Samanburður á listum yfir bestu íslensku plöturnar - og fleiri vangaveltur

  Ég er drjúgur yfir að hafa í síðustu færslu spáð rétt til um 3 efstu sætin á listanum yfir bestu íslensku plöturnar sem var opinberaður á rás 2 í dag.  Jafnframt var ég sjóðheitur í spánni um plötuna í 4.  sæti.  Hún lenti í 6.  sæti.  Það er innan skekkjumarka. 

  2001 stóð Dr.  Gunni fyrir samskonar leit að bestu íslensku plötunum.  Þann lista birti hann í bókinni  Eru ekki allir í stuði?.  Ég lék sama leik 1983 og birti í Poppbókinni.  Það er gaman að bera þessa misgömlu lista saman.  Sumar plötur halda svipaðri stöðu.  Aðrar verða heitari með hverju ári á meðan staða nokkurra fer kólnandi.

  Staða platnanna í bók Dr.  Gunna er í fremri sviganum og staðan í  Poppbókinni  er í seinni sviganum.  Í  Poppbókinni  náði listinn aðeins yfir 25 bestu plöturnar.  Það skýrir að nokkru hvers vegna sumar plötur neðar á listanum komust ekki á blað þar.  Margar aðrar plötur á listanum í dag voru ekki komnar út fyrir 26 árum.   

  Til frekari glöggvunar eru þær plötur auðkenndar með rauðum lit sem halda sinni stöðu eða hækka á listanum.  Plötur sem falla um meira en 10 sæti eru auðkenndar með bláum lit.

  Á rás 2 kom fram að Morgunblaðið hafi staðið fyrir leit að bestu íslensku plötunni fyrir nokkrum árum.  Því miður hef ég þann lista ekki undir höndum.

1. (1)   (-)   Ágætis byrjun - Sigur Rós  1999
2. (5)   (4)   Lifun – Trúbrot  1971
3. (3)   (1)   Á bleikum náttkjólum - Megas & Spilverk þjóðanna   1977
4. (12) (23) Hinn íslenzki Þursaflokkur – Þursaflokkurinn   1978
5. (4)   (3)   Sumar á Sýrlandi – Stuðmenn   1975
6. (2)   (-)   Debut – Björk   1993
7. (13) (-)  Gling-Gló - Björk Guðmundsdóttir & Tríó Guðmundar Ingólfssonar   1990
8. (7)   (2)  Ísbjarnarblús - Bubbi Morthens   1980
9. (-)   (-)  Með suð í eyrum við spilum endalaust – Sigur Rós   2008  
10. (11) (9)  Sturla - Spilverk þjóðanna   1977
11. (-)   (-)  Me And Armini - Emilíana Torrini   2008
12. (16) (-)  Hana nú - Vilhjálmur Vilhjálmsson   1977
13. (-)   (-)  Fisherman's Woman - Emilíana Torrini   2004
14. (10) (-)  Life's Too Good – Sykurmolarnir   1988
15. (8)   (-)  Með allt á hreinu – Stuðmenn og Grýlurnar   1982
16. (30) (-)  Einu sinni var – Vísur úr Vísnabókinni - Björgvin Halldórsson og Gunnar Þórðarson   1976
17. (29) (-)  Lög unga fólksins – Hrekkjusvín   1977
18. (9)   (-)  Kona - Bubbi Morthens   1985
19. (-)   (-)  Mugimama is this monkeymusic – Mugison   2004
20. (-)   (-)  Takk - Sigur Rós   2005
21. (7)   (7)  Geislavirkir – Utangarðsmenn   1980
22. (28) (-)  Í gegnum tíðina - Mannakorn    1977
23. (39) (-)  Jet Black Joe - Jet Black Joe    1992
24. (21) (-)  Hljómar - Hljómar    1967
25. (36) (-)  Loftmynd - Megas   1987
26. (-)   (-)  Mugiboogie – Mugison   2007
27. (-)   (-)  Bein leið - KK Band   2003
28. (24) (-)  Þursabit - Þursaflokkurinn   1979 
29. (17) (-)  Megas - Megas   1972
30. (23) (12) Breyttir tímar - Egó   1982
31. (22) (-)  Tívolí - Stuðmenn   1976
32. (18) (13) Rokk í Reykjavík – Ýmsir   1982
33. (-)   (-)  Allt fyrir ástina - Páll Óskar   2007
34. (25) (10) Mjötviður mær – Þeyr   1981
35. (27) (-)  Kafbátamúsík - Ensími   1998
36. (20) (-)  Post - Björk   1995
37. (52) (-)  Mannakorn – Mannakorn   1975
38. (-)   (-)  Hljóðlega af stað – Hjálmar   2004
39. (14) (-)  Lengi lifi - Ham   1996
40. (41) (-)  Í mynd - Egó   1982 
41. (-)   (-)  Hjálmar - Hjálmar   2005
42. (-)   (-)  Spilverk þjóðanna - Spilverk þjóðanna   1975 
43. (-)   (-)  Systkinin syngja saman - Elly Vilhjálms og Vilhjálmur Vilhjálmsson   1969
44. (15) (-)  Homogenic - Björk   1997 
45. (38) (-)  Millilending - Megas   1975
46. (40) (18) Ekki enn - Purrkur Pillnikk   1981 
47. (-)   (-)  Halldór Laxness - Mínus   2003 
48. (66) (-)  Trúbrot - Trúbrot   1969
49. (34) (-)  Todmobile - Todmobile   1990 
50. (-)   (-)  Sleepdrunk Seasons - Hjaltalín   2008 
     

  Athygli vekur að plöturnar í 30 efstu sætunum á lista Dr.  Gunna eru allar á þessum lista nema tvær.  11 af 23 efstu plötunum í  Poppbókinni  eru sömuleiðis á listanum þrátt fyrir allan þann fjölda platna sem bæst hafa í hópinn á þessum rösklega aldarfjórðungi.  Af 7 plötum sem falla mest voru aðeins 2 í Poppbókinni.

  Elsta platan er frá 1967,  Hljómar.  Þær eru bara 3 plöturnar frá þeim áratug.  Ég einkenni tímabilið '67 - '79 með grænu ártali (15 útgefnar ´71 - ´79).  1980 urðu afgerandi kaflaskipti og uppstokkun í íslenskri músík.  Tímabilið ´80 - ´99 er einkennt með bleikum ártölum (20 plötur).  Það eru engar plötur frá árunum 2000 - 2002 á listanum.  Yngri plötur eru einkenndar með blásvörtum ártölum (12 plötur).  Að óreyndu hefði mátt ætla að mun fleiri plötur væru frá síðustu árum.  Þær eru fólki í ferskara minni,  jafnframt því sem yngra fólk þekkir eðlilega síður til eldri platna. 

  Þegar ártöl eru skoðuð betur kemur í ljós að gjöfulustu tímabil sem skila plötum á þennan lista eru annarsvegar ´75 - ´77 (11 plötur) og hinsvegar ´80 - ´82 (8 plötur).

  Gaman væri að heyra skoðun ykkar á niðurstöðu listans og þeim plötum sem eru á upp- eða niðurleið.  Sjálfur er ég alsáttur við plöturnar í efstu sætum listans og nokkuð sáttur við listann í heild.  Þar undanskil ég að mér þykir leiðinlegt að sjá lækkandi stöðu flestra þeirra platna sem síga mest.

Athugasemdir

[Kristján Sverrisson (IP-tala skráð) 18.6.2009 kl. 08:56]

Sæll Jens

Til hamingju með getspeki. Ég er rúmlega fimmtugur músikfíkill og auðvitað mótast skoðanir manna af þeim tímabilum sem þeir eiga sín þroskatímabil etc. Ég er býsna sáttur við niðurstöðu þessarar könnunar og fátt sem kemur á óvart. Þegar litið er yfir þróun þessara lista þá sér maður t.d. að þeir sem vinsælastir eru hverju sinni skora hátt en síga síðan í sumum tilvikum eftir sem árin líða. Þannig mun söguskoðun eflaust þoka t.d. Sigurós og Emiliönu eitthvað niður á við eftir 5-10 ár líkt og við getum séð að Björk hefur mátt sjá sumar sinna platna síga niður (og jafnvel Bubbinn). Ekkert undarlegt við það og þó að ég telji t.d. fyrstu plötu Sigurósar tímamótaverk og eins 1-2 plötur Bjarkar, þá get ég ekki talið öll verk þessara listamanna til bestu platna Íslandssögunnar.

Skemmtileg dægradvöl og eflaust munu menn slást um útkomuna um ókomna tíð en ég tel sem sé að eftir því sem árin líða sjáum við "hlutlausari" sýn á bestu plöturnar, sumar festi sig endanlega í sessi en aðrir minni spámenn þokist burt (Páll Óskar, tímamót hvað?). Sjáum hvað næsti áratugur færir okkur.

kveðja, Kristján Sverrisson

[Ólafur Björnsson, 18.6.2009 kl. 10:47]

Sæll Jens, skemmtilega færsla hjá þér að vanda og frábær samanburður.

Ég er persónulega nokkuð sáttur við niðurstöðuna. Sérstaklega er ég sáttur við að bestu plötur Bjarkar séu á topp 10 en ekki einhverjar "fígúruplötur" með henni.

Ef ég á að setja út á eitthvað (að Íslendingasið) þá finnst mér það ekki eiga við að þarna séu fjórar eins árs plötur. Mér finnst að plötur verði að vera orðnar nokkurra ára gamlar og búnar "að sanna sig". Eflaust ekki allir sammála því. Umræddar plötur eru hins vegar allar frábærar, en spurningin er hvort einhverjum muni finnast þær góðar eftir 10-15 ár. Svo getur allt eins verið að þær séu bara allar instant classic.

Hefði viljað sjá Sturlu, Þursabit og Kafbátamúsík ofar og Deluxe með Nýdönsk inni á listanum. 

Annars góður.

[Stefán (IP-tala skráð) 18.6.2009 kl. 14:51]

Lifun - Á bleikum náttkjólum - Sumar á Sýrlandi eru þrjú meistaraverk sem eru svo rótgróin í 5 efstu sætunum, að þeim verður varla haggað þaðan á næstunni. Enda eru Trúbrot - Meistari Megas - Spilverk Þjóðanna og Stuðmenn = Beatles - Bob Dylan - Rolling Stones og Beach Boys hvað barðar gæði bestu platna viðkomandi sem einoka efstu sæti svona lista erlendis.

[Dunni, 18.6.2009 kl. 16:29]

Ég segi nú bara hellvíti.   Sigur Rós eyðilagði allt fyrir mér.  Ef sú hljómsveit hefði ekki plantað sér í efsta sætið, með sína hundleiðinlegu plötu, hefði ég verið með 5 efstu réttar.  Reyndar hafði ég Þursaflokkin fyrir ofan Lifun í þetta sinn. En sú röðun varíerar alltaf mikið hjá mér.

MIg minnir reyndar að röðin sem ég valdi sé nokkurn veginn sú sama og ég valdi bókinni þinni góðu hér um árið.  Hef hana því miður ekki við hendina þar sem hún er í kössum í geymslunni með LP plötunum mínum.  Hef bara ekki pláss fyrir allar mínar bækur og plötur sem þó eru farnar að týna tölunni. 

[Jens Guð, 18.6.2009 kl. 21:33]

  Kristján,  við erum á líkum aldri.  Það er rétt hjá þér að þeir sem eru vinsælastir og mest áberandi þegar svona listi er unninn njóta þess.  Þegar frá líður fara menn að sortera plötur þeirra meira.

  Þegar ég vann listann 1983 lentu flestar plötur sem Bubbi hafði þá gefið út á listanum.  Á þeim 26 árum sem liðin eru hefur sú breyting orðið á að Bubbi er búinn að senda frá sér um 100 plötur og tvær af sólóplötunum,  Ísbjarnarblús og Kona,  eru farnar að standa upp úr.  Á sama tíma eru plötur hans með Utangarðsmönnum og Egói að síga.  Engu að síður er glæsilegur árangur hjá þessum jafnaldra okkar að eiga 5 af 40 bestu plötunum og verulega hlutdeild í  Rokk í Reykjavík  að auki.

  Þeyr og Purrkurinn áttu 3 plötur hvor á listanum 1983.  Núna röskum aldarfjórðungi síðar eiga þær 1 plötu hvor á listanum.

[Brynjar Davíðsson, 18.6.2009 kl. 21:43]

Já Flott færsla og er í raun ekki alveg búin að klára að fara yfir hana.En Okkur félögunum í hljómsveitinni Best Fyrir sárnaði svo að SigurRós hafi ekki getað svarað því hvaða band spilaði undir í hans síðasta útgefna lagi,að við erum ósámmala því að þeir séu efstir,þar á lifun... auðvitað að vera.

Já alveg grínlaust þá finnst okkur lifun... einfaldlega eiga toppsætið skilið.

Kv. að norðan

Binni D

[Jens Guð, 18.6.2009 kl. 21:43]

  Ólafur,  takk fyrir góð orð.  Það kemur mér á óvart að Ný dönsk sé ekki á listanum.  Ég óttaðist að  Kafbátamúsík  með Enzími næði ekki inn á listann að þessu sinni.  En mér til gleði heldur hún stöðu sinni nokkurn veginn.

[Brynjar Davíðsson, 18.6.2009 kl. 21:45]

Þessi hann er auðvitað Rúni Júl....

[Jens Guð, 18.6.2009 kl. 21:58]

  Stefán,  ég er ekki minna heillaður af  Ágætis byrjun  en  Lifun  og  Á bleikum náttkjólum.  Ég flutti pistil um  Á bleikum náttkjólum  á rás 2 þegar verið var að kynna tilnefndar plötur.  Á hinn bóginn hef ég aldrei dregist að Stuðmönnum.  Engu að síður átta ég mig á því hvað margir söngvar þeirra eru grípandi og margir textar hnyttnir.  Sömuleiðis viðurkenni ég alveg að Stuðmenn séu kallaðir "hljómsveit allra landsmanna".  - Þrátt fyrir að músíkin höfði ekki til mín.  Aftur á móti er ég hrifinn af mörgu sem liðsmenn Stuðmanna hafa gert á öðrum plötum.

[Jens Guð, 18.6.2009 kl. 22:04]

  Dunni,  ég er með listann þinn frá því fyrir 26 árum.  Hann var svona:

1.  Sumar á Sýrlandi - Stuðmenn

2.  Drög að sjálfsmorði - Megas

3.  Breyttir tímar - Egó

4.  Lifun - Trúbrot

5.  Nafnakall - Guðmundur Ingólfsson

6.  Langspil - Jóhann G. Jóhannsson

7.  Á bleikum náttkjólum - Megas og Spilverk þjóðanna

8.  Tívolí - Stuðmenn

9.  Svif - Björn Thoroddsen

10. Lizt - Bara-flokkurinn

[Jens Guð, 18.6.2009 kl. 22:15]

  Brynjar,  það er eiginlega komin hefð á að 2.  sætið sé aðal málið,  samanber fárið í kringum boltaleik nokkurra Íslendinga í Kína og raul íslenskrar barnastjörnu í Evróvisjón.  Krafa um að allir sem lenda í 2.  sæti fái fálkaorðu hefur verið hávær.

[Sveinn (IP-tala skráð) 18.6.2009 kl. 22:43]

Það er ljúft að skoða þetta svona upp sett með litaskiptingum, árgangi og alles.

[Jens Guð, 18.6.2009 kl. 23:21]

  Sveinn, til þess er leikurinn gerður.  Mér þykir svo óskaplega gaman að velta svona listum fyrir mér,  spá og spekúlera,  að ég taldi ekki eftir mér að eyða löngum tíma í að dunda í þessu dæmi,  finna öll ártöl og svo framvegis.  Það er bónus á skemmtunina að fleiri hafi gaman af að skoða þetta og pæla í þessu.

[Davíð (IP-tala skráð) 19.6.2009 kl. 01:59]

Meiriháttar þakkarvert að fá þetta uppsett á þennan máta.  Heildarmyndin er meiriháttar skoðunarverð. 

[Jens Guð, 19.6.2009 kl. 02:06]

  Davíð,  þetta er sett upp eins og mér þykir gaman að skoða dæmið. 

[KALLI (IP-tala skráð) 19.6.2009 kl. 20:49]

hvar er Bísar í Banastuði sem var algerlega fáránlega góð plata

[Jens Guð, 19.6.2009 kl. 23:38]

  Anna,  sem öfga músíkdellukall hef ég komist að því að engar tvær manneskjur hafi nákvæmlega sama músíksmekk.  Ég hef kynnst mörgum manneskjum sem eru áhugasamar um flesta þá tónlistarmenn er ég hlusta mest á.  Við nánari kynni kemur alltaf - án undantekningar - í ljós að vikomandi hefur dálæti á einhverri plötu sem ég þoli alls ekki.

  Einn landsþekktur vinur minn hefur aðdáunarverða afstöðu til músíkur.  Hann er nokkru eldri en ég og hefur aldrei slakað á að leita uppi nýja og spennandi músíkstrauma. Hann er miklu áhugasamari mér og duglegri að leita stöðugt að nýmúsík.  Ekkert rokk er nógu hart,  þungt eða hávært til að draga úr áhuga hans.  Enginn djass er nógu tilraunakenndur og furðulegur til að stoppa hann.  Ég dáist að ástríðu hans og óslökkvandi þorsta í nýja músík.  Í hvert sinn sem ég hitti hann er hann uppfullur af hljómsveitanöfnum sem ég þekki ekki.

  Lengi vel var ég nálægt því að standa í trú um að þessi maður væri með hinn fullkomna músíksmekk.  Þá kom í ljós að hann er forfallinn aðdáandi Whitney Houston!  Söngkonu sem ég hef óþol gagnvart og fæ flogakast í hvert sinn sem ég heyri músík af hennar tagi.

  Af orðum þínum ræð ég að þú sért ekki inni á Sigur Rósar og Trúbrotslínunni.  Á móti vegur að þú skulir eiga Ísbjarnarblús,  Lög unga fólksins,  plötur með Þursum og kunnir að meta Spilverk og Megas.

  Ég kveiki ekki á perunni varðandi söng um ósamkomulag þjóðar og þín.

[Jens Guð, 19.6.2009 kl. 23:45]

  Kalli,  það er margt flott á  Bísar í banastuði.  Til að mynda lögin  Samviskubit  og  Rokk er betra en full time djobb.  Vandamálið er að platan hefur ekki komið út á disk.  Fyrrnefnda lagið á ég samt á safndisk sem Andrea Jóns tók saman og gaf út fyrir nokkrum árum.

  Hin platan með Kamarorgestunum er einnig ágæt en hefur heldur ekki verið gefin út á disk.  Liðsmenn Kamarorghesta ættu að henda þessum plötum út á diskum.  Það er ekkert mál að endurútgefa svona plötur á diskum.  Sáralítill kostnaður sem skilar sér til baka strax í fyrstu dreifingu.

[doddý, 27.6.2009 kl. 21:53]

já hvar eru bísar í banastuði? þeir voru bannaðir á rúv með "bíttírassgatiðáðér", hreint frábært band. manni hitnar í höndum þegar lísapáls er í útvarpi. kv d

[doddý, 27.6.2009 kl. 21:56]

ég meinti sko að lagið hafi verið bannað. en kamarorghestar voru hreint frábært band ;) kv d