Nauðsynlegur fróðleikur um landafræði

  Fyrir nokkrum árum keypti ég í Bandaríkjum Norður-Ameríku lítinn hnött.  Eða réttara sagt líkingu af jarðkúlunni.  Hún var ekki í raunstærð heldur frekar nett.  Ástæðan fyrir því að ég fjárfesti í þessu hnattlíki var sú að þar er hvergi Ísland né Færeyjar að sjá.  Þar sem Ísland og Færeyjar eru vanalega á landakorti er aðeins blár flötur sem sýnir óslitið hafsvæði.

  Eftir að Sykurmolarnir,  Björk og Sigur Rós urðu stór nöfn í Bandaríkjunum óx landafræðiþekking þarlendra aðdáenda.  Einkum að því er snýr að Íslandi.  Í dag gæta bandarískir landakortagerðarmenn þess að hafa Ísland með.  Við endurprentun á eldri Íslandslausum landakortum er Íslandi nú bætt við.  Allur gangur er á því hvernig Ísland snýr á kortunum. 

  Ef vel er að gáð má sjá að Færeyjar eru bæði fyrir sunnan og norðan Ísland.  Syðri Færeyjarnar virðast heyra undir Ísland.  Það eru góðar fréttir. 

  Í rauða textanum kemur fram að Stokkhólmur sé höfuðborg Finnlands og nyrsta höfuðborg í heimi.  Íbúar Stokkhólms eru sagðir vera 2 milljónir og þar með 20% af heildar íbúafjölda Skandinavíu.  Vissulega slagar íbúafjöldi Stokkhólms í 2 milljónir ef allir á Stokkhólmssvæðinu eru með taldir.  Hins vegar hélt ég lengi vel að íbúafjöldi Skandinavíu væri um 25 milljónir.  En það eru ekki allir á einu máli um það hvort Skandinavía nær yfir öll Norðurlöndin eða bara hluta þeirra. 

  Hvernig sem það er þá er skemmtilegt og fróðlegt að skoða Norðurlöndin á landakorti sem þessu.  Ósló og Gautaborg eru þarna vel staðsettar í Noregi.  Stavangur, Bergen og Stokkhólmur dreifa sér um Finnland.  Helsinki blasir við í Svíþjóð.  Maður verður eiginlega ringlaður af þessum fróðleik. 

Athugasemdir

[Bergur Ísleifsson (IP-tala skráð) 15.7.2012 kl. 08:47]

Er þetta ekki bara eðlilegt landrek? Annars er margt fleira fróðlegt á þessu korti. Kannast t.d. ekki við þorpið Hákarl á norðanverðu Íslandi. Og gaman að sjá að Legoland skuli loksins vera orðin höfuðborg Danmerkur og Hamborg höfuðborg Þýskalands. Og hvað með Barentshaf, hvernig rann það þarna niðureftir?

[Guðmundur Björn, 15.7.2012 kl. 11:13]

Eitthvað hefur Lettlandi og Litháen verið ruglað saman líka.  Þetta kort er auðvitað gersemin ein.

[Sigurður I B Guðmundsson, 15.7.2012 kl. 12:27]

Er ekki möguleiki að þú hafir snúið hnettinum of hratt eða of oft og þess vegna hafi þetta ruglast svona??

[Vilhjálmur Eyþórsson, 15.7.2012 kl. 12:50]

Það er alveg ljóst að þetta kort er hugsað sem grín. Ef þetta á að sýna fáfræði Ameríkana minnir það mig á að á þeim árum sem ég bjó í Svíþjóð var ég margsinnis spurður hvort bílar væru til á Íslandi.

[Anna Sigríður Guðmundsdóttir, 15.7.2012 kl. 17:49]

Jens Guð. Takk fyrir að benda á, að enn einu sinni eru það listamenn sem leiðrétta ýmislegt, sem stjórnmálaelíta heimsins og einhverjir af þeirra keyptu bull-þjónum hafa í fávisku sinni sett rangt á pappír.

Kortamyndin er fyndin opinberun á ábyrðarleysi og/eða fávisku heims(kra)-stjórnenda.

M.b.kv.

[Elle_, 15.7.2012 kl. 18:49]

Hvar var líkanið búið til?  Kannski væri ekkert að marka það frekar en allt hitt.  Var þetta kannski hnöttur sem datt og fór í 1000 mola og allt ruglaðist?  Vá, en ótrúlega hroðvirknislegt. 

[Jens Guð, 15.7.2012 kl. 19:15]

  Bergur,  þú hittir naglann á höfuðið með kenningunni um landrek.  Held ég.

[Jens Guð, 15.7.2012 kl. 19:16]

  Guðmundur,  takk fyrir ábendinguna.  Ég var ekki búinn að taka eftir því.  Landafræðikunnátta mín er ekki betri en það.

[Jens Guð, 15.7.2012 kl. 19:17]

  Sigurður I.B.,  það hefur að minnsta kosti eitthvað snúist of hratt.  Eða alla vega snúist.

[Jens Guð, 15.7.2012 kl. 19:29]

  Vilhjálmur,  ég veit ekki hver uppruni þessa korts er.  Ég rakst á það á síðu sem geymir myndir af Íslandi.  Þaðan lá leið inn á fésbókarsíðu þar sem skorað er á lesendur að finna villur á kortinu.  Villurnar eru það margar að næsta víst er að um meðvitaða uppsetningu er að ræða.  Annars er landafræðikunnátta fólks upp og ofan og eðlilega er fólk síður að sér um smáatriði í öðrum heimsálfum en sinni.

  Fyrir mörgum árum átti Jón Ormur Halldórsson erindi til Filippseyja.  Þar tók hann leigubíl.  Bílstjórinn spurði hvaðan JOH kæmi.  Þegar JOH upplýsti það þrætti bílstjórinn fyrir að til væri land með þessu nafni.  JOH lýsti fyrir manninum hvar Ísland sé staðsett.  Bílstjórinn hélt áfram að þræta.  Sagðist vera landafræðingur að mennt og það væri ekki hægt að ljúga svona að sér.

  Eftir dálítið þref ók bílstjórinn að bókabúð og skrapp þangað inn eftir landakorti.  Hann fletti upp á kortinu og bað JOH að benda á Ísland.  Ísland var ekki á kortinu.  Ekki fremur en á hnattlíkaninu sem ég nefni efst í færslunni. 

[Jens Guð, 15.7.2012 kl. 19:34]

  Anna Sigríður,  listamenn og listir eru málið.  Þar ríkir sköpunargleðin.

[Jens Guð, 15.7.2012 kl. 19:38]

  Elle,  hnattlíkanið er líkast til framleitt í Kína eða Taiwan þó að það komi hvergi fram.

[Hrólfur Þ Hraundal, 15.7.2012 kl. 20:08]

Þetta var mjög skemmtilegt Jens Guð og ástæðulaust að þrefa um átæðunna svo ljós sem hún er í öllum skilningi. 

En kort að líkingu við þetta þarf ég að eiga og hafa með mér á ferðum til glöggvunar fyrir jafnt erlenda sem Íslenska vini mína sem átta sig eftir 3-4-6-10 ,mínútur , en ef ekki þá leggja þeir kortið frá sér og gamanið er búið og þá þarf að drífa í því að fela það svo eingin verði móðgaður.

 

[Jens Guð, 15.7.2012 kl. 20:20]

  Hrólfur,  það er um að gera að galsast með svona grín. 

[Sólrún (IP-tala skráð) 15.7.2012 kl. 21:40]

Grímsstaðir á Fjöllum hljóta að vera komnir inn á Kínversku kortin núorðið.

Bergur varst þú ekki í samninganefndinni

fyrir Íslands hönd ?

Eg er viss um að þú hefur ekki klikkað á því

að setja það inn í samninginn.

[Jens Guð, 15.7.2012 kl. 21:57]

  Sólrún,  Bergur er að redda þessu.

[Ómar Bjarki Kristjánsson, 15.7.2012 kl. 23:10]

Útfrá þessari sögu JOH í Filippseyjum þegar Ísland var einfaldlega ekki til og end of story - að þá er það reyndar soldið mín reynsla þegar ég var að flakka í gamla daga. það er bara mjög algengt að fólk veit ekkert af Íslandi. þeir fáu sem á annað borð var ekki slétt sama og fóru að spyrja nánar útí hvar þetta væri eiginlega á hnettinum - að eftir að maður lýsti staðsetningunni sirkabát, að þá settu þeir upp spekingssvip og sögðu eitthvað á þá leið: Aaa Norway? Eða Yes, yes, Ireland? Etc etc.

Nema í Egyptalandi. þar var barasta mjög algengt að fólk kunni skil á Íslandi. það var vegna þess að þá hafi Heimsmeistaramótið í Handbolta verið haldið á Íslandi og Egyptaland var að keppa. Og handbolti virtist dáldið í hávegum hafður þar í landi. Allavega varðandi landsliðið.

[Ómar Bjarki Kristjánsson, 15.7.2012 kl. 23:21]

Og ps. þessvegna, þessvegna nefnilega, er dáldið sérkennilegt að sjá tal hérna uppi, með einum eða öðrum hætti, á þá leið, bæði hjá fjölmiðlum og almenningi, að þá er það orðið eins og Ísland sé einhver miðdepill og skipti einhverju máli eða sé eitthvað relevant fyrir almenning heims. þetta er miskilningur. það er nánast 99% agjörlega slétt sama og hafa um annað að hugsa.

það er helst að N-landabúar hafi áhuga - og þá er það frænrækni aðallega. Og svo líka óvæntur áhugi eða áhugi sem maður fattar ekki alveg undireins, hjá Mið-Evrópubúum sumum og þá er það aðallega náttúran sem þeir hafa í huga og jafnvel álfar.

[Ómar Bjarki Kristjánsson, 15.7.2012 kl. 23:57]

Og ps.ps. aftur að kortinu og villunum.

Döblin á að vera á Austurstönd Írlands. Edinborg og Glaskó virðast hafa færst eitthvað til og ennfremur virka Liverpool g Manchester grunsamlega norðanlega og eru eins og langleiðina inní Skotalandi. Legoland er höfuðborg Danmerkur. Hamborg höfuðborg þýskalands. Norðursjór og Barentshaf víxlað.

það er soldið lagt í þetta sko.

[Jens Guð, 16.7.2012 kl. 00:44]

  Ómar Bjarki,  það var mjög áberandi þegar Sykurmolarnir slógu í gegn í Bretlandi hvað þekking þarlendra fjölmiðlamanna um Ísland var takmörkuð.  Tal barst iðulega að snjóhúsum og ísbjörnum.  Í mínum fyrstu heimsóknum til Bandaríkjanna fyrir 36 árum síðan og alveg fram á níunda áratuginn fékk maður spurningar á borð við hvað tæki langan tíma að keyra frá Íslandi til Bandaríkjanna.  Á síðari árum verð ég þó var við að Kanar,  Bretar og víða um meginland Evrópu hafi þekking á Íslandi aukist til muna.

[Símon (IP-tala skráð) 16.7.2012 kl. 21:02]

11% 18 til 24 ára Bandaríkjamanna geta ekki fundið landið sitt á landakortinu, og um 70% geta ekki staðsett Bretland á kortinu

http://news.nationalgeographic.com/news/2002/11/1120_021120_GeoRoperSurvey.html

[Jens Guð, 17.7.2012 kl. 01:42]

  Simon,  það er töluvert vandamál að Bandarikin eru í stríði víða um heim en hermenn vita ekki hvar stríðið er og geta ekki staðsett óvininn á landakorti. 

[Jens Guð, 17.7.2012 kl. 01:44]

  Fyrrverandi mágur minn í Texas hélt lengi vel að Bandaríkin væru Texas og öll önnur ríki Bandaríkjanna væru Evrópa.