Önnur íslensk hljómsveit kynnt í pólsku rokktímariti

  Í næstu færslu á undan þessari sagði ég frá íslenskri rokkplötu sem er í sviðsljósinu í Póllandi um þessar mundir (sjá:  http://www.jensgud.blog.is/blog/jensgud/entry/810899/ ).  Þar með er ekki öll sagan sögð.  Í nýjasta hefti eins helsta rokkblaðs Póllands,  Pasazer,  er þriggja blaðsíðna grein um íslensku hljómsveitina Purrk Pillnikk. 

  Ekki nóg með það.  Blaðinu fylgja tvær safnplötur.  Önnur inniheldur pólska rokkmúsík.  Hin inniheldur alþjóðlegar pönkaðar rokkperlur frá hljómsveitum á borð við hina stórkostlegu Anti-Flag,  Nuclear Death Terror,  Chuck Ragan og Purrk Pillnikk.  Lagið með Purrknum er  Tíminn. 

  Greinin um Purrkinn er vel unnin.  Blaðamaðurinn virðist vera þokkalega vel að sér um íslenska pönkið.  Fjallar um kvikmyndina  Rokk í Reykjavík,  vitnar til frumkvöðlastarfs Fræbbblanna og tengir Purrkinn við Kuklið og Sykurmolana.  Að hluta er greinin byggð á viðtali við Einar Örn,  söngvara Purrksins.  Greinin er skreytt fjölda ljósmynda.  Meðal annars tveggja mynda úr Poppbókinni sem ég skrifaði 1983.  Það þykir mér merkilegt og bendir til þess að blaðamaðurinn hafi gert sér ferð til Íslands við vinnslu á greininni.

Athugasemdir

[Röggi (IP-tala skráð) 24.2.2009 kl. 23:25]

Pólverjar hafa greinilega fínan tónlistarsmekk , hvað er hægt að hugsa sér meira hressandi en Purrkinn til að hlusta á í nepjunni. Það væri gaman ef Íslendingar væru jafn áhugasamir og útlendingar um tónlistina okkar.

Íslenskar Rokk hljómsveitir á heimsmælikvarða hafa verið þagðar í hel og nægir þar að nefna Dimmu og Deep Jimi and the Zep Creams , hljómsveitir sem hvaða þjóð væri að springa úr monti af en nei þær eru varla spilaðar í útvarpi allra landsmanna.

[Jens Guð, 25.2.2009 kl. 00:12]

  Röggi,  það er rosalega gaman að lesa um íslenskar hljómsveitir í pólskum rokkblöðum.  Ekki síst er gaman að lesa þar á bæ um I Adapt og Purrkinn,  hljómsveitir sem eru ekki í daglegri spilun í íslenskum útvarpsstöðvum.

[Röggi (IP-tala skráð) 25.2.2009 kl. 18:12]

Já ég skal trúa því :)

[Þórður Helgi Þórðarson, 26.2.2009 kl. 21:55]

Hvaða þáttur er þetta sem þú hirðir af youtubinu?

og hver þular?

Skemmtilegt innslag þar á ferð

[Jens Guð, 27.2.2009 kl. 20:20]

  Doddi,  ég veit ekkert um þessa klippu.  Það virðist vera fagmennska í þessu,  eins og um sjónvarpsþátt sé að ræða.  Þó held ég að þetta hafi ekki verið sýnt í íslensku sjónvarpi.  Ég ætti að muna eftir því.  Hljóðið ekki nógu gott.  Mig grunar að þetta sé tekið af gamalli VHS spólu.