þetta viðtal kemur þeim ekki vel núna korteri fyrir kosningar.  Dregur illan dilk á eftir sér rétt eins og hvatvíst símtal Önnu Mörtu í vælubíla. 

[Jens Guð, 13.11.2024 kl. 21:22]

Stefán,  ég missti af þessu.  Takk fyrir ábendinguna.