Jólagjöfin í ár

  

 

 

 

 

 

 

 

 

 

 

 

 

  Fólk er í stöðugum vandræðum með hvað gefa á öðrum og sjálfu sér í jólagjöf.  Verslun ein á höfuðborgarsvæðinu hefur dottið niður á bráðskemmtilega og nýtilega lausn á þessu vandamáli.  Verslunin auglýsir til sölu hjá sér kaffiskeið. 

  Á flestum heimilum og vinnustöðum er hellt upp á kaffi.  Allur háttur er á með hvaða verkfæri möluðu kaffi er mokað í kaffivélina.  Sumir nota ómerkilegar plastskeiðar.  Aðrir lítil plastglös.  Enn aðrir hella beint úr kaffipokanum ofan í kaffivélina.  Í þeim tilfellum vill kaffið sáldrast út um allt borð.  Það er engin reisn yfir þessum aðferðum.

  Alvöru kaffiskeið er málið.  Sterkleg skeið úr stáli.  Skaftið fer vel í hendi þannig að það er auðvelt að halda á henni.  Verðið ráða flestir við.  Rétt rúmlega þúsund kall,  eða 1999 kr.

  Það allra besta er að einnig er hægt að ausa strásykri með skeiðinni.  Ef það er gert þarf þó að skola kaffi af henni fyrst og þurrka hana.  Annars berst örfínt kaffiryk yfir í sykurinn.

Athugasemdir

[Jóna Kolbrún Garðarsdóttir, 16.12.2009 kl. 02:10]

Ég á alvöru plastskeið sem mælir kaffið mitt, þegar ég man eftir því að bjóða gestum kaffi.  Ég drekk yfirleitt ekki kaffi nema að gesti beri að garði.  Alvöru plastskeiðin mín var ókeypis!!!  Ég fékk hana gefins frá einhverjum kaffisölumanni fyrir nokkrum árum.. 

[Kristín Björg (IP-tala skráð) 16.12.2009 kl. 07:25]

Ó - ég hélt að þú ætlaðir að stinga upp á silfurskeið.......

[Jens Guð, 16.12.2009 kl. 12:44]

  Jóna Kolbrún,  það vantar stælinn yfir kaffiuppáhellinguna ef gestir sjá þig brúka plastskeið. 

[Jens Guð, 16.12.2009 kl. 12:46]

  Kristín Björg,  ég sá þetta bara auglýst í blaði.  Án þess að hafa hugmynd um hef ég grun um að fljótt muni falla á silfurskeið ef stöðugt er verið að moka upp möluðu kaffi með henni. 

[Hallgrímur Egilsson, 17.12.2009 kl. 00:22]

Hahaha Rétt rúmlega þúsund kall... 1.999... Hvað færðu mikið til baka ef þú borgar með TVÖ þúsund kalli? Hvað ætlarðu að gera við afganginn?