Ólíkindatólið

  Enski bítillinn John Lennon var margbrotin persóna.  Hann burðaðist með fjölda áfallastreituraskana.  Pabbi hans stakk af út í heim er John var 5 ára.  Skömmu síðar stakk mamma hans einnig af.  Systir hennar tók drenginn að sér ásamt eiginmanni sínum.  Sá var John mjög kær.  Hann féll óvænt frá er John komst á unglingsár.  Um svipað leyti kynntist hann mömmu sinni.  Nokkru síðar dó hún er fullur lögregluþjónn ók á hana. 

  John fór í myndlistaskóla og stofnaði hljómsveit sem síðar varð Bítlarnir (The Beatles).  Stu skólabróðir hans og besti vinur spilaði á bassagítar.  Þeir spiluðu m.a. í Þýskalandi.  Þar tók Stu saman við þýska stúlku og dó úr heilablóðfalli. 

  John var kjaftfor ruddi og slagsmálahundur.  Hann elskaði að stuða fólk með móðgunum.

  Í júlí 1974 kom John fram á útihljómleikum í Bandaríkjunum.  Hann kom auga á nokkra táninga,  á að giska 16 - 17 ára.  Þeir umkringdu 14 ára dreng.  Hann var með Downs heilkenni.  Systir hans hafði boðið honum á hljómleikana.  Hann var ákafur Lennon aðdáandi og kunni öll lög hans utanað.  Hann söng með í öllum lögum,  dansaði og skemmti sér innilega. 

  Táningarnir hæddust að dansi hans og söng.  Bentu skellihlæjandi á hann,  grettu sig og gerðu hróp að honum.  Vegna heilkennisins áttaði strákurinn sig ekki á stríðninni.  Hann hélt að þeir væru að skemmta sér með honum.  Systirin reyndi að koma honum frá hrekkjusvínunum.  Án árangurs. 

  John reiddist.  Hann stoppaði hljómleikana og benti á strákana;  óskaði eftir að ljósamaðurinn lýsti á hópinn.  Svo las hann þeim pistilinn og bað öryggisverði að fjarlægja þá af staðnum.  Hann bauð systkinunum að koma upp á svið og fylgjast með hljómleikunum þar.  Hann tileinkaði stráksa næstu lög. 

  Að loknum hljómleikum ræddi John við systkinin.  Eftir þetta hélt hann sambandi við piltinn fram á síðasta dag.  Skrifaði honum,  hringdi í hann og póstaði til hans árituðum eintökum af sólóplötum sínum.

Athugasemdir

[Stefán (IP-tala skráð) 26.9.2025 kl. 11:48]

John Lennon var svo óvinsæll í grunnskóla að kennarar hans skömmuðust sín fyrir hann og vildu ekki ræða hann við fréttafólk þegar John var orðinn frægur. Skólastjórnendur reyndu að fela öll ummerki um John í skólanum og fóru t.d. með skólaborð hans upp á hááloft, en þar fannst það síðar. John lagði bæði kennara og samnemendur í einelti og var slagsmálahundur hinn versti. Foreldrar báðu börn sín að halda sig fjarri þessum ofbeldisseggi og það gerði faðir Paul McCartney líka án árangurs. Stu Sutcliffe fékk alvarlegt höfuðhögg hjá strákum sem höfðu verið að slást við John sem náði að stinga af, en Stu varð eftir og tók höggin. Hann dó úr heilablæðingu 21 árs og líklega var það þó ótengt þessu höfuðhöggi. Þrátt fyrir þetta var John í raun mikill vinur Stu, svo mikill að Paul var afbrýðisamur út í náið samband þeirra fyrst eftir að hann fór að umgangast John. Þessi saga af John og stráknum með Downs heilkennin sýnir mjúkar hliðar á honum, en líka að John kom betur fram við þennan dreng en Julian son sinn. Yoko Ono samdi mest af textanum Imagine og er nú skráð sem meðhöfundur. Yoko tókst með lagni að búa til ,, mikinn friðarsinna ,, úr John Lennon og er það klárlega hennar mesta afrek og besta listaverk. 

[Jens Guð, 26.9.2025 kl. 12:21]

Stefán,  takk fyrir fróðleikinn.