Kvikmyndaumsögn

- Titill:  Draumalandið

.

 - Höfundar:  Þorfinnur Guðnason og Andri Snær Magnason

.

 - Framleiðandi:  Sigurður Gísli Pálmason

.

 - Einkunn: ****1/2 (af 5)

.

  Draumalandið er byggt á samnefndri metsölubók Andra Snæs Magnasonar.  Ansi merkilegri bók.  Ég sá líka vel heppnaða sviðsfærslu Hafnarfjarðarleikhússins á Draumalandinu fyrir 2 árum.

.

  Kvikmyndin flaggar öllum bestu kostum heimildarmyndar:  Hún er virkilega skemmtileg,  fræðandi og vekur áhorfandann til umhugsunar.   Hún býður upp á helling af flottum senum af fallegu landslagi í bland við skondin innskot. 

.

  Þetta er áróðursmynd umhverfisverndarsinna.  Sjónarmið virkjunar- og álverssinna fá að koma fram.  Með framsetningunni verður málflutningur þeirra dáldið kjánalegur.  Ég vorkenni sumum sem uppskáru hláturrokur frá áhorfendum í kvikmyndasalnum.  Ég stóð mig að því að hugsa stundum:  "Ó,  þvílíkt fífl!"

.

  Ég hef samúð með fögnuði Austfirðinga og Húsvíkinga yfir að fá álver í túngarðinn.  Sjálfur vann ég sem unglingur í álverinu í Straumsvík í næstum 3 ár á fyrri hluta áttunda áratugarins.  Á þaðan margar ljúfar minningar og hef verið kvefaður og hás síðan.  Það var lærdómsrík reynsla að kynnast þar skarpari stéttaskiptingu en ég hef kynnst á öðrum vettvangi.  Flestir allra hæst settu hjá fyrirtækinu voru þýskir,  ausurískir eða svissneskir.

.

  Það var gaman að sjá glæsilegar loftmyndir af mínum gamla vinnustað.

.

  Ég mæli eindregið með kvikmyndinni Draumalandinu.  Hún á erindi til allra Íslendinga,  hver sem afstaða er til virkjana og álvera.  Þetta er áhrifarík mynd,  falleg,  fræðandi og skemmtileg.  Hún nýtur sín vel á breiðtjaldi.  En ég er ákveðinn í að kaupa hana á DVD.  Þetta er mynd sem ástæða er til að horfa á oftar en einu sinni.

      

Athugasemdir

[Ómar Ingi, 11.4.2009 kl. 02:14]

Á eftir að sjá þessu kvikmynd en hef heyrt að hún sé ansi mikið séð frá sjónarhóli þeirra sem gera hana og eru á móti öllum slíkum framkvæmdum og ekki fái áhorfendur að sjá nema eina hlið málsins já og gert grín að þeim sem á vilja slíkar framkvæmdir , las reyndar bókina og hafði gaman af þeirri lesningu , verður gaman að sjá myndina til að geta dæmt hana sjálfur.

Annars gaman að sjá að þú skrifar kvikmyndaumsögn jens en svo þegar lesin er pistill þinn fjallar hann þó aðallega um þig á traktor vinnandi í álveri hehehe.

Góðar stundir

[Gunnar Th. Gunnarsson, 11.4.2009 kl. 05:24]

Heimildarmynd? Hverjar eru heimildirnar?

Skrumskæling á veruleikanum getur aldrei orðið nein heimild, nema þá um skrumskælinguna sjálfa.

[Jens Guð, 11.4.2009 kl. 22:04]

  Ómar Ingi,  framleiðandi myndarinnar,  Sigurður Gísli Pálmason (í Hagkaupum),  heldur því fram að myndin sé ekki áróðursmynd heldur óður til náttúrunnar.  En myndin er samt pjúra áróðursmynd.  Áhorfendur fá reyndar að heyra báðar hliðar máls.  Hinsvegar er matreiðslan þannig að virkjunar- og álverssinnar ríða ekki feitum hesti. 

  Þetta er gert meðal annars þannig að sýnd er gömul klippa úr ávarpi álverssinna eða sjónvarpsviðtali við hann.  Sérlegur viðmælandi Draumalandsins gerir síðan athugasemd við ummæli hins. 

  Einnig er nokkuð um að byggð er upp löng sena af einhverju.  Síðan er klippt snöggt yfir á eitthvað sem álverssinni segir og stangast á við senuna.  Þegar best tekst til verður álverssinninn kjánalegur í þessu samhengi.

  Þetta breytir þó engu um að það er virkilega gaman að myndinni.  Margt sem gleður augað og margt sem kallar fram hlátur.  Heilmikill fróðleikur.  Ýmislegt sem vekur mann til umhugsunar.  Það segir sitthvað um myndina að ég hálf hrökk við þegar kom að hléi.  Mér fannst myndin rétt vera að byrja og langaði að sjá framhaldið.

  Kannski hefur eitthvað að segja að ég hef ekki sterkar skoðanir á málefninu.  Móðurætt mín er frá Austfjörðum.  Þar á ég einnig marga góða vini fyrir utan ættingja.  Ég fylgdist með gleði þeirra og væntingum vegna framkvæmdanna þarna. 

  Ég kippti út traktorssögunni minni.  Samkvæmt ábendingu þinni sá ég að hún var óþarfur útúrdúr.  

[Jens Guð, 11.4.2009 kl. 22:10]

  Gunnar,  þetta er ekki leikin mynd.  Hún fellur ekki undir annan flokk kvikmynda en heimildamynda,  eins og þær eru skilgreindar og flokkaðar.  Til að mynda í Skjábíói eða rekkum myndbandaleiga. 

  Hinsvegar er þetta ekki hlutlaus mynd.   Þetta er áróðursmynd.  Uppfull af heimildum.  En þær eru matreiddar málstað umhverfisverndarsinna til framdráttar.

[Helga Þórðardóttir, 12.4.2009 kl. 00:51]

Sammála. Þetta er frábær mynd og vekur mann vissulega til umhugsunar um hvað sé eiginlega í gangi í þessu þjóðfélagi okkar. Mæli með því að allir Íslendingar sjái Draumalandið eða finni sitt eigið draumaland.

[Gunnar Th. Gunnarsson, 12.4.2009 kl. 00:57]

Stjarna myndarinnar, rithöfundurinn John Perkins, er froðusnakkur sem nýtur einskis álits sem heimild. Hann er rithöfundur og "Best seller", ekkert annað. Hann hefur skrifað mikið um 11. sept. og heldur því fram að Bandaríkjamenn sjálfir hafi gert árás á Tvíburaturnana.

[Jens Guð, 12.4.2009 kl. 01:27]

  Helga,  ég tek undir með þér að myndin sé gott innlegg í umræðuna.  Óháð því hvaða afstöðu sem menn hafa til virkjana og álvera.  Myndin breytti engu um mína allt að því hlutlausu afstöðu.  En vakti mig til umhugsunar um marga fleti málsins.  Þar fyrir utan er myndin skemmtileg áhorfs. 

[Jens Guð, 12.4.2009 kl. 01:43]

  Gunnar, ég veit ekkert um þannan John Perkins.  Mér stendur slétt á sama um skoðanir hans á 11.  sept.  Ég er ósköp lítið áhugasamur um vangaveltur varðandi það dæmi.  Skoðanir hans og kenningar um Ísland hafa ekkert með það að gera.  Ég meðtek skoðanir hans ekki sem neins "gúrús".  Það er allt í lagi að þær séu með í púkkinu.  Ég veit bara ekkert hver þessi náungi er.  Og er alveg sama.  Í fljótu bragði virðist mér sem hann sé froðusnakkur sem er talar í klisjum án mikillar þekkingar.  Annars veit ég ekkert um það.  Þar fyrir utan hef ég enga sannfæringu eða sterka skoðun á virkjunum eða álverum.  Mín pólitík snýr að baráttu gegn kvótakerfinu og gegn aðild Íslands að ESB. 

[Jens Guð, 12.4.2009 kl. 01:45]

  Já,  og gegn mútum og annarri spillingu.

[Jens Guð, 12.4.2009 kl. 01:47]

  Allt uppi á borðum og gegnsætt.

[Árni Gunnarsson, 12.4.2009 kl. 13:50]

Hvaða veruleiki er skrumskældur í Draumalandinu og hvernig? Reyndar tekur þessi mynd nokkuð föstum tökum þann veruleika sem margir lifðu í og lifa enn í. Myndin sýnir hvernig skrumskældur veruleiki þessa fólks lítur út þegar hann hefur verið afklæddur sinni skrumskælingu.

Reyndar tekur Sigurður Gísli Pálmason framleiðandi myndarinnar þessi mál fyrir í löngu spjalli í Fréttablaðinu á laugardag. Ég spái því að margur góður sjálfstæðismaður loki blaðinu í fússi með bölvi og formælingum löngu áður en hann lýkur við þetta viðtal. Þessi hugvekja hans Sigurðar Gísla er merkilegasta innlegg í þjóðmálaumræðu okkar svo langt sem ég man.  

[Gunnar Th. Gunnarsson, 12.4.2009 kl. 18:26]

Verslunarveldið í Reykjavík hefur lengi verið á móti allri uppbyggingu utan höfuðborgarsvæðisins og stutt áráður umhverfissamtaka með ráðum og dáð. Það samræmist ekki hagsmunum þeirr sem byggðu Smáralind og stækkuð Kringluna, að búsetuþróuninni verði snúið við. Útreikningar þeirra sem fjárfestu í öllu þessu mikla verslunarhúsnæði, miðast við að tiltekin fjölgun verði á svæðinu. Allt sem stefnir þeirri þróun í hættu, skekkir þá arðsemisútreikninga sem gerðir voru fyrir þessa verslunar grossera.

[Árni Gunnarsson, 12.4.2009 kl. 19:51]

Núna skil ég hugtakið "stjórnmálaskýrendur"....í það minnsta að hluta.

[Ólafur Ingólfsson, 12.4.2009 kl. 22:52]

Kveðjur frá gömlum vinnufélaga í Straumsvík

[Jens Guð, 12.4.2009 kl. 23:45]

  Árni,  það er margt til í þessu hjá þér.  Eins og venjulega.  Ég hef fylgst með börnum Pálma í gegnum tíðina.  Ég kynntist þessum sveitunga okkar lítilllega og mömmu hans á Hofi.  Og stend í þeirri trú að Pálmi hafi verið nokkuð merkilegur maður.  Síðar handskrifaði ég auglýsingar fyrir Sigurð Gísla.  Þá var hann frjálshyggjumaður og virkur í starfi Sjálfstæðisflokksins. 

  Gunnar,  kannski er eitthvað til í þessu hjá þér.  Veit það ekki.  Ég tel mig þó merkja að börn Pálma hafi sterkar taugar til landsbyggðarinnar.  Ein dóttir Pálma á heimili í Skagafirði og hefur reynst Hofsósingum höfðingi með því að gefa þeim sundlaug.  Tengdafaðir hennar,  Jóhannes í Bónusi,  er búsettur á Akureyri og hefur reynst örloátur á styrki til Akureyringa.

[Jens Guð, 12.4.2009 kl. 23:47]

  Heill og sæll,  Óli minn gamli vinur og vinnufélagi.  Gaman að heyra frá þér.  Það var oft líf og fjör hjá okkur í gamla daga.  Nú ætla ég að fylgjast með blogginu þínu.