Týndi bílnum

  Anna Marta Guðmundsdóttir frænka mín á Hesteyri í Mjóafirði var komin yfir miðjan aldur er hún tók bílpróf.  Þökk sé Jóni Karlssyni frænda okkar.  Hann gaf henni bílpróf og bíl.  Fram að þeim tíma hafði hún haldið sig að mestu í Mjóafirði - ef frá er talið að einstaka sinnum fór hún með áætlunarbát til Neskaupsstaðar.  

  Komin á bíl brunaði Anna upp í Egilsstaði.  Þar blasti við reisulegur stórmarkaður.  Þangað hélt hún og gerði einhver spennandi innkaup.  Er hún kom aftur út á bílaplanið fann hún ekki bílinn sinn.  Enda margir bílar þarna hver öðrum líkari.  Eftir mikla leit og rölt gafst hún upp.  Hún fékk starfsmann búðarinnar til að hringja á lögguna.  Löggan kom og fann bílinn undir eins.  Hann var þarna á planinu og Anna áreiðanlega búin að ganga ítrekað framhjá honum.    

 

Athugasemdir

[Stefán (IP-tala skráð) 29.8.2025 kl. 11:32]

,, Lífið getur kennt manni ýmislegt sagði marfló upp úr þurru í fjöruborðinu ,,

Mér datt í hug þessi setning úr kvæði eftir Birgi Svan Símonarson þegar ég rifjaði upp í huganum saga sem ég heyrði um Önnu Mörtu. Hún hafði keyrt á traktor yfir mann í fjöruborðinu í Mjóafirði og svo bakkað yfir hann. Marfló þessi gæti hafa verið þar.

[Jens Guð, 29.8.2025 kl. 13:32]

Stefán,  ég man eftir þessu.  Maðurinn mölbrotnaði og var lengi rúmfastur á spítala.

[Stefán (IP-tala skráð) 29.8.2025 kl. 21:30]

Ég hlusta oft á þættina Hljóðrás ævi minnar á Rás 1 og hef oftast gaman af. Að undanförnu hefur Þorvaldur Þorvaldsson ráðið þar ríkjum með þannig tónlistarval að ég skil betur afhverju kommúnistar af gamla skólanum eru svona hrútleiðinlegir. 

[Bjarni (IP-tala skráð) 30.8.2025 kl. 00:54]

Er það liðin tíð að sveitavargurinn geti skottast á traktor, jafnvel með heyþyrluna hangandi aftaná, á næsta þéttbýlisstað og fyllt á búrið, próflaus með öllu?

[Guðmundur Ásgeirsson, 30.8.2025 kl. 01:31]

Einu sinni fór ég fótgangandi heim úr skólanum og skildi svo ekkert í því þegar ég kom heim að bíllinn var ekki í stæðinu við heimilið. Svo rifjaðist upp að ég hafði farið á bílnum í skólann um morguninn og óvart skilið hann eftir þar.

[Jens Guð, 30.8.2025 kl. 08:02]

Stefán (#3),  góður!

[Jens Guð, 30.8.2025 kl. 08:05]

Bjarni,  ég ólst upp við það frá 12 ára aldri að skottast um Hjaltadalinn á traktornum - og lenti eitt sinn í árekstri við sveitunga á öðrum traktor.

[Jens Guð, 30.8.2025 kl. 08:06]

Guðmundur,  takk fyrir skemmtilega sögu!

[Stefán (IP-tala skráð) 30.8.2025 kl. 11:40]

Munið þið eftir myndinni frægu af Finni Ingólfs og Ólafi Ólafs keyrandi sigri hrósandi eftir undirskriftir samkomulags um kaup S hópsins á hlut ríkisins í Búnaðarbanka Íslands ?  Myndin er nánast eins og sú af Hamraborgarræningjunum að keyra sigri hrósandi af vettvangi. Bílarnir eru meira að segja eins á litinn og ísmeygileg, spennuþrungin glottin á þeim öllum eru svipuð að sjá.

[Guðmundur Ásgeirsson, 30.8.2025 kl. 17:02]

Sami bíll og varð eftir í skólanum hvarf eitt sinn úr stæðinu við heimilið. Ég var grunlaus þar til nágranni knúði dyra og kvaðst hafa fundið bílinn, hálfan ofan í skurði á túni handan götunnar. Bíllinn hafði þá hrokkið úr gír og runnið niður dálítinn halla í landslaginu með þessum afleiðingum. Betur fór en á horfðist en hefði ekki verið fyrir skurðinn hefði mannlaus bílinn getað haldið ferð sinni áfram inn á og yfir næstu götu fyrir neðan með ófyrirséðum afleiðingum.

[Jens Guð, 30.8.2025 kl. 18:52]

Stefán (#9),  myndin er ógleymanleg!

[Jens Guð, 30.8.2025 kl. 18:54]

Guðmundur (#10),  takk fyrir aðra góða sögu.

[Sigurður I B Guðmundsson, 31.8.2025 kl. 10:11]

Hún týndi þó ekki sjálfri sér!!

[Jens Guð, 31.8.2025 kl. 10:51]

Sigurður I B,  guðunum sé lof fyrir það!

[Stefán (IP-tala skráð) 31.8.2025 kl. 19:32]

Þegar fyrrum duglaus og oft hálf rænulaus ráðherra Guðmundur Ingi gerir núna atlögu að frábærum, harðduglegum ráðherra Jóhanni Páli, þá dettur mér í hug ,, bylur hæst í tómri tunnu ,,. Það vill enginn sjá þig og þinn auma flokk uppi á dekki Guðmundur Ingi, megið þið hvíla grænir ( af öfund ) undir grænni torfu.