Úrslit í skoðanakönnun um bestu íslensku jólalögin

 

  Um jólin efndi ég til skoðanakönnunar um bestu íslensku jólalögin.  Ég óskaði eftir tillögum um bestu og verslu íslensku jólalögin. Það var nánast einróma niðurstaða að  Jólahjól  með Sniglabandinu væri versta íslenska jólalagið.  Það þurfti þess vegna ekki að setja upp formlega skoðanakönnun um versta jólalagið.

  Af tilnefningum um besta íslenska jólalagið setti ég upp formlega skoðanakönnun.  Stillti þar upp þeim lögum sem flestar tilnefningar fengu.  Áhugi á þessari kosningu hefur verið mjög dræm.  Í fyrri skoðanakönnunum mínum hafa fljótlega skilað sér 1000 - 2000 atkvæði.  Á löngum tíma hafa hinsvegar aðeins skilað sér rúmlega 300 atkvæði könnunni um bestu íslensku jólalögin. 

  Röðin og innbyrðis hlutföll hafa ekkert breyst frá fyrstu 50 atkvæðum.  Þó aðeins rúmlega 300 atkvæði hafi skilað sér í hús sé ég ekki ástæðu til að halda könnunni áfram.  Niðurstaðan er þessi:

1,  Gleði og friðarjól (Pálmi Gunnarsson) 33,6%

2.  Jólakötturinn (Ragnheiður Gröndal, Björk) 26,4%

3.  Nóttin var sú ágæt ein (Dikta og fleiri) 23,5%

4.  Jólahjól (Sniglabandið) 16,6%

  Sigurlagið er samið af Magnúsi Eiríkssyni.  Lag númer 2 er samið af Ingibjörgu Þorbergs við kvæði Jóhannesar úr Körlum.  Ég man ekki nafn prestsins sem samdi lag númer 3 né hver í Sniglabandinu samdi  Jólahjól.  Þið hjálpið mér með þær upplýsingar þannig að ég geti fært þær hér inn.

 

Athugasemdir

[Karl V. Matthíasson, 26.3.2009 kl. 08:33]

Góðan daginn Jens.

Nóttin var sú ágæt ein er eftir Einar Sigurðsson  (1538 -1626), sem var prófastur í Heydölum. En lagið er eftir Sigvalda Kaldalóns (Stefánsson) (1881-1946). 

Kalli Matt

[Emil Hannes Valgeirsson, 26.3.2009 kl. 12:57]

Skúli Gautason á hið frábæra Jólahjól.

[Jens Guð, 27.3.2009 kl. 01:10]

  Karl og Emil,  bestu þakkir fyrir þessar upplýsingar.  Ég set þær inn í færsluna um helgina (er að fara að sofa núna og nenni því ekki). 

  Emil,  það er ofmælt hjá mér að tala um  Jólahjól  sem vont jólalag.  Lagið er fínt.  Reyndar dúndurgott út af fyrir sig.  En það er svo ofspilað um hver jól að ég - og margir aðrir - fá snemma um hver jól upp í háls af því.  Ég undrast að einhverjir hafi ekki krákað lagið til að við heyrum það í örðum flutningi en þeim sem hefur tröllriðið í óhófi þessu annars ágæta lagi.