Æsispennandi prjónabók

  Aldeilis flestum að óvörum nema höfundunum sjálfum var að koma út splunkuný íslensk prjónabók,  Prjóniprjón.  Þetta er hörkuspennandi bók sem inniheldur 35 óvæntar,  litríkar,  snjallar og skemmtilegar uppskriftir sem henta byrjendum jafnt sem lengra komnum.  Hér er komin jólagjöf handa strákum og körlum á öllum aldri.  Áreiðanlega munu konur á ýmsum aldrei taka bókinni fagnandi líka.

  Prjóniprjón er eftir Halldóru Skarphéðinsdóttur og Ragnheiði Eiríksdóttur (ekki þá sem kennd er við hljómsveitina Unun).  Prjón/n er í hvers manns kjöltu þessa dagana.  Enda fátt meira róandi en handleika prjóna.  Sömuleiðis eiga margir notalega samveru yfir prjóni.  Þar fyrir utan er bráðhollt og örvandi fyrir hugsun og sköpunargleði að finna nýjar leiðir og lausnir í prjónaskap..

Útgáfugleði Prjóniprjóns verður í Nálinni, Laugavegi 8, föstudaginn 5. desember kl. 17.30-19. Allir eru velkomnir.  Partýið heldur síðan áfram á Café NoCo, Odengatan 47 í Stokkhólmi, daginn eftir,  laugardaginn 6.  desember kl. 10-13.

Um höfundana:

.
Halldóra býr ásamt fjölskyldu sinni í Sveppaskógi norður af Stokkhólmi í húsi fullu af garni og prjónar af lífi og sál á milli þess sem hún sinnir vísindastörfum við háskólann í Stokkhólmi. Kjörorð: "Meira prjón - meiri gleði".

.

Ragnheiður er hjúkrunarfræðingur og starfar sem nýsköpunar- og þróunarstjóri hjá BHM. Hún hefur ýmislegt fleira í pokahorninu og vill beita svipaðri hugmyndafræði á áhugamálin sín þrjú; prjón, kynlíf og eldamennsku.  
Kjörorð: "Prjón, frelsi og hamingja".  

.

Bókin er gefin út af höfundunum sjálfum og fæst í hannyrðaversluninni Nálinni, Laugavegi 8.  Einnig er hægt að panta bókina í póstkröfu á [e-mail].  

Athugasemdir

[Guðríður Hrefna Haraldsdóttir, 4.12.2008 kl. 23:18]

Snilld, líst vel á þessa bók ... þótt ég kunni bara að hekla. Gæti lært að prjóna af þessari.

[Þorsteinn Briem, 4.12.2008 kl. 23:55]

Stelpurnar í MA voru síprjónandi, þannig að ég ákvað að læra að prjóna og prjónaði þeim til samlætis.

En það var líka gott að sofa hjá þeim.

Samt illa séð í íslenskutímunum. Prjón þó leyft.

[Tobbi (IP-tala skráð) 5.12.2008 kl. 08:38]

Hvað kostar auglýsingin hjá þér, Jens?

[Heidi Strand, 5.12.2008 kl. 18:40]

Jens, manstu eftir Pr.jón?

[Jens Guð, 6.12.2008 kl. 17:17]

  Gurrí,  áttu við að prjón og hekl séu ekki það sama?

  Steini,  góður!

  Tobbi,  ég er ekkert í auglýsingunum.  Stundum kem ég aftur á móti áríðandi tilkynningum á framfæri.  Í þessu tilfelli fékk ég senda í fjölpósti fréttatilkynningu.  Ég sá í hendi mér (= lófalestur) að þetta yrði eina tækifæri mitt á ævinni til að vekja athygli á prjónabók.  Það var ekki hægt að láta það tækifæri sér úr greipum ganga.

  Dúa,  heppnin leikur við þig þessa dagana.

  Heidi,  ég man ekki eftir Pr. Jóni.  Samt hljómar þetta fyndið.

[Halldóra (IP-tala skráð) 9.12.2008 kl. 21:20]

Æj takk elsku dúllan fyrir að koma masterpísinu okkar á framfæri!!! Það er að segja Prjóniprjón bókinni. Við viljum endilega breiða fagnaðarerindið út til sem flestra, og vonum að fleiri uppgötvi hamingjuna sem felst í lykkjum...

Takk líka fyrir skemmtilega bloggsíðu - ég hef oft kíkt hér við á (oft á tíðum stefnulausu) ráfi mínu um veraldarvefinn,

Bästa hälsningar!

Halldóra  í Sverige.

[Jens Guð, 10.12.2008 kl. 00:29]

  Halldóra,  takk fyrir góð orð.  Hjördís vinkona þín sendi mér upplýsingar um þessa bók.  Þó ég viti ekkert hvað prjón er (ég hélt að það væri bara eitthvað sem fólk kaupir úti í búð) þá sá ég í hendi mér að þarna var um spennandi fyrirbæri að ræða.