Frábærir færeyskir fjölskyldudagar á Stokkseyri

  Um verslunarmannahelgina voru í fyrsta skipti haldnir færeyskir fjölskyldudagar á Stokkseyri.  Þessi frumraun tókst einstaklega vel.  Alla helgina var boðið upp á þétt pakkaða fjölbreytta dagskrá frá morgni til klukkan 3 eða 4 að morgni.  Fjöldi færeyskra tónlistarmanna skipti á milli sín prógrammi sem spannaði allt frá klassískri músík,  þjóðlagamúsík og harmónikkuleik til popp- og rokkmúsíkur,  færeyskum hringdönsum og dagskráin spannaði einnig bryggjuball,  varðeld,  glæsilega flugeldasýningu og ótal viðburðum;  málverkasýningum,  mörkuðum með íslensku handverki og ýmsu því sem í boði er á Stokkseyri:  Draugasetri,  álfa- og tröllasetri,  kajakróðri,  fótboltakeppni og svo framvegis.  Hægt er að finna dagskrána á www.stokkseyri.is.

  Aðsókn var vonum framar.  Á sunnudagsmorgni voru 1500 manns á tjaldstæði Stokkseyrar.  Sumarbústaðir,  gistiheimili á Stokkseyri og Selfossi voru líka þéttsetin.  Mörg heimili á Stokkseyri voru gestkvæm,  ef ráða má af bílum þar fyrir utan og tjöld í görðum.  Margir komu einnig af suðvesturhorninu án þess að gista á Stokkseyri yfir nótt. 

  Það er illmögulegt að slá á tölu gesta þegar mest lét.  Sumir giskuðu á 700 manns umfram gesti á tjaldstæði.  Aðrir töldu nær lagi að ætla 1000 - 1500 manns hafa mætt á svæðið umfram þá sem voru á tjaldstæðinu.  Ég ætla ekki að fara í þann talnaleik að búa til stærstu hugsanlega tölu.  Læt nægja að fullyrða að gestafjöldi hafi verið eitthvað á þriðja þúsundið.  Ég get staðið við þá tölu með góðri samvisku.

  Góð vísbending um fjölda gesta er að veitingastaðurinn Við fjöruborðið afgreiddi 800 skammta af humri á laugardeginum og yfir 700 skammta á sunnudeginum.

  Mestu skiptir að allt fór fram eins og best var á kosið.  Glaðværð og ánægja réði ríkjum alla helgina.  Ekki svo mikið sem til ágreinings kom á milli neinna.  Bara skemmtun frá A-Ö.  

  Á morgun geri ég betur grein fyrir dagskránni og hápunktum hennar.

  Ljósmyndin hér fyrir ofan er tekin af færeysku fréttasíðunni www.portal.fo (http://www.portal.fo/leit.php?lg=63578).  Á henni er kær frændi okkar Jógvans, hinn frábæri Sverrir Sævarsson (Sverrissonar söngvara Spilafífla,  Egó,  Gal í Leo,  Roðlaust og beinlaust...).

       

Athugasemdir

[Steingrímur Helgason, 5.8.2009 kl. 00:17]

Í viðzkiptum er ein góð regla til að muna að allir heildzalar hafa ekki zamwizku & því ber ekki að taka þá marktæka með tölur.  En vona & trúi að þarna hafi verið góð zkemmtun með vinum okkar & frændum úr Fjáreyjum.

Humarveiðar Fjáreyjínga eru náttla fyrir þeim týndur gripur zem zakleyzi þeirra er á Horn í Habbnarfirði voru zendir í texta Raufarhafnarzkáldzins.  Mázke fá trollarar þeirra einn & einn hala á grunnzlóð Grænlendínga, en lítt er þetta nú þjóðarréttur þeirra.

Var ekki í boði grind & zpek, ræztizteik, nú eða zkerpukjöt ?

Kvuzzlagz...

[viðar (IP-tala skráð) 5.8.2009 kl. 09:59]

Sæll vinur, efa ekki að þetta hafi tekist vel til. Enda gott úrval listamanna þarna á ferðinni. Ég varð aftur á móti þeirrar gæfu aðnjótandi að vera á þjóðlagahátiðinni á Siglufirði nú í sumar. Það er þó festival sem á skilið meiri athyggli heldur en hún yfirleitt fær. Ég náði að fara á 8 tónleika hverjum öðrum betri og fjölbreittari, er nokkuð ljóst að Siglufjörður kemur sterkt inn á næsta ári þegar það sumarfrí verður planað.

[Ómar Ingi, 5.8.2009 kl. 22:26]

Gott Gott

[Ingvar Valgeirsson, 8.8.2009 kl. 14:58]

Var Sævar Sverris í Egó?

[Jens Guð, 8.8.2009 kl. 16:04]

  Steingrímur,  í undirbúningi að færeyskum dögum á Stokkseyri var meistarakokkurinn Birgir Enni (bróðir Brands) með í pakkanum.  Hann ætlaði að bjóða upp á úrval af færeyskum mat.  Ég veit ekki hvers vegna Birgir helltist úr lestinni.  Það kom ekki verulega að sök því veitingastaðurinn Við fjöruborðið á Stokkseyri er einn sá besti á landinu.  Humarsúpan þar er toppurinn.

[Jens Guð, 8.8.2009 kl. 17:16]

  Heill og sæll,  Viðar.  Ég hef heyrt frá mörgum mikla ánægju með Þjóðlagahátíðina á Siglufirði í gegnum tíðina.  Meðal annars frá útlendum þátttakendum sem undrast hvað vel er staðið að málum og hvað hátíðin er veigamikil í sniðum.

[Jens Guð, 8.8.2009 kl. 17:17]

  Ómar Ingi,  takk fyrir innlitið.

[Jens Guð, 8.8.2009 kl. 17:27]

  Ingvar,  Sævar tók við af Bubba í Egói áður en hljómsveitin lagði upp laupana,  að mig minnir 1984.  Það fór ekki mikið fyrir hljómsveitinni þannig skipaðri en hún sendi þó frá sér eitt myndband sem fékk ágæta spilun í sjónvarpinu.