Minnisstætt viðtal sem leiddi til skjótrar afsagnar

  Í dagblaðinu Tvídægri (24 stundum)  í dag er rifjað upp þegar reyðfirski snillingurinn Helgi Seljan var ungur og efnilegur blaðamaður á DV.  Helgi er reyndar ennþá ungur og efnilegur en hann fékk það verkefni að fiska fréttir af þá nýráðnum fréttastjóra RÚV,  Auðuni Georgi Ólafssyni.  Einhver kurr var meðal fréttamanna RÚV sem töldu ráðninguna vera pólitíska (ég man ekki hvort það var á forsendum Sjálfstæðisflokks eða Framsóknar.  Enda er það aukaatriði) og Auðun Georg ekki þann reynslubolta sem fullyrt var.  Á fyrsta degi lenti Auðun Georg í viðtali sem leiddi til þess að hann sagði af sér.  Viðtalið var og er kennslubókardæmi um það hvernig nýráðinn óhæfur fréttastjóri fremur "hara kiri" eða á íslensku:  Skaut sig í fótinn.

Fréttamaður: Hefur þú átt fundi með formanni útvarpsráðs nýlega?

Auðun: Eeeeeeee...Ekki nýlega, nei.

Fréttamaður: Ég hef öruggar heimildir fyrir því að þú hafir hitt hann að máli eftir hádegi í gær.

Auðun: Iiiiiiii...Ég man nú ekki til þess. Man ekki nákvæmlega hvenær það var.

Fréttamaður: Hvað hefði verið rætt á slíkum fundi.

Auðun: Það er bara trúnaðarmál.

Fréttamaður: Þannig að þú viðurkennir að slíkur fundur hafi verið haldinn, þrátt fyrir að þú neitir því.

Auðun: Ja...ég neitaði því ekkert að hann hafi farið fram en, hérna, gef ekkert upp annað um það.

Fréttamaður: Varstu ekki að neita því að fundurinn hafi verið haldinn?

Auðun: Fundurinn hefur verið haldinn en, hérna, hann var bara trúnaðarmál.

Fréttamaður: Hver boðaði fundinn? 

Auðun: Það var bara trúnaðarmál.

Fréttamaður: Baðst þú um fund eða formaður útvarpsráðs?

Auðun: Ummmmm..., ammmm..., nú man ég það ekki. Ég held að ég hafi óskað eftir þeim fundi bara til að meta aðstæður og fara yfir hver staðan væri hér innanhúss.

Fréttamaður: Hver var niðurstaðan á fundinum?

Auðun: Niðurstaðan á fundinum var bara að halda sínu striki og, hérna, ég veit ekki til að ég gert neitt rangt og bara mæti hér til starfa og haldi mínu striki.

Fréttamaður: Af hverju neitaðirðu því í upphafi að fundur hefði verið haldinn?

Auðun: Iiiiii...Bíddu, hvað áttu við?

Fréttamaður: Ég spurði hvort þið hafið átt fund í gær og þú sagðir nei.

Auðun: Ja, mmmmmm..., aaaaaaa...mig minnti ekki hvenær fundurinn fór nákvæmlega fram.

Fréttamaður: Hann var haldinn í gær.

Auðun: Jaaaaá... Þá var hann haldinn í gær.  

Athugasemdir

[Magnús Geir Guðmundsson, 17.9.2008 kl. 01:09]

Það voru Frammararnir sem vildu hann inn. Fréttamaðurinn sem ´tók viðtalið hét og heitir enn Ingimar Karl Helgason og er nú held ég hjá 365 í "Markaðnum" með Sindra S.

Upptöku af þessu fræga viðtali á ég svo einvhers staðar í fórum mínum.

[Jóhannes (IP-tala skráð) 17.9.2008 kl. 01:15]

  Þetta viðtal er gargandi snilld!

[Benedikt Halldórsson, 17.9.2008 kl. 01:48]

Hér er viðtalið sem Helgi Seljan tók ekki en hann hefur ábyggilega lært helling á því.

[S. Lúther Gestsson, 17.9.2008 kl. 02:12]

Hvaða ástæðu sér Jens Guð til að reyna að skjóta Helga Seljan upp á stjörnuhiminninn á röngum forsendum. Ég held að þeir séu eitthvað að makka saman og Jens Guð hafi fengið full Money fyrir að nota þessa vinsælu bloggsíðu til þess. Jáhá hér er eitt spillingarmálið.

Vissi Jens að Helgi hefði aldrei átt þetta viðtal við fyrrum útvarpsstjóra?

[Jens Guð, 17.9.2008 kl. 03:01]

  Maggi,  takk fyrir þessar upplýsingar.

  Jóhannes,  ég tek undir það.

  Benedikt,  bestu þakkir fyrir hlekkinn.

  Sigurðir Lúther,  ég er ekki að skjóta Helga Seljan upp á stjörnuhiminn á fölskum forsendum.  Ef þessi bloggfærsla hljómar þannig þá biðst ég velvirðingar fyrir óskýra framsetningu.  Þegar ég braust í gegnum fellibil á leið frá Keflavík áðan og lagði í hlað var mér rétt eintak af Tvídægri (24 stundum).  Þar fann ég viðtal við Helga Seljan um umræddan atburð.  Þá mundi ég eftir að mér hafði verið send útskrift af viðtalinu við Auðun.  Ég man ekki hvers vegna.  Þetta var áður en ég byrjaði að blogga.  Mér dettur helst í hug að ég hafi átt í einhverjum deilum á málefni.com á þeim tíma.  Man þó ekki eftir því. 

  Þegar ég las í Tvídægri viðtalið við Helga Seljan rifjaðist upp fyrir mér áðurgreint viðtal sem ég á í tölvupósti.  Póstinn fékk ég frá frænku minni sem var á þeim tíma að læra fjölmiðlafræði og krufði viðtalið til mergjar út frá fræðunum:  Hvernig á að spyrja ágengra spurninga og hvernig á EKKI að svara þeim.

  Það var ekki ætlun að heimfæra viðtalið upp á Helga Seljan.  Nafn hans varð aðeins kveikja að því að rifja viðtalið upp.  Það skal því árétta og undirstrikað að Ingimar Karl Helgason tók viðtalið.  Sem ég reyndar vissi ekki eða mundi ekki eftir fyrr en Maggi rifjaði það upp.

  Hér er ekkert plott í gangi.  Þetta er allt sárasaklaust.  Ég er ekki í kunnigsskap eða samskiptum við Helga Seljan.  Að vísu eigum við marga sameiginlega vini. Ég þekki afa hans og ömmu og fleiri ættingja.  En því fer víðsfjarri að ætlun hafi verið að heimfæra viðtalið upp á Helga Seljan. 

[Rúna Guðfinnsdóttir, 17.9.2008 kl. 09:21]

Þetta var hreint kostulegt, man vel eftir þessu og man hversu ósköp og skelfing ég vorkenndi Auðunni  Var þetta blaðaviðtal? Ekki í sjónvarpi?

Kveðjur af suðurströndinni

[Magnús Paul Korntop, 17.9.2008 kl. 14:04]

Þetta viðtal er hreint mergjað.

[365, 17.9.2008 kl. 14:57]

Þegar maður sá þetta viðtal í sjónvarpinu á sínum tíma, þá hafði maður alltaf á tilfinningunni að maðurinn væri að ljúga allan tíman.  Gott nafn, Tvídægra.

[Kristín Björg Þorsteinsdóttir, 17.9.2008 kl. 16:41]

Herre Gud! ég man eftir þessu - þetta var skelfing vandræðalegt allt saman. Hvar er AGÓ núna?

[Jón Guðjónsson (IP-tala skráð) 17.9.2008 kl. 17:06]

  Já hvað varð um manninn?  Fór hann ekki í felur í útlöndum?

[Ómar Ingi, 17.9.2008 kl. 18:28]

Já Auðunn er mikil FRAM ari eins og allir góðir menn sem vita hvað stórveldi er í Íslenskri Knattspyrnu .

AGU fór til Japans en ég tel sé komin heim aftur , hann faldi sig lítið enda í vinnu fyrir MAREL þar fyrir austan

[Magnús Geir Guðmundsson, 17.9.2008 kl. 20:55]

Auðun Georg hafði já verið í vinnu í austurlöndum og þá já fyrir Marel. Ég sagði hérna í fyrstu athugasendinni að ég ætti upptöku af viðtalinu einhvers staðar, það er þvíljóst Rúna að þetta var ekki blaðaviðtal.

Og 365 skjátlast, þetta var viðtal á Rás tvö, ekki í sjónvarpi.

[Haraldur Bjarnason, 17.9.2008 kl. 21:51]

Ingimar Karl Helgason var fréttamaður á fréttastofu útvarps þegar hann tók þetta viðtal. Auðunn Georg kvartaði á eftir og sagði fréttamannin hafa verið með lævísar spurningar. Ég notaði það lengi á Ingimar Karl þegar ég þurfti að tala við hann og kallaði hann jafnan "fréttamanninn lævísa", en hann er góður drengur og vinnur sín verk af samviskusemi. Það varð hins vegar þessum nýráðna "fréttastjóra" að falli að byrja á því að ljúga. Það kann ekki góðri lukku að stýra.

[Rúna Guðfinnsdóttir, 17.9.2008 kl. 22:45]

Sorry Magnús...ég tók ekki eftir því....

[gatnuverid (IP-tala skráð) 18.9.2008 kl. 08:18]

Sérkennilegur misskilningur þetta hjá Jens. 

Í viðtalinu við Helga Seljan í "Sólarhringnum" (24 stundum) kemur hvergi fram að hann hafi tekið þetta fræga viðtal við Auðunn Georg - bara að hann var undir borði. 

Það var Ingimar Karl sem tók viðtalið. Jens ruglar hér saman tveimur sögum:  Annarri af veru Helga Seljan undir borðinu og hinni af því þegar Auðunn rataði í ógöngur í viðtalinu Ingimar Karl.

[Helga Guðrún Eiríksdóttir, 18.9.2008 kl. 15:46]

Rétt hjá g og Haraldi, þetta var Ingimar. En alger snilld engu að síður!