Lífseig jólagjöf

24.12.2024 | 08:13

Algengt vandamál með jólagjafir er að þær hitta ekki alltaf í mark hjá viðtakendum. Öll þekkjum við börn sem andvarpa þegar kemur að mjúkum pökkunum. Krakkar vilja hörð leikföng. Mjúkum pökkum fylgir stundum annað vandamál: Út úr þeim kemur fatnaður sem passar ekki á börnin. Svo eru það gjafakortin. Þau eru keypt í litlum verslunum sem hafa ekki upp á neitt girnilegt að bjóða. Eða þá að upphæðin á kortinu passar ekki nákvæmlega við neitt í búðinni. Eftir stendur kannski 1000 kall eða 2000. Peningur sem dagar bara uppi.

Eitt sinn fékk frænka mín í jólagjöf fallegan og íburðarmikinn náttkjól í gjafaöskju. Hún átti meira en nóg af náttkjólum. Hún brá á það ráð að geyma kjólinn til næstu jóla. Þá gaf hún mágkonu sinni kjólinn í jólagjöf. Einhverra hluta vegna voru viðbrögð hennar þau sömu: Kjóllinn varð jólagjöf til systur hennar næstu jól. Alls varð hann sjö sinnum jólagjöf. Í síðasta skiptið endaði hann aftur hjá konunni sem upphaflega gaf hann. Sú var búin að fylgjast með ferðalagi kjólsins og vildi ekki að hann færi annan rúnt. Hún tók hann í gagnið. Þetta varð uppáhalds náttkjóllinn hennar. Enda valdi hún hann þarna í upphafi vegna hrifningar af honum.

&nbsp;

Meginflokkur: Spaugilegt | Aukaflokkar: Lífstíll, Spil og leikir, Vinir og fjölskylda | Breytt s.d. kl. 08:18 | Facebook

Athugasemdir

Frábær nýting á jólagjöf og gleðilega jól minn kæri.

Sigurður I B Guðmundsson, 24.12.2024 kl. 10:47

Sigurður I B, allra bestu jólakveðjur!

Jens Guð, 24.12.2024 kl. 10:50

Ég hef fengið jólagjöf sem ég sjálfur gaf jólin áður og var nokkuð ánægður með, enda vel valið, he, he.

Fyrir nokkru undir stjörnubjörtum himni birtust mér þrír vitringar og sjá þar reyndust vera þrjár gullfallegar valkyrjur. Mér hlýnaði um hjartarætur og fannst sem snöggvast að ég væri lítið barn í jötu. Ég hlustaði á fallegan loforðaflaum, ég trúði því sem vitringarnir höfðu fram að færa og sjá, öll náttúran öðlaðist nýtt líf og valkyrjur sungu inn Gleðileg Jól.

Stefán (IP-tala skráð) 24.12.2024 kl. 11:19

Þetta minnir mig á vinina tvo sem gáfu hvorum öðrum alltaf fimmþúsund á jólunum!!

Sigurður I B Guðmundsson, 24.12.2024 kl. 13:15