Skemmtileg eldamennska fyrir stórfjölskylduna

  Hvað er skemmtilegra um jól og áramót en að stórfjölskyldan komi saman og allur hópurinn skipti með sér verkum við að elda einiberjakryddað lúxus lambalæri?  Einn,  til að mynda aðal töffarinn í hópnum,  hefur leik á því að versla með tilþrifum og þokkalegum stæl eins og eitt stykki af einiberjakrydduðu lambalæri.  Einhver annar sviðsetur fjörlegan leik við að finna á umbúðum þyngd lærisins.  Þriðja manneskjan þarf að kunna á vasareikni,  vinsælustu fermingargjöf áttunda áratugarins. 

  Viðkomandi slær inn á vasareikninn þyngd lærisins og margfaldarann x 44 mínútur á hvert kíló.  Útkoman úr því dæmi sýnir hvað lærið þarf lengi að malla í skúffu eldavélarinnar.

  Á meðan skenkir fjórða manneskjan heimilisfólkinu og gestum rauðvín.  Fimmta manneskjan laumar - svo lítið ber á - skotum af Jameson viskýi (má einnig vera Jack Daniels) á liðið.  Sjötta manneskjan þarf að vera í jólasveinabúningi og dreifir jólabjór og syngja:  "Hó, hó hó!" (nema fólk sé statt í Ástralíu.  Þar er bannað með lögum að segja:  "Hó,  hó,  hó!".  Ástæðan er sú að í enskuframburði Ástrala er ekki munur á orðinu hóra og "Hó").  Í bakgrunni er heppilegast að hafa plötuna  Never Mind the Bollocks  með Sex Pistols.  Það er best að hafa hana á rúmlega meðalstyrk.  Til tilbreytingar má líka spila plötur með Fræbbblunum.

  Það skerpir á stemmningunni að att sé keppni í loftgítar.

  Á meðan lærið mallar kemur vel út að smjörsteikja niðurskornar kartöflur (eða epli,  eins og Færeyingar kalla kartöflur) og sjóða blandað grænmeti svo snöggt að sú eldamennska líkist töfrabrögðum - með tilheyrandi handahreyfingum galdrakarls. 

  Ef einhver er nógu edrú til að treysta sér í að útbúa sósu þá er uppskriftin þannig:

6 dl. kjötsoð (soð úr skúffunni, vatn og kjötkraftur)
5-6 einiber
1 tsk steinselja
2 dl rjómi
1 msk   hunang
Salt og pipar

Setjið kjötsoð, einiber og steinselju saman í pott og sjóðið í 8 mín. Bætið í rjóma og hunangi og bragðbætið með salt og pipar. Þykkið sósuna með sósujafnara.  Syngið á meðan yfir pottinum "Jólamaðurinn kemur í kvöld" (sjá tónspilara).  Gætið að því að bera fram orðið "jólamaðurinn" sem "jólameavurinn".

Athugasemdir

[Jóna Kolbrún Garðarsdóttir, 27.12.2008 kl. 01:17]

Ég hefði þurft að hafa svona hóp um síðustu áramót þegar ég eldaði tvö lítil lambalæri, þessi sem reiknaði út steikingartímann hefði bjargað mér frá ofsteiktu og þuru kjöti.  Og í ofanálag var ég með gest frá Finnlandi sem þurfti að borða þetta kjöt.  Ég var í algjörri steik yfir eldamennskunni hjá mér þá.  Sem er sjaldgjæft sem betur fer. 

[Sverrir Einarsson, 27.12.2008 kl. 08:40]

Gjörið svo vel skál. eða var það Skál gjörið svo vel?

Það er stóra spurningin.

Vona að bragðlaukarnir hafi ekki verið orðnir skemmdir þegar matarveislan loks hófs, eða gleymdist að borða?

[Jóhanna Magnúsar- og Völudóttir , 27.12.2008 kl. 10:13]

Ég gæti trúað að söngurinn geri útslagið með sósuna! .. Matreiðsla er nefnilega mjög tilfinningatengd í mínu tilfelli og get bara alls ekki eldað góðan mat þegar ég er í vondu skapi. Sem betur fer fer ég afar sjaldan í vont skap.

[Ingvar Valgeirsson, 27.12.2008 kl. 13:22]

Það er alveg óþarfi að eyðileggja skemmtilega eldamennski með því að vera edrú. Því er gott að útbúa sósuna fyrr um daginn og hita hana bara upp þegar borið er á borð.

Bara hugmynd...

[Hjördís (IP-tala skráð) 27.12.2008 kl. 14:03]

Þú átt GREINILEGA eftir að smakka lambakjöt kryddað með Bezt á lambið. Eftir þá upplifun (sem verður vonandi hér á horninu fljótlega eftir áramótin) munt þú aldrei kaupa fyrirfram kryddað lambakjöt, nema ef vera skyldi í Melabúðinni því þar eru lamabalærin einmitt krydduð með Bezt á lambið!