Specials

 

 Eitt af stærstu nöfnum bresku nýbylgjunnar um og upp úr 1980 var ska-hljómsveitin Specials.  Risarnir í nýrokkinu toguðust á um að fá Specials í hljómleikaferðir með sér.  Þeirra á meðal voru The Clash og Police.  Mick Jagger var einnig forfallinn aðdáandi og reyndi að fá hljómsveitina á merki plötuútgáfu Rolling Stones.

  Með Elvis Costello sem upptökustjóra raðaði Specials lögum í efstu sæti breska vinsældalistans og náði sömuleiðis inn á þann bandaríska.  Frægasta lagið er sennilega "Ghost Town".

  Eftir nokkrar mannabreytingar var AKA bætt aftan við nafn Special.  Lag Special AKA "Nelson Mandela"fór eins og stormsveypur um heimsbyggðina og varð "klassík".  Almenningur á Vesturlöndum þekkti ekki nafn Nelsons Mandela fyrir þann tíma.  Í kjölfar vinsælda lagsins var nafn Nelsons Mandela á allra vörum.  

  Nokkuð víst er að þetta lag átti stóran þátt í að beina athygli að og gagnrýni á aðskilnaðarstefnuna í S-Afríku sem leiddi til þess að Nelson Mandela var leystur þar úr haldi,  aðskilnaðarstefnan afnumin og Nelson Mandela kosinn forseti landsins.  

  Einhversstaðar á ferli Specials hvarf AKA aftan af nafninu. Margir af upphaflegu aðalmönnunum í hljómsveitinni hafa helst úr lestinni og stofnað aðrar hljómsveitir.  Meðal þeirra má nefna Fun Boy Three,  Beat,  General Public, JBs Allstars,  The Colourfield,  Special Beat,  Sunday Best,  Vegas og Terry,  Blair & Anouchka,  The Tearjerkers,  The Bonediggers og The Raiders,.

 

  Nú hafa einhverjir af upphafsmönnum Specials snúið aftur og von er á nýrri plötu frá Specials með þeim innanborðs. Þetta rifjaðist upp þegar ég heyrði að Kringlukráin er að auglýsa dansleiki með Specials.

Athugasemdir

[helgi (IP-tala skráð) 10.4.2008 kl. 07:38]

Datt einmitt það sama í hug þegar ég heyrði auglýsingu Kringlukráarinnar. Aldrei of mikið af ska og reggí.

Ég var mikið í London áður en lagið um Mandela kom út. Þá voru um undirskrifta safnarar á hverju horni. Gegn Járnfrúnni og verslun við S-Afríku og með frelsun Mandela.

Þannig það er ekki rétt að enginn hafi vitað hver maðurinn var. Nema þá kanski hér á Íslandi.

[helgi (IP-tala skráð) 10.4.2008 kl. 07:47]

Ég ritaði einmitt nafn mitt á slíkann lista á Trafalgar Torgi. Gaf 2 pund í baráttuna og fékk í staðinn barm merki með mynd af Mandela. Svolítið Pönk . Wham og Duran voru jú heitustu böndin á þessum tíma.

[Þórður Helgi Þórðarson, 10.4.2008 kl. 09:03]

Hætti sveitin ekki og kom aftur saman undir nafninu Special Aka.

Þessi sveit átti mörg frábær lög ekki bara Ghost Town.

Verður gaman að fá Terry Hall aftur í stuðið, hressasti sviðs maður sem ég hef séðþþþþ

[magpie (IP-tala skráð) 10.4.2008 kl. 12:49]

Það er stórviðburður að þetta merka band sé að koma saman á ný. Ég heyrði fyrst að þetta væru allir nema meistari Jerry Dammers en svo las ég annars staðar að þetta væri allt upprunalega gengið. Eftir æfingu sagði bassaleikarinn Horace meðal annars: "The music, albeit a little ropey in places, had touches of brilliance that I vaguely remember from nearly thirty years ago. We all seem to be friends again. I am speechless. Rod & I travelled for nine and a half hours to play just over one hour of music, but it was pretty incredible music. I am still speechless".

 

Specials var meistarastykki og tónlistin þeirra stenst fullkomlega tímans tönn. Tónleikar þóttu líka frábærir. Ég sá ekki Specials en hef séð Neville Staple með sitt Specials band og það var flott. Ég hef líka séð gítarleikarann Roddy með Skabilly Rebels en þótti það reyndar frekar leiðinlegt rokkabillísull. Svo sá ég Lynval Golding með bandinu sínu Pama International nú í haust og þar var ágætt band á ferð en spilaði fyrir frekar erfiðan sal. Terry Hall hefur verið að gera stórskemmtilega hluti af og til og nægir að nefna diskinn sem hann gerði með Mushtaq úr Fundamental genginu. Frábært stöff!

 

Fyrsta plata Specials var þeirra langbesta plata en önnur platan var vel þokkaleg. Eftir að þetta varð Special AKA missti það flugið að mínu viti þó vissulega sé Mandela lagið merkilegt. Það var í raun ævintýralegt að þessi enska ska-bylgja skyldi ná svona miklum vinsældum en þegar allt kemur til alls á bandið mörg frábær lög og því er þetta kannski ekki svo skrýtið. Þetta band á pottþétt heima á topp tíu listanum mínum yfir flottustu bönd sögunnar! Vonandi eiga þeir eftir að taka a.m.k. einn góðan túr.

 

Ég myndi hins vegar aldrei láta draga mig á þennan kringlukráaróskunda enda hef ég gníst tönnum þegar ég hef séð auglýsingarnar og hugsað: Hvernig leyfa mannkertin sér að óhreinka minningu þessa yndislega bands með þessum ósmekklegheitum?

[Lovísa , 11.4.2008 kl. 10:15]

Innlitskvitt, góða helgi

Kveðja, Lovísa. 

[Jens Guð, 16.4.2008 kl. 01:43]

  Helgi,  kannski er það rétt að einhverjir könnuðust við nafn Nelsons Mandela áður en Special AKA sungu um kauða.  Ég hafði samt ekki heyrt áður um hann getið.  En hugsanlega voru Bretar meðvitaðri um ástandið í S-Afríku en við hér á Íslandi.

  Wham! og Duran voru og eru viðbjóður.  Bæði þá og síðar.

  Þórður,  Specials áttu mörg fleiri flott lög en "Ghost Town".  Til að mynda "Gangsters" og "A Massage to you Rudy".  Það fer eftir því hvernig á málið er litið en einn flöturinn er sá að hljómsveitin hafi aldrei hætt. 

  Magpie,  ég tek undir hvert orð.

  Lovisa,  takk fyrir innlitið.