Mikilvægt að leiðrétta

   Mánudags- og þriðjudags tölublað DV þessa vikuna er sérdeilis skemmtilegt.  Það er úttroðið af áhugaverðri umfjöllun um eitt og annað forvitnilegt og fróðlegt.  Meðal annars er opnugrein um bók eftir Roger Boye breskan blaðamann The Times,  Meltdown Iceland.  Ingi F.  Vilhjálmsson gagnrýnir bókina og finnur henni margt til foráttu.  Til að mynda er hann afar ósáttur við eftirfarandi texta í bókinni:

  "Björk Guðmundsdóttir,  sem virtist deila þeirri trú landsbyggðarfólks,  að til væri ósýnilegt fólk,  álfar,  sem gætu gert mönnum erfitt fyrir í lífinu ef þeim væri ekki sýnd tilhlýðileg virðing..."

  Um þetta segir bókargagnrýnandinn: 

  "Við þurfum að fara að kveða niður þessar tröllasögur um álfatrú Íslendinga.  Ég veit ekki hvaðan þær koma í nútímanum,  ekki þekki ég einn mann sem trúir á eða talar um álfa."

  Gagnrýnandinn stingur upp á að ríkisstjórnin grípi í taumana til að þagga niður í þeim sem nefna álfatrú Íslendinga í eyru útlendinga.

  Ég veit ekki hverja sá maður umgengst er þekkir ekki einn mann sem trúir á eða talar um álfa.  Það er um fátt annað talað þar sem ég þekki til.  Á uppvaxtarárum mínum í útjaðri Hóla í Hjaltadal bjuggu álfar í hinum ýmsu steinum og klettum.  Huldufólk (sem fellur undir víðan skilning á samheitinu álfar) bjó í nokkrum klettum.  Um þetta var rætt um leið og menn spáðu í veðrið.  

  Það er vel á fjórða áratug síðan ég flutti suður.  Ólíklegt er að viðhorf fólks fyrir norðan til álfa hafi breyst mikið.  

  Þvers og kruss um Ísland eru vegir lagðir í sveig framhjá álfabyggðum.  Þar sem það er illmögulegt er samið við álfana.  Það geta orðið langir og strangir samningafundir.  Álfarnir eiga til að vera þráir við að yfirgefa heimili sín.  En það borgar sig alltaf að semja við þá og ná góðri lendingu.  Þeir eru nefnilega hefnigjarnir þegar sá gállinn er á þeim.

  Íslendingar fjölmenna jafnan í svokallaðar álfagöngur.  Þar er rölt um álfabyggðir.  Sömuleiðis sýna Íslendingar Álfasetrinu á Stokkseyri mikinn áhuga.  Það er troðningur þar yfir sumartímann.  Komið hefur til tals að veiða meinlausan færeyskan álf og lauma honum í Álfasetrið.

  Íslendingum þykir fátt skemmtilegra en syngja um álfa.  Nema ef vera skyldi að hlusta á aðra syngja um álfa.  "Hann mun aldrei gleym´enni,"  söng Rúnar Júl í sívinsælu lagi með Unun.  Þar segir frá kynnum ungs manns af álfadís.  "Eru álfar kannski menn?" syngur Magnús Þór Sigmundsson og upp á síðkastið einnig Gísli Hvanndal.  Ekki má heldur gleyma  "Stóð ég úti í tungsljósi".   Bara svo örfáir söngvar um álfa séu nefndir.   

  Ein af helstu fjáröflunarleiðum SÁÁ er sala á SÁÁ álfum.  Þeir eru að vísu ekki lifandi verur.  En sýna hvað álfar skipa stóran sess í tilveru Íslendinga.  Einnig öll þessi vinsælu mannanöfn á borð við Álfdís,  Álfheiður,  Álfgerður,  Álfhildur,  Álfrún,  Álfgeir,  Álfur,  Álfþór,  Huld,  Hulda,  Hulddís,  Huldrún...  Sömuleiðis bregður álfum oft og tíðum fyrir í íslenskum málverkum og íslenskum bókum.

  Á seinni hluta sjöunda áratugarins fór að bera á gnómum hérlendis (afbrigði af álfum) í kjölfar vinsæls lags með Pink Floyd,  The Gnome.  Lag sem Facon frá Bíldudal krákaði með íslenskum texta.

  Að lokum má benda á að skoðanakannanir sýna ætíð að meirihluti Íslendinga trúir á tilvist álfa.  Hæst er hlutfallið hjá framsóknarmönnum.  Næstum 7 af hverjum 10 trúir á álfa.  Það á sér ýmsar skýringar.  Kannski helstar þær að margir framsóknarmenn eru í afdölum þar sem meira er um álfa en í þéttbýli.      

  Ath:  Myndin efst er ekki af alvöru álfum.  Þetta er samsett mynd.  

Athugasemdir

[Ólafur Sigurðsson (IP-tala skráð) 10.12.2009 kl. 01:54]

Var það ekki Facon frá Bíldudal.

[Ólafur Sigurðsson, 10.12.2009 kl. 01:59]

Sammála með huldufólk og álfa, auðvitað er þetta allt til hjá okkur, við erum enn að tala um þetta og segja frá. Pabbi sá þetta hér og þar, fyrrverandi lögreglustjóri í Rvk. sagði í útvarpsviðtali fyrir mörgum árum frá huldufólkinu á bænum sem hann ólst upp.

Vinur minn einn lék sér við huldudreng, í mörg ár. Prófið að segja við hann: "Þetta var bara ímyndun." Og ef trúa má á jesú, englana, dýrlingana, djöfulinn og hans hyski, af hverju má þá ekki trúa á vel meinandi huldufólk og álfa? 

Vei yður kristnu hræsnurum.

[Jens Guð, 10.12.2009 kl. 03:59]

  Takk fyrir síðast!  Og takk fyrir að leiðrétta mig með Facon.  Ég var snöggur að laga þetta í færslunni.  Ég rugla stöðugt saman nöfnum hljómsveitanna Falcon og Facon,  eins og margir aðrir.  Til að mynda sé ég í nafnaskrá bókar Dr. Gunna,  Eru ekki allir í stuði?  að þar eru báðar hljómsveitirnar skráðar undir nafninu Falcon.