Skúbb! Leiðtogi Reykjavíkurkjördæmis valinn

  Stjórn kjördæmafélags Frjálslynda flokksins í Reykjavík norður hélt langan og strangan fund fyrr í kvöld.  Fundarefnið var uppstilling á framboðslista flokksins í kjördæminu í vor.  Vandamálið sem stjórnarmenn stóðu frammi fyrir var að mannval er svo gott að einungis tókst að komast að niðurstöðu með hver skipar toppsætið og verður leiðtogi framboðsins. 

  Valið stóð á milli 6 aðila er komu fyllilega til greina sem góður kostur.  Eftir að hafa rætt málin fram og til baka og skoðað frá öllum hliðum var ákveðið að Karl V.  Matthíasson verði í 1.  sæti í Reykjavík norður.

  Karl hefur setið á þingi fyrir Samfylkinguna og verið einarður baráttumaður gegn kvótakerfinu.  Það baráttumál hefur ekki skipað þann sess innan Samfylkingarinnar sem Karl vonaðist til.  Eftir að hafa fylgt Frjálslynda flokknum að málum í þingfrumvörpum og allri umræðu um sjávarútvegsmál steig Karl það eðlilega skref að yfirgefa Samfylkinguna og ganga til liðs við Frjálslynda flokkinn. 

  Til gamans tengi ég þessa færslu við frétt af fyrirspurn Arnbjargar Sveinsdóttur þingkonu D-lista um kræklingarækt.  Þessi fyrirspurn er uppsláttarfrétt í málgögnum D-lista.  Karl V.  Matthíasson bar fram nákvæmlega sömu fyrirspurn á alþingi fyrir nokkrum árum.  Þá þótti þessum sömu málgögnum ekki ástæða til að flytja af því fréttir.  En það eru kosningar á bakvið næsta horn. 

 

Kræklingarækt verði efld

Athugasemdir

[Guðmundur Brynjólfsson (IP-tala skráð) 18.3.2009 kl. 21:41]

Heill og sæll meistari. Þetta er nú ekki mikið skúbb hjá þér núna - ég skrifaði um þetta í dag:

http://blogg.visir.is/gb/2009/03/18/eg-spai-%c3%bevi-a%c3%b0-vi%c3%b0ar-gu%c3%b0johnsen/

Kveðja,

[Þóra Guðmundsdóttir, 18.3.2009 kl. 22:26]

Þið eruð snillingar   Nú hlýtur Frjálslyndi flokkurinn að slá í gegn. Ég hélt nú samt að þetta sæti væri frátekið fyrir Ásgerði Jónu en hún hlýtur þá að fara í Reykjavík Suður.

[Jens Guð, 18.3.2009 kl. 22:27]

  Mikill spámaður eruð þér,  herra Guðmundur.  Eins og þú tekur fram í bloggfærslu þinni var um spá að ræða.  Sömuleiðis nefnir þú að búið hafi verið að lofa Karli þessu sæti.  Ég verð að leiðrétta það.  Við erum 9 í stjórn kjördæmafélags RN.  Á næst síðasta fundi okkar kom nafn Karls upp ásamt fleiri nöfnum.  Umræða um þau nöfn fór ekki lengra en svo að samþykkt var að engin ákvörðun um framboðslistann yrði tekinn fyrr en á fundinum í kvöld.

  Það gat enginn lofað Karli þessu sæti.  Enginn hafði kannað afstöðu okkar í stjórninni til þess hver ætti að skipa 1.  sætið.  Nokkur nöfn komu til greina.  Það var farið yfir þau nöfn og fundurinn varð óvenju langur.  Að lokum var gengið til atkvæðagreiðslu með þessari niðurstöðu.    

[trader (IP-tala skráð) 18.3.2009 kl. 22:29]

sem fyrrverandi kjósandi frjálslynda flokksins þá finnst mér ekki trúverðugt að alþingismaður geti skipt um flokk 2 dögum fyrir landsþing Frjálslynda Flokksins og nú vera kominn með efsta sætið í kjördæminu! Hann er búinn að vera minna en viku í flokknum.

ég held að þið í FF munið tapa miklu rasistafylgi með því að hafna Viðari og Magnúsi á Landsþinginu, þeir hefðu getað hrist upp í íslenskum stjórnmálum. Ef að kvótatalið verður áfram eina stefnumálið ykkar þá mun flokkurinn enda í 2% fylgi eins og hann hefur verið að mælast undanfarið..

[Guðmundur Brynjólfsson (IP-tala skráð) 18.3.2009 kl. 22:32]

Það er samt meira krassandi að segja frá því eins og ég setti það fram .

Bestu kveðjur,

[Jens Guð, 18.3.2009 kl. 22:33]

  Þóra,  það var líka fullyrt við mig að 1.  sætið væri frátekið fyrir önnur tilgreind nöfn.  Staðreyndin er hinsvegar sú að við í stjórninni gengum algjörlega óbundin til atkvæðagreiðslu um þetta í kvöld.  Toppsætið var ekki frátekið fyrir neinn.  Niðurstaðan gat farið á ýmsan veg sem hvorki ég né aðrir í stjórninni gátum vitað hver yrði fyrr en eftir að við höfðum greitt atkvæði.

[Linda Linnet Hilmarsdóttir, 18.3.2009 kl. 22:49]

Innlitskvitt og ljúfar kveðjur...:0)

[Magnús Geir Guðmundsson, 18.3.2009 kl. 22:55]

Haha, þetta er bráðskemmtilegt og sýnir hversu mikið líf og fjör er í FF!og ástæður Sr. Karls til að ganga í flokkin eru svo sannarlega GILDAR! ég ætla þó rétt að vona, að tilkoma hans í FF og sem leiðtoga flokksins í Reykjavíkurkjördæmi norður, muni ekki auka hættuna á TRÚARBRAGÐAERJUM innan kjördæmafélagsins, guðs alma´ttugs og Óðins!?

[Jens Guð, 18.3.2009 kl. 22:59]

  Trader,  þetta hafði lengri aðdraganda.  Karl var fyrir löngu orðinn langþreyttur á því hvað Samfylkingin var og er áhugalaus um kvótakerfið.  Samfylkingarfólk hafði sömuleiðis horn í síðu Karls vegna þess hvað hann fylgdi Frjálslynda flokknum fast eftir í sjávarútvegsmálum.  Ekki síst eftir að íslenska ríkið var dæmt fyrir mannréttindabrot í málefni sjómannanna tveggja. 

  Karl vildi fá úr því skorið í prófkjöri að fullreynt væri með samleið hans og Samfylkingarinnar.  Hann vildi fá staðfest að samfylkingarfólk hefði ekki áhuga á rödd sem talaði af einurð gegn kvótakerfinu. 

  Magnús Þór hefur lýst því yfir að hann hafi boðið sig fram til formanns einungis til að sýna styrk Guðjóns Arnars.  Það gekk eftir.  Enda tilkynnti Magnús Þór um framboð sitt á síðustu stundu.  Það er vonlaust að ná góðri kosningu á landsþingi með þannig vinnubrögðum. 

  Þetta á líka við um framboð Viðars Helga.  Flestir þingfullrúar eru búnir að gera upp hug sinn löngu fyrir þing.  Í einhverjum tilfellum vegna þess að frambjóðendur eru búnir að standa í kosningabaráttu.  

[Jens Guð, 18.3.2009 kl. 23:01]

  Guðmundur,  láttu mig þekkja það!  Hehehe!

[Jens Guð, 18.3.2009 kl. 23:03]

  Linda mín,  knús á þig.

[Jens Guð, 18.3.2009 kl. 23:15]

  Magnús Geir,  okkur ásatrúarmönnum í FF hefur alltaf lynt vel við kristna félaga okkar.  Formaður kjördæmafélags RN,  Sigurður Þórðarson,  er einnig í Ásatrúarfélaginu.  Í rútunni til og frá Stykkishólmi vorum við ásatrúarfégarnir þrír og aðrir ferðafélagar kristnir.  Það leiddi til skemmtilegrar umræðu sem um tíma hljómaði eins og þau kristnu væru komin í trúboð fyrir heiðni.  Allt í léttum dúr og gamansemi að sjálfsögðu.  Enda allir kátir og hressir.

[Jóhann Páll Símonarson, 18.3.2009 kl. 23:17]

Heill og sæll Jens.

Ekki ætla ég að blanda mér í þessa umræðu ykkar, ég hef aldrei haft trú á þessum flokki. Vegna þarna eru saman komnir karlar sem eru að upphefja sjálfan sig á kostnað annarra.

Enn Karl Mattíasson er góður drengur því Matthías faðir hans var afbragsmaður sem félagi og vinur. Ég tel að Karl hafi á sínum tíma verið plataður, enn sannfæring mun snúa honum á rétta leið.

Jóhann Páll Símonarson.

[Sveinn (IP-tala skráð) 18.3.2009 kl. 23:19]

Bíddu,  var ekki Viðar H.  Guðjohnsen með yfirlýsingu um að taka 1. sæti í Reykjavík norður? 

[Jens Guð, 18.3.2009 kl. 23:27]

  Jóhann Páll,  þú talar eins og FF sé karlaklúbbur.  Konur eru áberandi í forystu flokksins og flokksstarfi.  Varaformaðurinn er kona,  Ásgerður Jóna Flosdóttir.  Ritarinn er kona,  Hann Birna ekki Kristjánsdóttir. 

  Ég hef lengi fylgst með þingstörfum Karls og glaðst yfir stuðningi hans við málflutning FF.  Á Landsþinginu kynntist ég honum sem frábærum húmorista og hann er klárlega góður drengur með sterka réttlætiskennd. 

[Jens Guð, 18.3.2009 kl. 23:28]

  Flosadóttir átti það að vera.

[Jens Guð, 18.3.2009 kl. 23:37]

  Sveinn,  í yfirlýsingu frá Viðari Helga kemur fram að hann sækist ekki eftir oddvitasæti á framboðslistum flokksins.  Ég held að mér sé samt óhætt að upplýsa að nafn hans kom til umræðu í vali okkar í RN um 1.  sætið. 

[Þór (IP-tala skráð) 18.3.2009 kl. 23:42]

Hver er í öðru sæti?

[Jens Guð, 18.3.2009 kl. 23:55]

  Þór,  við náum vonandi að afgreiða það á laugardaginn.

[Jens Sigurjónsson, 19.3.2009 kl. 00:57]

Sæll nafni.

Mér líst vel á það hjá ykkur að hafa valið Karl til fyrsta sætið.

[Rannveig H, 19.3.2009 kl. 07:45]

Þetta verður tær snilld bæði í norður og suður, og nú er það bara eins og sagt var í boðinu 10 þingmenn og ekkert minna.

[Sigurður Þórðarson, 19.3.2009 kl. 08:05]

Magnús, það er engin hætta á trúarbragðadeilum þó ritari og formaður kjördæmafélagsins Rvk. norður, lúti leiðsögn Óðins, enda hefur hann ekkert á móti Kristi. Hitt þykir mér líklegra að Óðinn kunni vel að meta boðskap Krists, enda gaf hann annað auga sitt fyrir viskuna. Nú svo er aldrei að vita nema séra Karl prédiki Guðsorð yfir okkur heiðingjunum. En án alls gríns er Karl drengur góður og mikil liðveisla af honum. Hann hefur alltaf verið andsnúin kvótakerfinu og honum hugnast betur að vinna með samherjum en að hrópa sig hásann í eyðimörk Samfylkingarinnar.

[Einar (IP-tala skráð) 19.3.2009 kl. 09:36]

Það var búið að ákveða löngu fyrir landsþingið hver átti að vera formaður og varaformaður. Kosningin var einungis til sýnis.

Enda svosem ekki hægt að búast við öðru þegar aðeins 3 stórfjölskyldur eru á svæðinu sem kjósa eftir skipun.

Þarna missti flokkurinn eitt atkvæðið enn.

Ég skila auðu í næstu kosningum. Svona vinnubrögð skrifa ég ekki undir.

[Þorsteinn Briem, 19.3.2009 kl. 11:26]

Sorgleg Kalla sálumessa,
sauðina alla var að blessa,
Óðinn hann er alveg hlessa,
engin frjálslynd nú er lessa.

[Björn Júlíus Grímsson, 19.3.2009 kl. 11:44]

Mér finnst það sorglegt að FF skuli alltaf púkka uppá þessa afdala flóttasauði strax og þeir koma til okkar í flokkinn. Væri ekki rétt að láta þessa menn vinna örlítið fyrir flokkinn áður en þeim er fært toppsætið á silfurfati.  Það eina sem ég er búin að heyra um að Séra Karl sé sammála okkur um er þetta blessaða kvótakerfi, varla er hann svo einsleitur að hann hafi ekki sterkar skoðanir á öðrum málum. Og er alveg víst að þær skoðanir samræmist okkur frjálslindum.  Þessi þingmannadýrkun er sorgleg innan þessa flokks við skulum ekki gleyma að það voru þessir 63 bjöllusauðir sem gerðu það kleift m.a. að landið er á hausnum.

Það er ekki það að ég sé á móti prestinum  en mig langar að vita hvað í ósköpunum varð til þess að hann var valinn framyfir 5 aðra hæfa einstaklinga svona nýgenginn í flokkinn.

[Björn Birgisson, 19.3.2009 kl. 13:29]

FF flóttamannabúðir - In memorian.

[Rannveig H, 19.3.2009 kl. 13:39]

Það er spurning hvort þetta sé ekki orðin áunnin hefð hjá FF að hafa fallkandídata úr öðrum flokkum í fyrsta sæti hjá sér.  En Jens verður að svara þessu sem sitjandi í kjördæmisráði RN .Er eitthvað lýðræðismisferli í gangi.

Einar eitt atkvæði enn hefur ekkert að seigja flokkurinn mun taka því fagnandi eins og öðrum atkvæðum sem hafa farið.

[Jóhannes (IP-tala skráð) 19.3.2009 kl. 13:53]

Hér eru komnar fram fullyrðingar sem verður að svara.

[Sigurður Þórðarson, 19.3.2009 kl. 16:00]

Að gefnu tilefni vil ég taka fram að að það hlítur að vera misminni hjá  Viðari Helga að ég hafi útlistað fyrir honum einhver hrossakaup í sambandi við fyrsta sætið í Reykjavík norður.  Ég vil að minnsta kosti ekki trúa því að Viðar sé að segja þetta gegn betri vitund, þó honum sé heitt í hamsi.  Þessu til sönnunar vísa ég til fundargerðar kjördæmafélagsins frá því í gærkvöldi þar sem fram kemur að 5 einstaklingar voru í kjöri um fyrsta sæti og þar á meðal Viðar sjálfur.  Hafi Viðar dregið framboð sitt til baka hefði hann átt að tilkynna það til kjörstjórnar frekar en á bloggsíðu.  Varla getur nokkur einstaklingur ætlast til að kjördæmastjórnir athugi Moggabloggið oft á dag um hverjir eru í kjöri.  Það var kosið á milli manna og Karl fékk flest atkvæði og það urðu lyktir málsins.

[Sigurgeir (IP-tala skráð) 19.3.2009 kl. 16:01]

Nei hættið nú alveg.

á að fara í enn einn sandkassaleikinn núna vegna þess að einhver er farinn í fýlu vegna þess að hann fékk ekki sætið sem hann sóttist eftir... Já Viðar ég er að beina þessu á þig.

ertu núna farinn í fýlu...

Bara til hvers eiginlega?

[Björn Júlíus Grímsson, 19.3.2009 kl. 16:18]

Bara að minna á að í Athugasemd númer 26 er spurning sem er ekki búið að svara.

[Halla Rut , 19.3.2009 kl. 16:47]

Björn: Ástæðan fyrir þessu er þú spyrð um er sú að það eru ekki málefnin sem skipta forustu þessa flokks máli heldur aðeins að fá atkvæði til að halda ríkulega launuðum sætum sínum. þess vegna er alltaf einhverjum misþekktum karakterum kippt inn rétt fyrir kosningar til að reyna að veiða fleiri atkvæði. Það er þó ennþá fólk innan flokksins sem eru þar vegna málefnanna en þeim fer ört fækkandi því hinir flæma þá alla í burtu. Þetta fer að minna á 10 litla negra stráka og ætli Guðjón verði ekki einn eftir í flokknum eftir kosningar. 

[Óli (IP-tala skráð) 19.3.2009 kl. 16:48]

Ég verð nú að segja að mér þykir lítið til þessara verka koma, hafið þið ekkert lært af fyrri reynslu með t.d. Kristinn H. að það kann ekki góðri lukku að stýra með að fá menn sem hlaupa burt frá einum flokk í annan eftir þeirra hentugleika, það ber ekki vott um samvinnu, sem þið nauðsynlega þurfið á að halda á þessum tímapunkti.

Er það misminni hjá mér, eða var Ásgerður Jóna ekki búin að gefa kost á sér í 1. sæti á lista ykkar í Norðri? hvað kom fyrir, vilduð þið ekki fá hana, eða vildi hún allt í einu fá suðrið, því það var síðast þingsæti(gat hún ekki verið trú sinni sannfæringu og haldið' sig við þann stað sm hún hafði áður gefið út, það segir okkur kannski eitthvað um hennar ástæður í pólitík, eiginhagsmunapot og lítið annað). Hverskonar vinnubrögð eru viðhöfð hjá ykkur, þið ýtið fólki frá sem hefur unnið fyrir ykkur, og fáið til ykkar villta þingmenn sem rata ekki heim(þeir gera það að minnsta kosti ekki fyrr enn á miðju kjörtímabili, samanber. Gunnar, Jón og Kristinn).

Ef þið viljið að flokkurinn ykkar lifi af, þá þurfið þið virkilega að breyta verkreglum, sundrung og samstarfsleysi er því miður það sem hefur einkennt ykkur.

[Sigurgeir (IP-tala skráð) 19.3.2009 kl. 17:54]

Viðar, þú segir enginn sandkassaleikur.

Mér sýnist ekki betur en svo að það á núna að fara koma með eitthvað stórt(eða eitthvað sem þér finnst vera stórt)

Viðar, hefuru pælt í hvort þú hafir haft stuðning í 1.fyrsta sætið?
hefuru kannað það bakland nógu vel?

Segir ekki Sigurður Þórðar að það hafi verið kosið á milli manna? Er hann þá að ljúga því að það hafi ekki verið kosið eða ?

ég skil ekki þennan andskotans sandkassaleik hjá ykkur alltaf hreint.

þið vælið um að það sé alltaf einhver læti á milli aðila og þið hafið alltaf þörf fyrir það að grenja um það á blogginu eða einhver staðar annars staðar, hvaða rugl er það eiginlega?

Ef þið ætlið að gera eitthvað í þessum kosningum hvernig væri þá að vinna frekar að málefnunum heldur að RÍFAST ALLTAF INNBYRGÐIS EINS OG SMÁBÖRN AÐ RÍFAST UM LEIKFANG.

Viðar þetta er tap er orðið að staðreynd, er þá ekki bara að fara vinna frekar að málefnum flokksins og stækka ungliðahreyfinguna meira? eða ertu einn af þeim sem leggur árar í bát og gefst upp þegar á mót blæs?

ég hef enga trú að þú sért svoleiðs náungi,

En sandkassaleikur skilar hvorki þér né öðrum gott...ja nema andstæðingum Frjálslynda Flokksins.

það er alltaf erfitt að sætta sig við tap en maður verður bara að gera það þegar tap er staðreynd.
þá er ekkert annað en að rífa sig upp og berjast

[Sigurgeir (IP-tala skráð) 19.3.2009 kl. 17:55]

rífa sig upp og berjast fyrir liðið

[Siggi Lee Lewis, 19.3.2009 kl. 18:13]

Sjálfur set ég nú bara Majones á það! Ætlaðir þú ekki að byggja sumarbústað?

[Ólafur Jónsson, 19.3.2009 kl. 18:52]

Hinir sönnu andstæðingar frjálslynda flokksins hljóta vera þeir menn sem hafa ekki kraft né dug til að komast áfram á eigin verðleikum heldur verða beita alls kyns leikbrögðum til að komast áfram.  

Sigurgeir ef menn eru búnir að ræða saman um hverjir fara hvar á lista er þá eitthvað ótrúlegt að þeir samræmi sig og láti eitt og eitt atkvæði falla eitthvert annað en það sem sammælst er um svo kosningin líti ekki illa út. Enda hlýtur það að vera aðal umhyggjuefni þeirra sem svo vinna að ekki komist upp um svikin.

[Jón Kristófer Arnarson, 19.3.2009 kl. 20:39]

Skiptir nokkru máli hvaða menn veljast á lista hjá flokki sem er að mælast með fylgi sem nær ekki pilsersprósentu?  Öfgafull þjóðernishyggja og innflytjendafordómar eru greinilega ekki að fiska fyrir þessar kosningar.

[Sigurgeir (IP-tala skráð) 19.3.2009 kl. 21:05]

Kannski hafa þeir fundið meira fylgi hjá Ásgerði Jónu og Karli heldur en Viðari.

En þegar menn tapa í kosningum þá verða menn samt að standa uppi með reisn og láta ekki deigan síga. heldur halda áfram að berjast fyrir málstaðnum, það er að segja ef þeir hafa áhuga á því.

Jón Kristófer.

Vertu úti :)

[Ólafur Jónsson, 19.3.2009 kl. 21:34]

Það spurning hvernig þeir hafa mælt það fylgi. Er þessi prestur ekki úr samfylkingunni? Var tekin prósenta sem samfylging er með og deilt út á hvern þingmann og þannig fundið út það fylgi sem presturinn er með. Ég las í athugasemd hér ofar að Ásgerður ætlaði að bjóða sig fram í Reykjavík Norður en það breytist af einhverjum ástæðum. En þetta er víst niðurstaðan og fyrir mitt leyti verð ég að segja að hún er vonbrigði.   

Ps. það var leiðinlegt að landsfundur var haldinn á Stykkishólmi ég gat því ekki komist og kosið.

[Sigurgeir (IP-tala skráð) 19.3.2009 kl. 22:24]

Ertu sem sagt að segja að Sigurður Þórðar hafi verið að ljúga því að það hafa ekki verið neinar kosningar um menn á lista?

ég held bara að það ætti að hafa prófkjör,

en hins vegar, þar sem búið er að ákveða þetta þá verður maður bara að sætta sig við það er það ekki Viðar, óþarfi kannski að fara með þetta á bloggheima og tjá reiði sína þar,

hefuru talað við formanninn um þetta mál og tjáð þína skoðun á því?
svo ætti svona lagað að vera leyst og útkljáð innan flokksins enn ekki á bloggheimum :)

[Gunnar Skúli Ármannsson, 19.3.2009 kl. 22:52]

Viðar, geturðu ekki bara klagað Sigga í Guðjón og hætt að skemmta skrattanum á opinberum bloggsíðum. Það gagnast ekki þeim flokki sem þú ert að berjast fyrir.

[Halla Rut , 19.3.2009 kl. 23:04]

Gunnar, af hverju bauðst þú þig ekki fram sem formann?

[Jens Guð, 19.3.2009 kl. 23:25]

  Bestu þakkir,  þið öll,  fyrir fjörlega umræðu.  Ég biðst velvirðingar á að hafa ekki verið nálægt tölvu í dag og þess vegna verið fjarri góðu gamni.  Gjarnan hefði ég viljað svara hverju og einu innleggi fyrir sig.  En verð að stikla á stóru (klukkan nálgast miðnætti) og vona að skilningur sé á því að ég pikka úr þau innlegg sem skilja eftir spurningu til mín. 

[Jens Guð, 19.3.2009 kl. 23:32]

  Nafni Sigurjónsson,  ég er ánægður með að fá Karl til að leiða listann.  Ég tel það vera farsæla niðurstöðu af mörgum góðum kostum.

  Rannveig,  þetta er tær snilld.  Og ekki vantar baráttuandann eins og hann birtist á Landsþinginu.  Og eins og þar kom fram sætta menn sig ekkert við minna en 10 þingmenn!

[Jens Guð, 19.3.2009 kl. 23:36]

  Ég trompa það reyndar og segi:  Ekkert minna en 12 þingmenn!

[Jens Guð, 20.3.2009 kl. 00:01]

  Einar,  hvernig getur þú fullyrt að fyrir Landsþingið hafi þegar verið ákveðið hver yrði formaður og varaformaður?  Fyrir þing lá fyrir að í framboði til formanns yrðu Guðjón Arnar og Guðni Halldórsson.  Á síðustu stundu bættist Magnús Þór við og Guðni dró framboð sitt til baka.

  Til varaformanns reiknuðu flestir með að Magnús Þór myndi sækjast eftir endurkjöri en Ásgerður Jóna og Kolbrún myndu einnig sækjast eftir varaformannskjöri.  Á síðustu stundu bættist Viðar Helgi við og Magnús Þór gaf ekki kost á sér í endurkjör.

  Ég tel mig (kannski ranglega) vera í "innsta hring".  Enginn ræddi við mig fyrir þing um neinar bollaleggingar um hverja ætti að kjósa til formanns eða varaformanns.  Enda lá ekki fyrir hverjir yrðu í framboði fyrr en á síðustu stundu.  Þar fyrir utan hef ég aldrei tekið þátt í neinni "klíkumyndun" innan FF.  Þeir sem þekkja mig vita að ég verð þver og öndverður við tilhneigingar til slíks. 

  Um fjölskyldurnar 3 er það að segja að fjölskylda Guðjóns Arnars og fjölskylda Sigurjóns Þórðarsonar voru vissulega hlutfallslega fjölmennar á Landsþinginu.  Ég veit ekki hver þriðji fjölskyldugarðurinn er.  Ég hef aldrei leynt því að Sigurjón er vinur minn og hefur minn stuðning.  Hinsvegar hefur hann ALDREI reynt að hafa áhrif á hverjum ég greiði atkvæði.  Mér vitanlega hefur Sigurjón aldrei tekið þátt í neinu "plotti" eða leikfléttum.  Það er þvert á móti aðdáunarverður kostur Sigurjóns að vera hreinskiptinn og allir vita hvar hann stendur. 

[Halla Rut , 20.3.2009 kl. 00:06]

Jens, var ég búin að segja þér hvað þú ert mikið krútt?

[Jens Guð, 20.3.2009 kl. 00:17]

  Steini,  bestu þakkir fyrir stökuna.

  Viðar Helgi,  ég sé engan flöt á að Sigurður hafi haft möguleika á að gera hrossakaup.  Mér vitanlega hafði hann ekki hugmynd um hver afstaða okkar hinna í stjórn kjördæmafélags RN var til toppsætis framboðslistans.  Hann ræddi þetta aldrei við mig og mér er kunnugt um að hann ræddi þetta ekki við suma aðra í stjórninni.  Ég hef ekki rætt það við alla en mun gera það á laugardaginn.  Ég sætti mig ekki við ef eitthvað slíkt hefur verið í gangi.  Ég fæ það á hreint á laugardaginn og mun gera mál úr þvi ef það er raunin.

[Jens Guð, 20.3.2009 kl. 00:27]

  Björn Júlíus,  þetta tek ég af www.lillo.blog.is um frumvörp Karls:

1. Þingsályktunartillaga um árlegan vestnorrænan dag.

2. Þingsályktunartillaga um samráðsfund sjávarútvegsráðherra Vestur-Norðurlanda.

3. Þingsályktunartillaga um samráð Vestur-Norðurlanda um sjálfbæra nýtingu lifandi náttúruauðlinda.

4. Þingsályktunartillaga um samkomulag milli Íslands og Grænlands um skipti á útsendum fulltrúum.

5. Fyrirspurn til samgönguráðherra um tilskipanir Evrópusambandsins um losun koltvísýrings.

Á þinginu á undan þessu:

1. Þingsályktunartillaga um samvinnu um öryggis- og björgunarmál milli Vestur-Norðurlandanna.

2.  Þingsályktunartillaga um stofnun norrænna lýðháskóla.

3. Þingsályktunartillaga um gerð námsefnis fyrir unglinga um ólík kjör og hlutskipti kvenna á norðurslóðum.

4. Þingsályktunartillaga um samstarf milli slysavarnarfélaga og björgunarsveita á sjó og landi í vestnorrænu löndunum.

5. Þingsályktunartillaga um samvinnu vestnorrænu landanna um rannsóknir á helstu nytjastofnum sjávar innan lögsögu þeirra. 

6. Fyrsti flutningsmaður skýrslu um Vestnorræna ráðið 2007.

Annað:

Karl var einnig á þingi 2000-2003 og flutti þá nokkur mál, meðal annars um rannsóknir á þorskeldi, geðheilbrigðismál, hlutskipti kvenna, virkjun Hvalár í Ófeigsfirði, átak til að lengja ferðaþjónustutímann og nokkrar fyrirspurnir, meðal annars um kræklingarækt og aðgerðir í skattamálum.

[Jens Guð, 20.3.2009 kl. 00:36]

  Björn Birgisson,  þetta hefur verið í báðar áttir.  Magga Sverris,  framkvæmdastjóri okkar,  stofnaði Íslandshreyfinguna og er nú gengin í Samfylkinguna. 

  Gunnar Örlygsson gekk í Sjálfstæðisflokkinn.  Líka Jón Magnússon.  Kristinn H.  gekk í Framsóknarflokkinn.  Eiríkur Stefánsson hefur tekið upp stuðning við Samfylkinguna.  Það er allur gangur á flokkaflakkinu.  Eins og gengur. 

[Jens Guð, 20.3.2009 kl. 00:41]

  Rannveig og Jóhannes,  Sigurður Þórðarson svarar fyrir þetta.  Ég hef gert grein fyrir þetta eins og það snýr að mér.

[Jens Guð, 20.3.2009 kl. 00:44]

...grein fyrir ÞESSU... átti það að vera.

[Jens Guð, 20.3.2009 kl. 00:53]

  Viðar Helgi,  ég skil þetta þannig að þú sért ekki að bjóða Karl velkominn í okkar flokk.  Við skulum samt hafa í huga að á alþingi tala menn í þessum dúr.  Það tilheyrir.  Rifjum einnig upp hvaða orð Jón Magnmússon hafði uppi um Sjálfsftæðisflokkinn áður en hann gekk til liðs við þann flokk.  Þegar Jón gekk úr FF var hann spurður í fjölmiðlum hvort hann væri á leið yfir í Sjálfstæðisflokkinn.  Jón afneitaði því með þeim rökum að hann - réttilega - hefði verið fremstur í flokki í gagnrýni á Sjálfstæðisflokkinn.  Svona er þetta.  Eins og gengur.  Eins og gengur.

[Jens Guð, 20.3.2009 kl. 00:56]

  Jón Magnússon átti það að vera.  Sorry. 

[Jens Guð, 20.3.2009 kl. 01:17]

  Óli,  ég lýsti strax yfir andstöðu við inngöngu KHG í FF.  Lýsti honum sem óværu.  Fyrir bragðið reyndi KHG að fá mig rekinn úr flokknum.  Sú tillaga hans var felld.  Hann hamaðist samt lengi í því að fá mig rekinn úr flokknum.  Leikar fóru þannig að KHG er farinn úr flokknum og var hafnað af Framsóknarflokknum í prófkjöri.  Búinn að vera og illa farinn. 

  Það kom til tals að Ásgerður Jóna færi fram fyrir RN.  Mér skilst hinsvegar að RS hafi sótt fast að hún leiði þeira lista.  Engin leiðindi og það var allt í sátt að hún fari fram fyrir RS.  Það er allt í góðu.   

[Jens Guð, 20.3.2009 kl. 01:21]

...þeirra lista... átti það að vera.

[Björn Júlíus Grímsson, 20.3.2009 kl. 01:21]

Og Jón Magnússon fékk að gjalda fyrir það í prófkjöri sjallanna, en við erum tilbúnir að setja þá sem ramba inn til okkar uppá stall.

Og ég get ekki séð að þau málefni sem Kalli hefur lagt fram á alþingi sé sérstakleg hönnuð fyrir FF eða geri það að verkum að hann fá fyrsta sæti á lista hjá okkur. Þau lýsa frekar andvaraleysinu í þingheim að vera að leggja fram svona mál í stað þess að huga að því hvað Útrásaruppáhöldin þeirra séu að gera.

Það má ekki skilja það að mér finnist þessi Vestnorræni kappi svo slæmur, þvert á móti er hann örugglega ágætis karl en að hampa mönnum í fyrsta sæti sem er nýgengnir í flokkinn kann aldrei góðri lukku að stýra. Og ég tek það skýrt fram að mér er nokkuð sama um hver hlaut þetta sæti fyrir utan þessa skoðun, þ.e. að ég studdi engan annan í fyrsta sætið.

[Jens Guð, 20.3.2009 kl. 01:28]

  Sigurgeir,  á laugardaginn ætla ég að kanna hvort ég fæ heimild fyrir því á birta hér fundargerð síðasta fundar kjördæmafélags RN. 

  Halla Rut,  þú hefur alveg klúðrað því að upplýsa hvað ég er mikið krútt.

[Björn Birgisson, 20.3.2009 kl. 01:56]

FF - andarslit.

[Sigurgeir (IP-tala skráð) 20.3.2009 kl. 08:44]

FLott er Jens,

Gaman væri að lesa þess fáir þú heimild til þess.

en hins vegar þá ertu alveg örugglega sammála því að svona nokkuð eigi að leysa innan flokksins en ekki á bloggheimum.

Því miður þá finnst mér viðloðandi fýla hjá nokkrum hér því þeir fengu sitt ekki fram og geta ekki sætt sig við orðinn hlut.

[Guðrún Þóra Hjaltadóttir, 20.3.2009 kl. 10:37]

Viðar minn ! Það eru "Guðjónslög" sem gilda og þnnig hefur það verið.

[Jóhanna Magnúsar- og Völudóttir , 20.3.2009 kl. 12:53]

Hér birtast samskipti frjálslyndra í hnotskurn; frá mínum bæjardyrum séð  -   - af hverju hittist þið ekki, þið eftirlegukindur og ræðið saman og leytið lausna?  Innanflokkserjur eða hnúta á ekki að bera á torg og geta ekki verið neinum flokki til góðs. 

Vandamál F er ekki málefnaskráin (vandamál Íslands er reyndar heldur stjórnarskráin) vandamálið er fólkið sem ekki kann að fara með þessar skrár, fólkið sem á í samskiptaörðugleikum. Ykkur vantar hæfan leiðtoga til að halda utan um ykkur krúttin mín  - þar liggur hið stóra púsl, sem þó margir sjá ekki (þrátt fyrir stærðina).

[Halla Rut , 20.3.2009 kl. 13:06]

Heyr, heyr Jóhanna.

[Einar (IP-tala skráð) 20.3.2009 kl. 13:49]

Jæja.. Jens ég er ánægður að þú hafir ekki tekið þátt í þessu.

En finnst þér ekkert skrítið að landsþingið sé haldið úti í rassgati (afsakið orðbragðið) og troðið inn fjölskyldumeðlimum sem kjósa það sem þeim er sagt að kjósa.. svo þessi klíka innan flokksins geti haldið áfram að eyðileggja flokkinn.

Ég allavega hef verið harður Frjálslyndur í langan tíma... ég get ekki sagt að ég sé það lengur. Þau vinnubrögð sem ég sá á Landsþinginu eru "gamla Ísland" ... bakherbergja dílingar og samningar...

Eins og eg segi..  ég skrifa ekki undir svona vinnubrögð.

[Einar (IP-tala skráð) 20.3.2009 kl. 14:07]

Frjálslyndiflokkurinn mælist með 1.3% fylgi í skoðannakönnunum. Borgaraflokkurinn sem hefur ekki einusinni raðað á lista... mælist með 2.5%

Er eðlilegt að núverandi formaður haldi áfram?

Er ekki í lagi hjá ykkur eða!?!?

[Stefán (IP-tala skráð) 20.3.2009 kl. 15:03]

Ég ítreka að ef FF fara ekki að taka harða afstöðu gegn Sjálfstæðisflokknum, þá mun FF nánast þurkast út í komandi kosningum. Fólk virðist líta á FF sem brot út úr Sjálfstæðisflokknum, sem er reyndar upphaflega, en frambjóðendur og talsmenn FF verða að taka virkilega harða afstöðu gegn Sjálfstæðisflokknum til að láta taka sig alvarlega.

[Árni Gunnarsson, 20.3.2009 kl. 19:58]

Ja hérna! Margt kemur nú upp þegar hjúin deila, segir gamalt máltæki. Mér finnst virðingarvert hvað hann Jens er örlátur á tillitssemina við ykkur börnin mín góð. En að öðru: Ég held að okkur hafi alltaf vantað mann eins og hann Sigurgeir, er reyndar ekki viss um að hann sé í flokknum en hef hann grunaðan um að styðja hann.

Sigurgeir kemur umbúðalaust að kjarnanum og gerir það prýðilega. Hann skrifar undir ip tölu en ég hef ákveðnar hugmyndir um hver hann muni vera. Og Um Karl Matth. Ég held að hann sé alveg einlægur í afstöðu sinni til stjórnunar fiskveiða og veit að hann hefur móast við stefnu Samfylkingarinnar í þeim málum.

Var völ á betri manni?

Það er mikil einföldun að segja upistöðuna í flokknum koma frá Sjálfstæðisflokknum. Ég var einn af stofnendum flokksins og svo sannarlega kom ég ekki frá íhaldinu. Og svo er um marga fleiri t.d. Valdimar H. Jóhannesson sem plægði akurinn fyrir stofnun flokksins af miklum dug og aðdáunarverðri djörfung. 

[Rannveig H, 20.3.2009 kl. 22:43]

Það eru margir í stuð með Jens Guði! Ekki veit ég afkverju hann Arnar B er að nota nafnið Sigurgeir hann sem hefur svo oft skrifað undir eigin nafni og getað staðið við sín skrif.

[Jens Guð, 20.3.2009 kl. 23:07]

  Siggi Lee,  nú er byrjað að flytja inn frá Bandaríkjunum mæjónes með beikonbragði.  Það smellpassar víst á hamborgarann.

  Ég byggi ekki sumarbústað.  Ég nenni því ekki.  En kannski kaupi ég sumarbústað. 

[Jens Guð, 20.3.2009 kl. 23:22]

  Ólafur Jónsson,  áður en ég hef gengið algjörlega úr skugga með annað skal ég ekki standa 100% við að einhver hafi talað við Karl V.  eða aðra á þeim nótum að skilja mætti sem 1.  sætið væri honum ætlað.  Á hinn bóginn hefur enginn það vald eða þá stöðu að geta lofað einhverjum 1.  sæti áður en stjórn kjördæmafélagsins greiðir atkvæði um það.  Í 9 manna stjórn kjördæmafélags Reykjavíkur norður er enginn í þeirri aðstöðu að hafa afgerandi áhrif á hvernig við greiðum atkvæði.  Ný stjórn hafði aðeins haldið einn fund fyrir fundinn þar sem Karl var kosinn til að leiða listann.  Fæst okkar í stjórn þekkjumst það vel að við getum áætlað hver muni kjósa hvern í 1. sætið. 

  Fyrir fundinn hringdi einn stjórnarmaður í aðra í stjórninni og talaði fyrir öðrum tilteknum kandídat en Karli í 1. sætið.  Mér vitanlega fór ekki fram önnur umræða á milli stjórnamanna um 1. sætið fyrir fundinn.  

[Jens Guð, 20.3.2009 kl. 23:28]

  Jón Kristófer og Sigurgeir,  FF hefur góða stefnu í málefnum innflytjenda,  sjá www.xf.is.  Þar kemur skýrt fram að stefna okkar er algjörlega laus við rasisma og öfgafulla þjóðernishyggju.  

[Jens Guð, 20.3.2009 kl. 23:33]

  Ólafur Jónsson,  ég var ósáttur við að Landsþingið var haldið í Stykkishólmi.  Samt mætti ég þangað og skemmti mér konunglega.  Þú hefðir gert það líka.  Fjörið var svo mikið og stemmningin frábær.

  Ásgerður Jóna kom til greina á framboðslista RN.  Forysta RS sótti hinsvegar stíft í að fá hana til að leiða lista sinn.  Klónun er ekki lengra komin en svo að niðurstaða varð sú að hún leiðir bara framboðslista RS.

[Jens Guð, 20.3.2009 kl. 23:38]

  Viðar Helgi,  stjórn kjördæmafélags RN hefur ekki ennþá gert tillögu um framboðslista.  Við höfum valið Karl V.  Matthíasson í 1.  sætið en afgreiðum vonandi frambjóðendur í önnur sæti á morgun.  Við erum rétt svo á byrjunarreit en ef allt gengur vel á morgun komumst við betur áleiðis.

[Jens Guð, 20.3.2009 kl. 23:45]

  Sigurgeir,  ég votta og undirstrika að það var kosið um hver myndi leiða framboðslistann í RN.  Karl fékk 5 atkvæði.  1 greiddi atkvæði á móti.  2 sátu hjá.  Lýðræðisleg niðurstaða:  5:1.  Ég ætla að flestir sjái að útkoman var afgerandi og ætti ekki að hafa neinn eftirmála. 

[Jens Guð, 20.3.2009 kl. 23:51]

  Gunnar Skúli og Halla Rut,  það var ekki ætlun með þessari sakleysislegu færslu um afgerandi úrslit lýðræðislegrar kosningar um Karl V.  Matthíasson sem leiðtoga framboðslista RN að vekja upp deilur.  En svona er þetta stundum.  Og ekki fyrirséð.  Eins og gengur.  Eins og gengur.

[Jens Guð, 21.3.2009 kl. 00:07]

  Björn Júlíus,  ég er mjög áhugasamur um v-norrænt samstarf.  Sat um tíma í nefnd á vegum NORA varðandi v-norræna músík.  Ég setti saman þungarokksplötu,  Rock from the Cold Seas, með lögum frá Íslandi,  Grænlandi,  Samalandi og Færeyjum.  Þar var m.a. að finna fyrsta lag hljómsveitarinnar Mínus á plötu.  Platan seldist á alþjóðavísu í 20 þúsund eintökum og opnaði margar dyr fyrir v-norrænar hljómsveitir (sjá www.allmusic.com).  Ég tók einnig þátt í að setja upp ráðstefnu og hljómleika hérlendis,  Nord Pop,  sem byggði á plötunni.  Við í NORA nefndinni framleiddum einnig sjónvarpsþátt,  Frost Pop,  sem var sýndur í sjónvarpi víða um heim.  Þar voru Sigur Rós og Gus Gus í stóru hlutverki áður en þær hljómsveitir urðu heimsfrægar.  Einnig hef ég tekið virkan þátt í að brúa bil á milli færeyskra tónlistarmanna og íslenskra til að kynna sig og spila í þessum tveimur löndum og einnig utan þeirra. 

  Síðar á þessu ári gef ég út plötu sem heitir World Music from the Cold Seas.  Ég er þess vetna afskaplega ánægður með áhuga Karls á v-norrænu samstarfi.

[Jens Guð, 21.3.2009 kl. 00:12]

  Ég ætla að bæta því við að á plötunni World Music from the Cold Seas verða lög með Eivöru og Tý.  Færeyskum tónlistarmönnum sem ég í sjálfhverfri upphafningu tel mig hafa átt þátt í að koma á framfæri hérlendis.  Nú er ég byrjaður að vinna að færeyskri tónlistarhátíð á Stokkseyri í ágúst. 

[Jens Guð, 21.3.2009 kl. 00:25]

  Björn Júlíus,  Karl upplýsti mig áðan um að það voru forystumenn FF sem lögðu fast að honum að ganga til liðs við flokkinn.  Einmitt vegna þess að hann hafði verið meðflutningsmaður frumvarpa FF og fylgt FF lengi að flestum málum.  Ég vona að ég sé ekki að bregðast trúnaði -  Karl bað mig ekki fyrir þetta - að hann er miður sín yfir að umræðan hér hefur farið í þennan farveg.  Honum var ekki lofað neinu um leiðtogasæti.  Hann gerði heldur ekki kröfu um neitt slíkt.  Bara svo það sé á hreinu.  

[Jens Guð, 21.3.2009 kl. 00:27]

  Björn Birgisson,  núna er stemmningin þannig að FF sættir sig ekki við neitt minna en 10 þingmenn og ég er búinn að trompa það með kröfu um 12 þingsæti.

[Jens Guð, 21.3.2009 kl. 00:37]

  Sigurgeir,  eins og ég segi í athugasemd #83 var ekki ætlun að opna á umræðu í þann farveg sem hún hefur farið.  Að vísu er ég fylgjandi opinni umræðu og allt uppi á borðum.  En það var ekki meining með því að skrifa litla færslu um að Karl hafi verið kosinn til að leiða framboðslista RN.  Fyrst umræðan fór í þennan farveg kemst ég ekki hjá því að svara fyrir og upplýsa hvernig mál snúa að mér.  Ég þoli illa baktjaldamakk og það sem kallast klækjastjórnmál.  Þegar ég er sakaður um þátttöku í slíku er ég knúinn til að gera hreint fyrir mínum dyrum.  Ég treysti á að þeir sem hafa fylgst með mínu bloggi viti að ég hef alltaf verið opinskár um viðhorf mín til manna og málefna. 

[Jens Guð, 21.3.2009 kl. 00:41]

  Guðrún Þóra,  þú ætlar Guðjóni Arnari alræðisvald í FF.  Það er ekki svoleiðis.  Auðvitað hefur Guðjón Arnar sem formaður mikið vægi.  En það þarf fleiri en einn til að dansa tangó. 

[Jens Guð, 21.3.2009 kl. 00:47]

  Jóhanna og Halla Rut, ég þreytist ekki á að segja hvað þið eruð frábærar.  Stefnuskráin er svo sannarlega ekki vandamál.  Vandamálið er að mál hafi þróast á þann hátt að þið eruð ekki lengur með í fjörinu.  Knús á ykkur. 

[Jens Guð, 21.3.2009 kl. 00:56]

  Einar,  ég hef ekki farið í launkofa með óánægju mína með að Landsþingið var haldið vestur á Snæfellsnesi.  Samt er ég svo ánægður með hvað Landsþingið var skemmtilegt þegar á reyndi.  Þar voru tvær fjölskyldur áberandi.  Rétt er það.  Ég varð samt ekki var við neitt baktjaldamakk eða skipulagðar klíkumyndanir.  Að óreyndu ætla ég að slíkt hefði ekki farið framhjá mér.  Enginn reyndi að hafa áhrif á hvernig ég greiddi atkvæði eða það fólk sem ég átti í mestum samskiptum við á þinginu.   

[Jens Guð, 21.3.2009 kl. 01:13]

  Stefán,  ég er sammála því að FF þarf að skera sig rækilega frá Sjálfstæðisflokknum.  Það loðir við FF að Sverrir Hermannsson og hans fjölskylda gekk til liðs við hreyfingu sem áður var stofnuð til að berjast gegn kvótakerfinu.  Guðjón Arnar kom einnig úr Sjálfstæðisflokknum.  Sömuleiðis hefur það bent til samliggjandi tengsla við Sjálfstæðisflokkinn að Gunnar Örlygsson og Jón Magnússon gengu úr FF yfir í Sjálfstæðisflokkinn.  Ég ætla samt að þegar öllu er á botn hvolft þá sé FF dálítið þverpólitískur á litrófi gegn kvótakerfinu.  Það hef ég líka merkt af félögum mínum í FF.  Sjálfur er ég hallur undir það sem kallast mannúðleg markaðshyggja.  Stuðningsmaður félagsnets þess fólks sem þarf á stuðningi að halda vegna sjúkdóma,  atvinnuleysis,  öldrunar og svo framvegis.  Þar fyrir utan harður andstæðingur óheftu frjálshyggjunnar sem leiddi til bankahrunsins og þeirra efnahagserfiðleika sem Íslendingar sitja nú uppi með.

[Jens Guð, 21.3.2009 kl. 01:16]

  Árni,  ég hef óendanlegt umburðarlyndi gagnvart þeim sem eru mér missammála.  Það er fjör og ég tek þátt í partýinu.

[Sigurgeir (IP-tala skráð) 21.3.2009 kl. 01:52]

Árni og Rannveig.

Ég er hvorki í flokknum né þessi Arnar B. sem Rannveig nefnir á nafn.
hins vegar styð ég Frjálslynda en mér finnst alveg óskaplega leiðinlegt þessi endalausi sandkassaleikur sem hefur farið fram hjá nokkrum núverandi og fyrrverandi liðsmönnum Frjálslyndra.

Umræðan hefur ekki farið framhjá mér um "ömurlegan" formanns flokksins, en hún virðist bara koma beint frá fyrrverandi liðsmönnum frjálslyndra, allavega svona 95% af því liði,

Það fólk sem talar um að formaðurinn sé að eyðileggja flokkinn eða fólk tengt honum er nú ekkert endilega af því, held að það séu frekar þið fyrrverandi liðmenn frjálslyndra sem standið fyrir hryðjuverkastarfssemi gagnvart flokknum á opinberum vettfangi og þá á ég við bloggheima.

En það er gaman að sjá hvað Rannveig og Árni(ert þú annars ekki fyrrverandi FF) hafa mikin áhuga á FF, ég býst fastlega við því að þau merkji við F á kosningaseðlinum því það ger greinilegt að það kemst ekkert annað að þar.

[Sigurgeir (IP-tala skráð) 21.3.2009 kl. 01:53]

Ég kýs frekar að vera utan flokka en að vera flokksbundinn.
kýs eftir minni hentusemi hverju sinni.

[Rannveig H, 21.3.2009 kl. 08:58]

Sigurgeir þetta er þá bara tilviljun ein að sama ip tala er hjá þér og Arnari B Guðjónssyni og skriftastílinn sé eins. Það er lítið við því að gera nema að biðjast afsökunar.

En svona rétt til að benda þér á það að ég sé ekkert í skrifum okkar Árna sem hallar á Guðjón Arnar. Svo það sér á hreinu líka að þá eru gjarnan formenn flokka gagnrýndir vil ég þá benda á Geir ISG Guðna og Valgerði sem öll eru farin sem betur fer.

Það eru tvær ip tölur sem ég hef skráðar hjá mér það er þín (Arnars & Sigurgeirs) og ip tala Helga Helgasonar. Hreinskiptin umræða er ekki slæm,en árásir undir dulnefnum má frekar kallast hryðjuverkastarfssemi og/eða sjálfsmark. Vörn er ekki alltaf besta sóknin.

[Jóhanna Magnúsar- og Völudóttir , 21.3.2009 kl. 11:09]

Knús til baka á þig Jens - fann einn bloggarabrandara sem passar ágætlega hér í athugasemd nr. 97 .. (næstum 100)

Sp: Hvað þarf marga bloggar til að skipta um ljósaperu?
Sv: 100.  1 til að skipta um peruna og 99 til að skrifa athugasemdir um hvernig það hefði átt að gera þetta öðruvísi.

[Rannveig H, 21.3.2009 kl. 11:31]

Jóhanna þessi var frábær

[Sigurgeir (IP-tala skráð) 21.3.2009 kl. 13:26]

Svona þér til upplýsinga Rannveig þá er ég ekki þessi Arnar B.

hins vegar er Arnar ágætis kunningi minn og hefur verið það í þónokkurn tíma.
oft hefur hann verið í tölvunni minni,

og aðrar upplýsingar fyrir þig þá er einfalt að fá forrit á netinu til að villa fyrir á ip-tölum.

Einnig eru til flökktandi ip-tölur sem þýðir að það er alltaf ný ip-tala í hvert skipti sem maður kveikir á netvarfranum.

Er Arnar ekki flokksbundinn flokknum? ég er það allavega ekki og langar ekki að vera það, en ég styð hann þó og hefði viljað fá Viðar í annað sætið. en held að það hafi verið erfitt að keppa við Ásgerði Jónu um 1 sætið.

en hvaða þráhyggja er þetta í þér Rannveig gagnvart honum Arnari? hefur sá drengur gert þér eitthvað eða?

[Þorsteinn Briem, 21.3.2009 kl. 14:57]

Maður er nefndur.

100. þáttur.

[doddý, 21.3.2009 kl. 19:18]

þetta er mjög spennandi umræða. ég geng þegar í stað í frjálsda flokkinn. kv d

[Jens Guð, 22.3.2009 kl. 00:14]

  Jóhanna,  brandarinn er góður.  Ekki síst vegna þess að það er heilmikill sannleikur í honum.

[Jens Guð, 22.3.2009 kl. 00:15]

  Doddý,  vertu velkomin í okkar hóp.  Það er alltaf fjör hjá FF.

[Jens Guð, 22.3.2009 kl. 00:41]

  Í dag var stjórnarfundur hjá kjördæmafélagi Reykjavík norður.  Ég fékk ekki heimild til að birta hér fundargerðir.  Hinsvegar fékk ég heimild til að vitna í það sem verið hefur ágreiningsefni.  Það er að segja hvort samið hafi verið um að Karl V.  Matthíassyni hafi verið lofað fyrst sæti framboðslistans áður en því sæti var formlega ráðstafað.

  Karl upplýsti okkur um að hann hafi ekki gert kröfu um slíkt,  hvorki í viðræðum við forystumenn FF né samtölum við formann stjórnar RN,  Sigurð Þórðarson. 

  Aðspurðir fullyrtu stjórnarmenn að enginn hafi reynt að hafa rætt við þá né reynt að hafa áhrif á hver ætti að leiða framboðslista okkar fyrir næst síðasta fund nema Björgvin Líndal.  Hann ræddi við mig í síma og fleiri stjórnarmenn tveimur dögum fyrir fundinn.  Í þeim símtölum mælti hann með að Sigurður Ingi Jónsson myndi leiða listann.  Þetta var bókað á fundinum í dag.

  Ég gerði Viðari Helga grein fyrir þessu í dag.  Ég hef alltaf verið talsmaður þess að umræða eigi að vera opin,  gegnsæ og allt uppi á borðum.  Ég hef aldrei tekið þátt í baktjaldamakki eða hrossakaupum.  Sömuleiðis hef ég ekki legið á mínum skoðunum varðandi menn og málefni.  Hvorki á bloggi né í reykfylltum herbergjum.

  Þegar Björgvin reyndi að tala mig inn á að Sigurður Ingi yrði settur sem leiðtogi RN tveimur dögum fyrir stjórnarfund þótti mér það ósmekklegt og ákvað þegar í stað að bregðast öndverður við.  Ég tek ekki þátt í svoleiðis vinnubrögðum.  Það sama hefði gerst ef einhver hefði hringt í mig fyrir stjórnarfund og "agínterað" fyrir Karli V.  Matthíassyni.  Þá hefði ég undir eins snúist gegn því að Karl myndi leiða listann.