(Ó)heppinn innbrotsþjófur

  Í Færeyjum er ekki til siðs að læsa húsum.  Ekki einu sinni þegar heimilisfólk er fjarri til lengri tíma.  Tónlistarmaðurinn og plötuútgefandinn Kristian Blak læsti þó húsi sínu þegar hann fór ásamt fjölskyldu sinni til útlanda í nokkrar vikur.  Ástæðan var sú að geðveikur náungi hafði hótað og ofsótt Kristian um hríð.  Meðal annars hafði sá geðveiki gengið í skrokk á bíl mannsins í næsta húsi við Kristian.  Bílnum var lagt fyrir framan hús Kristians og ofbeldismaðurinn hélt að þetta væri bíll Kristians. 

  Kristian óttaðist að sá geðveiki kæmi inn í húsið,  myndi jafnvel setjast þar að og/eða skemma tölvur og fleira.  Húsinu,  sem er í miðbæ Þórshafnar,  var því kyrfilega læst.  Samt var brotist þar inn.  Sem er mjög einkennilegt.  Brotist inn í eina læsta húsið í Þórshöfn.  Innbrotsþjófurinn virðist hafa einungis farið inn í eitt lítið herbergi.  Þaðan stal hann glæsilegum ferðageislaspilara,  svokölluðum "gettó-blaster",  og bunka af geisladiskum sem þar stóðu hjá,  samtals 50 diskum. 

  Þegar Kristian og fjölskylda komu aftur heim frá útlöndum og uppgötvuðu innbrotið og þjófnaðinn gátu þau ekki varist brosi.  Diskana hafði Kristian komið með frá Noregi og átti eftir að fara með þá í Norræna húsið í Færeyjum.  Diskarnir innihéldu allir fornan söng Sama,  svokallað joik,  án undirleiks.  Það eru ekki margir utan Sama sem hlusta á svoleiðis sér til gamans.  Á myndbandinu hér fyrir neðan má heyra sýnishorn af því sem innbrotsþjófurinn hefur haft í eyrunum þegar hann fór að spila geisladiskana.

Athugasemdir

[Jóna Kolbrún Garðarsdóttir, 25.8.2009 kl. 00:38]

Tónlistin hljómaði ágætlega í mínum eyrum. 

[Jens Guð, 25.8.2009 kl. 01:08]

  Jóna,  ég á margar joik-plötur og setti fjögur joik-lög á plötuna  Rock from the Cold Seas  sem ég tók saman fyrir nokkrum árum.  Það er gaman að hlusta á joik í nútímalegum flutningi.  Margir joikarar eru heimsfrægir,  svo sem Wimme og Mari Boine Person.  Ég hef þó ekki þol fyrir heilli plötu með joiki án undirleiks.  Hvað þá 50 slíkum plötum. 

[SeeingRed, 25.8.2009 kl. 13:49]

Gaman að þessu

[Jens Guð, 25.8.2009 kl. 20:28]

  SeeingRed,  takk fyrir innlitið.  Ég kíki stundum á fræbæru Killing Joke myndböndin á blogginu þínu en hef ekki haft rænu á að kvitta fyrir innlit. 

[Hannes, 25.8.2009 kl. 20:45]

Aumingja þjófurinn að hlusta á þennan viðbjóð. Ef ég væri þjófurinn þá færi ég í mál við mannin sem ég rændi diskunum af og heimtaði eitthvað allmennilegt í staðinn.

[Ómar Ingi, 25.8.2009 kl. 20:58]

Úffff

[Jens Guð, 25.8.2009 kl. 21:34]

  Hannes,  það broslega við þetta er að á heimili Kristians Blaks var í öðrum herbergjum gott úrval af hinum fjölbreyttu diskum.  Kristian er aðal plötuútgefandi Færeyja og rekur að auki plötubúð.  Fyrir mig,  músíkdellukall,  er meiriháttar ævintýri að gramsa þar í þúsundum geisladiska.  Ég dvaldi á þessu heimili í 10 daga um páskana í fyrravor og var eins og krakki í sælgætisbúð.  Ég komst yfir að hlusta á aðeins örlítið brot af öllum þeim áhugaverðu diskum sem þar er að finna.  Fjölskylda Kristians var erlendis og við bara tveir í kotinu að gramsa í diskabunkunum.  Ég tímdi varla að eyða miklum tíma í svefn því það voru svo margir spennandi diskar þarna til að hlusta á.

  Blessaður innbrotsþjófurnn vissi greinilega ekki af þeirri gullnámu.  Hann liggur undir grun um að hafa verið fullur Íslendingur sem hafði ekki hugmynd um hver átti heima í þessu húsi.  Og sat fyrir bragðið uppi með 50 diska af joiki án undirleiks. 

[Jens Guð, 25.8.2009 kl. 21:35]

  Ómar Ingi,  þetta var ekki einu sinni el-house!

[Hannes, 26.8.2009 kl. 00:02]

Jens. hehe fyndið að ræna bara þessu drasli. Ég gæti vel trúað því enda Íslendingar margir hverjir þjófar og fyllibyttur.

[Jens Guð, 26.8.2009 kl. 00:24]

  Hannes,  ég tel mig muna rétt.  Fyrir nokkrum árum voru 27 innbrot/þjófnaðir skráðir í Þórshöfn.  Aðallega þjófnaður á áfengi úr bílum.  Af öllum þeim þjófnuðum sem upplýstust voru einungis Íslendingar og Grænlendingar gerendur.  Svo merkilegt sem það var þekkti ég í tveimur tilfella íslensku drullusokkana.  Sem hreyktu sér af hvað það var að stela áfengi úr ólæstum bílum.

[Jens Guð, 26.8.2009 kl. 00:26]

...hér vantaði orðið auðvelt...