Hvað er þetta með Skagfirðinga?

  Skagfirðingar eru ekki margir.  Bara örlítið brot af íslensku þjóðinni.  Samt eru fréttir fjölmiðlanna uppfullar af sigrum Skagfirðinga.  3 nýleg dæmi:  Eyþór Árnason sendi á dögunum frá sér bókina  Hundgá úr annarri sveit.  Bókin var umsvifalaust verðlaunuð með Bókmenntaverðlaunum Tómasar Guðmundssonar.

  Fyrir nokkrum dögum kusu júrivisjón aðdáendur í útlöndum lag eftir Óskar Pál Sveinsson besta júrivisjón-lag aldarinnar.  Áður var þetta sama lag búið að sigra önnur lög í undankeppni júrivisjón hérlendis. 

  Ungir strákar í hljómsveitinni Bróðir Svartúlfs skruppu suður til Reykjavíkur og tóku þátt í Músíktilraunum.  Aðrar hljómsveitir áttu ekki séns.  Bróðir Svartúlfs rúllaði Músíktilraunum upp.

  Á dögunum spreytti hópur vönustu sjósundskappa landsins sig í sundkeppni yfir Eyjafjörð.  Sigurjón Þórðarson skrapp frá Króknum og tók þátt án þess að hafa áður synt í sjó.  Leikar fóru þannig að Sigurjón var löngu kominn yfir fjörðinn og búinn að þurrka sér og klæða sig áður en þeir næstu náðu landi.

  Þannig mætti áfram telja í hið óendanlega.

Athugasemdir

[Gunnar (IP-tala skráð) 19.10.2009 kl. 09:15]

Er nokkuð eðlilegra!

[Tobbi (IP-tala skráð) 19.10.2009 kl. 10:07]

Teldu áfram.  Það er svo gaman að sjá yfirburði okkar Skagfirðinga og ég er ekki viss um að annarra sveita menn hafi gert sér grein fyrir snilld okkar.

[S (IP-tala skráð) 19.10.2009 kl. 10:39]

Ekki gleyma Geirmundi og Karlakórnum Heimi.

[Þorsteinn Briem, 19.10.2009 kl. 12:13]

Listinn yfir frægt fólk frá Dalvík er miklu lengri en þetta, Jensinn minn.

Tekur út yfir allan þjófabálk.

[Smjerjarmur, 19.10.2009 kl. 14:15]

Ekki gleyma kaupfélagsstjóranum á Króknum og málum Giftar.  Það er hugsanlega annað met. 

[Ásdís Sigurðardóttir, 19.10.2009 kl. 14:18]

Hefurðu skoðað listann yfir Húsvíkinga? forvitnilegur.

[Kristín Björg Þorsteinsdóttir, 19.10.2009 kl. 15:48]

Allt er þetta hið ágætasta fólk og ekkert við það að athuga. Og Eyþór er náttúrulega æði. En samt langar mig nú að kíkja aðeins norðar og austar - til Siglufjarðar. Snillingar upp til hópa sem þaðan koma.

[Árni Gunnarsson, 19.10.2009 kl. 15:59]

"Trú þú aldrei afasemdarmanninum, hann er þér óheill" sagði hann afi minn en hann var nú reyndar Hreppamaður.

Ég játa að þessar efasemdir um yfirburði okkar Skagfirðinga valda mér angri. Ég barasta skil ekki svona undarlegt fólk.

[Árni Gunnarsson, 19.10.2009 kl. 16:01]

..efasemdamanninum átti þetta nú reyndar að vera.

[Röggi (IP-tala skráð) 19.10.2009 kl. 18:13]

Lengi lifi Skagafjörður :)

[Jens Guð, 19.10.2009 kl. 20:58]

  Gunnar,  nei,  fyrir okkur sem þekkjum til er ekkert eðlilegra.

[Jens Guð, 19.10.2009 kl. 21:00]

  Tobbi,  ég held upptalningunni áfram síðar.  Leyfi landsmönnum að meðtaka þetta og melta í hóflegum skömmtun.

[Jens Guð, 19.10.2009 kl. 21:53]

  S,  ég gleymi hvorki Geirmundi né Heimi.  Og kannski ágætt að vekja athygli á að það var Karlakórinn Heimir sem kynnti til sögunnar sönglagið  Undir bláhimni.  Þetta hawaíska þjóðlag var margstolið af bandarískum poppurum og hnikað til undir nöfnum á borð við  Red River Valley  (Woody Guthrie og Arlo Guthrie) og  Red River Rock  (Johnny & The Hurricanes).  Þá tók Magnús á Vöglum sig til og orti við lagið söngtexann  Undir bláhimni.  Karlakórinn Heimir afgreiddi málið á plötu og stimplaði lagið inn í íslensku þjóðarsálina.  Það er fyrst og fremst góður kveðskapur Magnúsar sem gerði útslagið.

[Tobbi (IP-tala skráð) 19.10.2009 kl. 22:56]

Jens ertu viss um að Rauðárdalurinn og Bláhiminninn séu sama lagið?  Mér finnst þau ekkert sérlega lík! sbr. http://www.youtube.com/watch?v=2L8PnXV_xws&hl=is

Er enginn maðkur í mysunni á Vöglum?

[Jens Guð, 19.10.2009 kl. 23:12]

  Steini,  eitt er að vera frægur.  Annað að vinna til verðlauna á öllum sviðum.  Vissulega eru margir Dalvíkingar frægir.  Reyndar ótrúlega margir því Dalvíkingar eru ekki margir.  Ég hef fylgst vel með því.  Ekki aðeins vegna ættingja á Hæringsstöðum og systur á Uppsölum.  Heldur einnig vegna vina á borð við Júlíussyni í Q4U,  Kristján Eldjárn og hans ættingja,  Hjálmar Hjálmarsson leikara,  Matta í Pöpunum,  Snorra Sturluson,  Loga Bergmann og Svanhildi,  strákanna í Brain Police og svo framvegis.

  Þegar röðin kemur hinsvegar að verðlaunum og 1. sæti þá er röðin komin að Skagfirðingum.

[Steingrímur Helgason, 19.10.2009 kl. 23:16]

Eini merki 'Zkaffózkríllinn' er náttla sá mezt brottflutti, nefni þar Stephan G. sem að flúði þaðan rétt eftir fermíngaraldur, en fékk samt reista af sér styttu við þjóðveginn, & náttla þig & Áddna Reyk.

[Jens Guð, 19.10.2009 kl. 23:16]

  Já, og gleymum ekki Ragga "skjálfta" eða Sibbu Árnadóttur kærri frænku minni,  leikara,  leikstjóra og vitavini.

[Jens Guð, 20.10.2009 kl. 00:05]

  Smjérjarmur,  ég þekki ekki almennilega til þess máls til að tjá mig um það.

[Jens Guð, 20.10.2009 kl. 00:09]

  Ásdís,  ég veit um marga fræga Húsvíkinga.  En kannast ekki við að þeir hafi verið að raka saman verðlaunum eða 1. sæti á mörgum sviðum.  Samt ágætt fólk upp til hópa.  Ég ætti kannski að útvíkka upptalningnuna á Norðlendinga í víðustu merkingu?

[Árni Gunnarsson, 20.10.2009 kl. 00:09]

Steingrímur. Svona stytta eins og þessi þarna við Arnarstapann væri eiginlega ekkert fyrir mig. Ég er svo hlédrægur.

[Jens Guð, 20.10.2009 kl. 00:14]

  Kristín Björg,  ég tel Siglfirðinga næstum til Skagfirðinga.  Þangað sóttum við Skagfirðingar lengst af brennivín.  Og erum stoltir af Gylfa Ægis,  Þorvaldi Halldórs,  Gautum, Guðmundi "afa Bítlanna",  Hjálmari (man ekki hvers son hljómborðsleikara) en síður Steingrími Njálssyni. 

[Jens Guð, 20.10.2009 kl. 00:20]

  Árni,  ég er að reyna að fræða íslenskan almenning hægt og bítandi.

[Jens Guð, 20.10.2009 kl. 00:21]

  Röggi,  "Viva La Skagafjörður" eins og Spánverjar segja og Svandís systir.

[Jens Guð, 20.10.2009 kl. 00:30]

  Tobbi,  ég er búinn að hafa heilmikið fyrir að rekja  Undir bláhimni  aftur til hawaíska þjóðlagsins.  Ekki aðeins með því að bera saman laglínur og hljómagang heldur með því rekja með aðstoð mér fróðari manna aftur á bak tilurð  Red River Rock  og  Red River Valley.  Ef þú hægir á takti  Red River Rock  og setur í valstakt þá er dæmið komið.  Arlo Guthrie (sonur Woodys Guthries) hefur vottað það.

[Jens Guð, 20.10.2009 kl. 00:51]

  Til gamans má geta eftirfarandi:  Þegar Trúbrot hljóðritaði  Lifun  erlendis þá var Arlo Guthrie í sama hljóðveri.  Þeir Rúnar Júlíusson tóku tal saman.  Þeir náðu vel saman í áhuga á músík Bobs Dylans og Tims Hardins.  Fyrir nokkrum árum kom Arlo í einkaþotu til Keflavíkur og bankaði upp hjá Rúnari. 

  Rúnar vissi ekki hvaðan á sig stóð veður.  Búinn að fylgjast með Arlo slá í gegn með "City of New Orleans" (Good Morning America),  "Alece´s Restaurant" og fleiri dæmum.  Og að hann þekkti ennþá rokkarann frá Keflavík og gæti leitað hann uppi.  Rúnar sagði mér sjálfur frá þessu.  Þeir snæddu saman á veitingastað í Keflavík og Arlo lýsti yfir áhuga á að gera plötu með Rúnari.  Þetta var Rúnari næstum óraunverulegt dæmi.  Gamall aðdáandi pabba Arlos,  Woody,  og góðs vinar hans,  Bobs Dylans.  En svo lést Rúnar um aldur fram áður en á þetta reyndi.

[Stefán (IP-tala skráð) 20.10.2009 kl. 08:39]

Þegar Trúbrot var að taka upp sína fyrstu plötu í London 1969, þá voru Led Zeppelin líka að taka upp sína fyrstu plötu í sama húsi. Sagan segir að Rúnar heitinn hafi jafnvel eytt meiri tíma í studioinu með Led Zeppelin en með Trúbrot. Hann varð allavega vitni að miklu kraftaverki.

[doddý, 20.10.2009 kl. 11:09]

hæ jens - það er leitun að meira misnotuðu lagi en "undir bláhimni". sjálfri finnst mér það líka hrútleiðinlegt, en það er sjálfsagt vegna minna takmörkuðu þjálfun í að hlusta á tónlist af þessu meiði. en ég þekki nokkra skagfirðinga og þeir eru allir ágætir. kv d 

[Maggy (IP-tala skráð) 20.10.2009 kl. 22:12]

Ekki gleyma Sölva helgasyni og Símoni dalaskáldi hann orkti.

Margrét löngum mundsterk er,

mæðu gengur vega.

Og mig hengja ofaná sér

ætlaði drengilega.

[Jens Guð, 20.10.2009 kl. 23:49]

  Steingrímur,  takk fyrir það.

[S (IP-tala skráð) 23.10.2009 kl. 13:31]

Reyndar er sagan af því hvernig undir bláhimni mjög skemmtileg og heiður þeirra ekki síðri sem náðu að læra textann þegar hann var fluttur þar sem að óvíst er að höfundurinn hefði munað hann daginn eftir.