Arðgreiðslur - brosleg saga

 

  Eftirfarandi frásögn fékk ég senda.  Hún á erindi í umræðuna um arðgreiðslur til eigenda HB Granda og fleiri fyrirtækja.  Það fylgdi ekki sögunni hvort hún er sönn.  En hún hljómar kunnugleg:

  Simmi, eigandi Söluturns Simma, reiknar ekki með að arðgreiðslur fyrir árið 2009 verði nema kannski helmingur af útgreiddum arði ársins 2008.

 Simma greiddi sjálfum sér arð af rekstri félagsins á síðasta ári, 10 milljarða króna, þrátt fyrir að söluturninn hafi verið og sé í vanskilum við helstu lánadrottna.

 „Þetta var tala sem ég fann út miðað við veltu án þess að reikna málið í drep. Ég hafði rosalega góða tilfinningu fyrir rekstrinum,  var með margar mjög sterkar spólur í leigu, Spædermann þrjú og svona  – þannig að ég ákvað að gefa mér smá klapp á bakið,“ segir Simmi, en  viðurkennir um leið að eftir á að hyggja hafi hann sennilega farið aðeins fram úr sér. Hann bendir samt á að hann hafi bara gert eins og allir aðrir. 

 „Ég treysti á að stjórnvöld sýni þessu skilning, afskrifi lán og komi með pening inn í reksturinn. Það hefur aldrei verið jafn mikilvægt og nú að halda þessum litlu vídeóleigum gangandi. Ef vídeóleigurnar fara á hausinn er einungis verið að fjölga atvinnulausum, draga úr þjónustu við fólkið í landinu og refsa duglegum mönnum fyrir heimskreppuna. Hrun húsnæðislánakerfisins í Bandaríkjunum er ekki okkur að kenna.“

Athugasemdir

[Róbert Tómasson, 24.3.2009 kl. 20:41]

Satt er það Jens að þetta hljómar kunnuglega.  Ég man að fyrir nokkrum árum ákváðu Flugleiðir að greiða 6-7% arð þrátt fyrir að tap hefði verið á félaginu.

En svona er þetta ekki í dag, bíð samt eftir því að það gerist hér eins og í BNA að fyrirtæki fái ríkisstyrki og fari að greiða sér bónusa.

[Jens Guð, 24.3.2009 kl. 23:51]

  Robbi,  það er stutt í að íslensku fyrirtækin sem hafa verið ríkisvædd að undanförnu fari að dæla út bónusum.  Í Svíþjóð var verið að setja lög sem banna slíkt.  Það þótti ástæða til.  Vilji stjórnenda þessara fyrirtækja til bónusgreiðslna sér til handa er svo einbeittur.  Græðgisvæðingin hefur ekki runnið sitt skeið á enda þó snurða hafi hlaupið á þráðinn fyrir þá tímabundið.