Upprifjun á spennandi og áhugaverðum skoðanakönnunum

 

 

  Ég byrjaði að blogga fyrir tveimur árum.  Á dögunum fékk ég ósk frá bókaútgefanda um að nokkrar gamansögur af blogginu mínu verði birtar sem kafli í bók.  Það er bara gaman.  Og reyndar ekki í fyrsta skipti sem gamansögur af blogginu mínu koma út í bók.  Í fyrra kom út frábær bók um Önnu frænku mína frá Hesteyri,  Ég hef nú aldrei verið algild.  Þar eru nokkrar upprifjanir mínar af samskiptum við Önnu sem höfðu birst á blogginu.

  Vegna kaflans í væntanlegri bók fletti ég upp á gömlum bloggfærslum.  Þar rakst ég á fyrstu skoðanakannanir sem ég setti upp á blogginu.  Það er gaman að rifja þær upp.

  Fyrsta skoðanakönnun var um John Lennon og Paul McCartney.  Spurt var hvor væri í meiri metum.  Sjálfur tók ég fram að ég geri ekki upp á milli þessara manna.  Þeir eru í sama uppáhaldi hjá mér:  Sem frábærir lagahöfundar,  söngvarar og túlkendur.  Báðir mistækir en jafn miklir snillingar fyrir því þegar best hefur látið. 

  Það kom mér á óvart að strax í upphafi skoðanakönnunarinnar var hlutfallið þannig að 70% kusu Lennon og 30% McCartney.  Þetta hlutfall hélst óbreytt fram yfir 1000 greidd atkvæði.

  Í næstu könnun var spurt um hvor hljómsveitin væri merkilegri;  Bítlarnir eða The Rolling Stones.  Niðurstaðan breyttist ekkert frá upphafi til 455 greiddra atkvæða:

  Bítlarnir 62,4%,  The Rolling Stones 25,7% og 11,9% voru mér sammála um að gera ekki upp á milli þessara hljómsveita.

  Í þriðju skoðanakönnuninni spurði ég hver væri besta/merkasta hljómsveit íslensku rokksögunnar.  Ég forvann könnunina með því að ræða við 30 manna hóp tónlistaráhugamanna.  Hjá þeim fékk ég uppástungur um líklega sigurvegara í svona könnun.  Þegar til kom sat ég uppi með um 30 nöfn.  Þá hófst niðurskurður í samvinnu við þessa sömu sem ég hafði rætt við.  Takmarkið var að þrengja hringinn niður í eins fá nöfn og hægt væri.  Að lokum stóðu uppi 8 nöfn sem ég stillti upp í formlega skoðanakönnun.

  Nánast frá upphafi mynduðust þau úrslit sem urðu endanleg. 

  Ég miðaði við að úrslit væru klár þegar 500 atkvæði hefðu verið greidd.  Þegar 547 atkvæði höfðu verið greidd urðu úrslitin þessi:

1.  Trúbrot 24,8%

2.  Utangarðsmenn 19,8%

3.  Sigur Rós 16,9%

4.  Sykurmolarnir 12,1 %

5.  Gyllinæð 10,6%

6.  Þeyr 8,8%

7.  Ham 5,0%

8.  Mínus 2,0%

Athugasemdir

[hilmar jónsson, 24.5.2009 kl. 00:18]

Þeyr eru stórlega vanmetnir í þessari könnun.

[Ómar Ingi, 24.5.2009 kl. 00:22]

Þeyr vanmetnir og það eru Sigur Rós líka sem áttu að vinna þessa könnun.

[Jens Guð, 24.5.2009 kl. 00:47]

  Hilmar,  það er þetta með Þeysara.  Aldeilis frábær hljómsveit.  Það kemur skýrt fram í myndinni  Rokk í Reykjavík.  Þar taka Þeysarar af öll tvímæli um að hljómsveitin var samkeppnishæf á alþjóðamarkaði. 

  Persónulega þykir mér 6. sætið vera töluvert neðar en hljómsveitin á skilið.  Líka þó ég líti framhjá því að sumir liðsmanna Þeysara eru góðir vinir mínir.

  Hvar nákvæmlega ætti að staðsetja hljómsveitina met ég hana eiga heima ekki neðar en vera á meðal 3ja - 4ra merkustu hljómsveita.  Skekkjumörkin eru þau að Þeysarar skoruðu ekki hátt á vinsældalistum og starfaði ekki mjög lengi.   

[Jens Guð, 24.5.2009 kl. 00:54]

  Ómar Ingi,  ég er nokkuð sammála þér.  Þannig lagað.  Á hinn bóginn er ég það mikið eldri en þú að ég man eftir innkomu Trúbrots.  Það var sprengja.  Ég segi ekkert neikvætt um Sigur Rós.  Sú hljómsveit er hátt skrifuð hjá mér.  Engu að síður kom mér ekki á óvart að Trúbrot næðí toppsætinu.  Þetta var fyrsta svokölluð "súpergrúppa" Íslands,  stofnuð upp úr tveimur vinsælustu hljómsveitum landsins,  Hljómum og Flowers.  Og stóð undir væntingum framan af.

[Ómar Ingi, 24.5.2009 kl. 01:14]

TAKK  Jens  

Trúbrot var líka snilldarband.

[Jens Guð, 24.5.2009 kl. 02:29]

Ómar Ingi,  Trúbrot var svakalega flott hljómsveit á sínum tíma.  Dæmið var þannig:  Hljómar voru toppurinn.  Þeir voru íslensku Bítlarnir.  Þvílíkt vinsælir og lögin með Hljómum toppuðu alla vinsældalista.  Reyndar voru plötur Hljóma rólegar ballöðuplötur í samanburði við Hljóma á sviði.  Flowers komu til sögunnar sem vel spilandi greddu rokksveit.  Mun rokkaðri og krafmeiri en Hljómar.

  Þegar þessar tvær hljómsveitir sameinuðust í Trúbroti varð algjör uppstokkun.  Á hljómleikum bauð Trúbrot upp á krákur (cover) frá Led Zeppelin og annað sem hæst bar á þeim tíma.  Þetta var mikið og spennandi ævintýri.  Trúbrot,  eins og Hljómar áður,  var miklu flottari hljómsveit en plötur þeirra skiluðu.    

[Tobbi (IP-tala skráð) 24.5.2009 kl. 09:40]

Ekki kemur á óvart að þú fáir boð um að birta sögur af bloggi á bók.  Hvorttveggja er að sögurnar eru skemmtilegar og þar að auki vel sagðar.  Og svo þykir mér, svona sem fagmanni, sérstaklega gaman að sjá málfarið á blogginu hjá þér. Þú hefur lært móðurmálið ósvikið í Hjaltadalnum og undirstaðan heiman að og frá Svönu frá Neðra-Ási er traust.  Svona menn ættu auðvitað að gerast rithöfundar, öðrum til fyrirmyndar og eftirbreytni. en ekki verja ævi sinni í að selja ávaxtaflutningabáta, þótt það sé í sjálfu sér góðra gjalda vert. 

Libbðu heill

[Linda Linnet Hilmarsdóttir, 24.5.2009 kl. 13:29]

Innlitskvitt og kveðjur....:)

[Jens Guð, 24.5.2009 kl. 15:52]

  Tobbi,  það er gaman að fá svona umsögn frá fagmanni.  Bestu þakkir fyrir. 

[Jens Guð, 24.5.2009 kl. 15:54]

  Linda mín,  knús á þig.

[Drulluhali (IP-tala skráð) 31.5.2009 kl. 12:47]

Engum af thessum hljómsveitum á ad heyrast í, í útlöndum.  Skömm af thessu öllu saman.  Eini íslendingurinn sem stenst listraenar kröfur erlendis er Jóhanna Gudrún.  Hún getur nefninlega sungid. 

OJ BARA...Trúbrot OJ OJ OJ....ekki minnast á thá hljómsveit óaelandi!