Fólskuleg hatursárás á nýbúa

  Sex piltar réðust að manni á þrítugsaldri við verslun í Kópavogi og gengu í skrokk á honum. Maðurinn er frá Portúgal en hefur verið búsettur hér um nokkurt skeið. Hann kærði líkamsárásina og að hún hefði verið gerð á forsendum kynþáttafordóma.

  Maðurinn fór í verslunina 10-11 við Engihjalla á laugardagskvöldi. Þegar hann kom inn í verslunina voru piltarnir þar fyrir. Þeir gerðu hróp að honum og hreyttu í hann ónotum og svívirðingum sem vörðuðu útlendingslegt útlit hans. Þeir skipuðu honum að snauta heim og viðhöfðu fleiri ummæli sem beindust að því að hann væri útlendingur og ætti að hafa sig á burt.

  Maðurinn fór við svo búið út úr versluninni. Piltarnir eltu hann og á planinu fyrir framan verslunarmiðstöðina réðust þeir að honum og gengu í skrokk á honum. Hann flúði aftur inn í verslunina, en þá hafði afgreiðslumaðurinn áttað sig á því að ekki væri allt með felldu og ýtt á öryggishnapp við kassann. Hnappurinn er beintengdur við lögregluna sem kom skömmu síðar á vettvang.

  Maðurinn á íslenska eiginkonu og barn hér á landi. Hann var marinn og lerkaður eftir árásina.

  Á dögunum féll dómur í málinu:

  1.  nóvember 2007 kærði lögreglustjórinn á höfuðborgarsvæðinu Bjarna Snorrason,  Prestastíg 1, Reykjavík, og Ara Þór Þrastarson, Reyrengi 2, Reykjavík, fyrir líkamsárás, með því að hafa aðfaranótt sunnudagsins 5. nóvember 2006, fyrir utan verslunina 10-11 í Engihjalla 8 í Kópavogi, veist að Helder Kin Fajal, þannig að hann féll í götuna  og hafi ákærði Bjarni þá kýlt hann í andlit og í höfuð en Ari í kjölfarið sparkað í fætur hans þar sem hann lá í götunni, með þeim afleiðingum að hann hlaut bólgu vinstra megin á enni og hrufl á vinstra eyra, bólgu yfir nefrót, glóðaraugu, roðablett á hálsi og í hársverði upp við hnakka, rispur yfir spjaldhrygg vinstra megin og þreifieymsli á hálsi, hnakka, herðum og niður með hryggvöðvum.

  Ákærðu játuðu brot sín. Sannað er með játningum ákærðu og öðrum gögnum málsins að þeir eru sekir um þá háttsemi sem þeim er gefin að sök í ákæru og er brot þeirra þar rétt heimfært til refsiákvæða.

 Ákærði Bjarni mótmælir bótakröfu í ákæru og krefst þess aðallega að henni verði vísað frá dómi þar sem hún hafi aldrei verið birt honum, hún sé vanreifuð og ekki studd gögnum.  Til vara krefst hann verulegrar lækkunar bótakröfu.

  Ákærði Ari mótmælir einnig bótakröfu með sömu rökum og Bjarni, en auk þess telur hann að ekki sé um að ræða afleiðingar af hans þætti í brotinu sem geti varðað bótagreiðslu hans.

  25. október 2006 var Bjarni dæmdur fyrir brot gegn 244. gr. almennra hegningarlaga, en ákvörðun refsingar var frestað skilorðsbundið í tvö ár. Fram hefur komið í málinu að sá dómur var ekki birtur ákærða fyrr en eftir að brot það sem nú er ákært fyrir var framið og verður því ofangreindur skilorðsdómur ekki tekinn upp hér. Telst hæfileg refsing ákærða 100.000 króna sekt sem honum ber að greiða í ríkissjóð innan fjögurra vikna frá dómsuppsögu en sæta ella 8 daga fangelsi.

  Ákærði Ari hefur ekki hlotið refsiviðurlög, en ákæru á hendur honum var frestað skilorðsbundið vegna brots á 247. gr. almennra hegningarlaga, 10. nóvember 2006. Telst hæfileg refsing ákærða Ara 80.000 króna sekt sem honum ber að greiða í ríkissjóð innan fjögurra vikna frá dómsuppsögu en sæta ella 6 daga fangelsi.

  Í bótakröfu frá brotaþola var krafist 60.000 króna bóta vegna tekjutaps, 350.000 króna í miskabætur, 67.000 króna í áætlaðan útlagðan kostnað, auk lögmannskostnaðar. Brotaþoli á rétt á miskabótum úr hendi ákærða Bjarna og þykja þær hæfilega ákveðnar 100.000 krónur og verður hann einnig dæmdur til að greiða 45.000 krónur vegna lögmannskostnaðar. Kröfur um tekjutap og áætlaðan kostnað eru ekki studdar gögnum og verður þeim hluta bótakröfu vísað frá dómi. Ekki er að sjá að ákærða Bjarna hafi verið kynnt bótakrafan fyrr en við þingfestingu málsins og verður ákvörðun um vexti af kröfunni miðuð við það.

-----------------------

  Eins og sjá má þá er dómsmálið tómt klúður.  Einungis var gefin út ákæra á 2 af 6 árásarmönnum. Þeim voru ekki birtar bótakröfur og í þær vantaði gögn.  Bjarni var á skilorði en með árásinni er hann ekki talinn hafa rofið skilorð vegna þess að það átti eftir að birta honum skilorðsdóminn.

  Í lýsingu á afleiðingum árásarinnar vantar þetta:  Grunur um heilahristing þar sem fram kemur minnisgloppur eftir árásina og hálstognun, mar er undir glæru á hægra auga. það gleymdist að fá læknisvottorð frá lækni sem hefur sinnt fórnarlambinu eftir árásina þar sem upplýst hefði verið um styttingu í hálsvöðum og miklar höfuðkvalir út frá því!

Athugasemdir

[Lára Hanna Einarsdóttir, 11.2.2008 kl. 21:11]

Ég held að svona klúður og vægir dómar eigi alls ekki bara við í málum innflytjenda.

Það hefur oft verið skrifað og bloggað um fáránlega væga dóma fyrir alvarleg ofbeldisbrot og nauðganir þar sem fórnarlömbin eru íslensk. Ef ég man rétt eru meira að segja nokkur dæmi um að mál hafi verið fyrnd þegar þau loks komu fyrir dóm. Mér virðist sem löggæslan, dómskerfið og lagaumhverfið ekki vera í stakk búið til að taka almennilega á ofbeldismálum sem fjölgar hratt. Auk þess sem fangelsin eru full og hvergi hægt að koma mönnum fyrir. Ofbeldismönnum er því sleppt út í þjóðfélagið aftur eftir skýrslutöku þar sem þeir halda áfram sínum myrkraverkum í skjóli þess að kerfið er hálflamað.

Það eru margir mölbrotnir pottar í þessum málaflokki og ég get ekki séð að neinn sé að taka á þeim.

[Anna Ólafsdóttir (anno) (IP-tala skráð) 11.2.2008 kl. 22:19]

Þegar maður les svona nokkuð tapar maður algjörlega trúnni á íslenskt réttarkerfi. Mér finnst svona klúður óafsakanlegt með öllu

[Gunnlaugur Ingvarsson (IP-tala skráð) 11.2.2008 kl. 22:34]

Já samt var því klúðrað, þó það væru til upptökur af þessu úr vefmyndavél hvað haldiði þá um öll klúðrin í öllum hinum ofbeldisbrotunum þar sem allt er ekki myndað "live" eins og var í þessu máli. Hvernig eiginlega var það hægt ? 

Það er algerlega rétt sem Lára Hanna segir hérna að ofan. Það er eins og kerfið sé handónýtt við að taka á svona ofbeldi og gerendum þess. Hvað hefur maður ekki oft séð hvurslags vettlingatökum er tekið á þessu af lögreglunni og rannsakendum og svo af dómsstólunum. Mál verða of gömul og fyrnast, það gleymist að gefa út ákæru, ákæran byrt röngum aðila, það gleymist að yfirheyra vitni, sönnunargögn glatast, vetvangsrannsókn ófullnægjandi, eða fór ekki fram og svo má lengi áfram telja við klúðurslistann.

Fullt af svona málum komast aldrei af rannsóknarstiginu, því þau gleymast þar eða sofna af mörgum fyrrgreindum ástæðum. 

Þau mál sem svo rata í gegnum allt skrifræðið og klúðrið og komast loks fyrir dómstólana fara svo oftast þannig að dómarnir yfir ofbeldismönnum eru hálfgert grín. Oftast skilorðsbundnir á skilorðsbundna dóma ofan, í mesta lagi nokkra mánaða fangelsi, sem þeir svo afplána nánast aldrei vegna þess að þetta er skilorðsbundið. Nánast aldrei dæma dómstólar þolendunum einhverjar miskabætur hvað þá vinnutap. Þar er nánast reglan að þeim kröfum sé vísað frá dómi og oftast notuð sýndarafsökunin "vanreifað" svona til þess að segja eitthvað.  Dæma þeim svo kanski 40 til 50 þúsund krónur í málskostnað, þó svo að raunverulegur málskostnaður sé oftast miklu, miklu hærri. Þetta er algjör skandall á skandal ofan. Eftir sitja fórnarlömbin lerkuð á líkama og sál og eiga ekki orð yfir hvernig kerfið hefur brugðist þeim. Flestir sem lenda í þessu halda nú að þetta klúður sé algert einsdæmi og alveg einstakt klúður sem hafi hent þá.                    Nei, nei, svo er sko aldeilis ekki, því svona vettlingatök og klúður í meðhöndlun ofbeldisglæpa á Íslandi er fremur regla heldur en undantekning.

Þegar fólk er búið að fá nóg, þá stofnar það samtök gegn ofbeldi eins og hér gerðist fyrir tveimur árum síðan og það var meira að segja farið í mótmælagöngur gegn ofbeldi, sem er auðvitað ágætt.  En málið er það ætti miklu frekar að fara og mótmæla þeim krókloppnu vettlingatökum og klúðri sem lögreglu- og dómskerfið í landinu tekur á gerendum ofbeldisglæpa í þessu þjóðfélagi.

G.I.    

[Steingrímur Helgason, 11.2.2008 kl. 22:41]

Jamm, enn er á dagskrá, 'Maður er nefndur..'

[Númi (IP-tala skráð) 11.2.2008 kl. 22:45]

Ritari No 3,hér að ofan segir allt sem segja þarf.  En hvernig dettur Bryndísi í hug að sakborningar borgi,,ríkið ,,ég og þú borgum.Hugsið ykkur hve heimurinn yrði öruggur ef við breiddum út kunnáttu Íslenska dómskerfisins.

[Óskar Þorkelsson, 11.2.2008 kl. 23:06]

Ég missti trúnna á íslenskt dómskerfi 1999 og 2000 þegar dæmt var gegn mér í borðleggjandi máli.. dómarinn nennti ekki einu sinni að lesa gögnin hvað þá meir.. var löngu búinn að ákveða hvernig dæmt skyldi.

Ömurlegt þegar ungt fólk leiðist út í svona vitleysu og enn ömurlegra að sjá að dómskerfið bregst ekki við.  Hann ætti að fara í einkamál við þessa aula.

[Númi (IP-tala skráð) 11.2.2008 kl. 23:12]

Elsku besta Bryndís ekki er ég neinn sakborningur,sem betur fer.Ef ég hef lesið mér rangt til um skrif þín þá afsakið ,það.

[Paul Nikolov, 11.2.2008 kl. 23:24]

Hvers konar skilaboð er þetta frá dómskerfinu? Æ þyngri dómar fyrir smyglun og öðru fíkniefnisbrotum, en fyrir ofbeldi, maður greiða bara eins og það var umferðisbrot?

[Magnús Paul Korntop, 11.2.2008 kl. 23:36]

Takk jens fyrir að blogga um þetta og varpa þar með ljósi á málið.

Er löngu búinn að missa trúna á íslensku dómskerfi,það er rotið og fúið,hæfileg refsing hefði verið 2-3 ár á "Hótel" Litla Hrauni og skaðabætur hæfilegar um 250 þús á hvorn,en að ákæra ekki alla aðila málsins sem að þessu stóðu er bara bull og kjaftæði en svona eru íslenskir dómstólar í dag:=ekki treystandi.

[Ása Ninna Katrínardóttir (IP-tala skráð) 12.2.2008 kl. 00:01]

Vitleysingar, ég segi ekki annað, bæði piltarnir og þeir sem bera ábyrgð á þessu rotna dómskerfi hér á landi!

[Ævar Rafn Kjartansson, 12.2.2008 kl. 00:46]

það er greinilega ódýrt að berja mann og annan á Íslandi.Sérstaklega ef þetta eru einhver útlendingskvikindi.. Hef það í huga næst þegar ég leggst í víking.

Ég lenti í því að vera vitni í svona máli þar sem amfetamínsteikur kærðu kunningja minn fyrir að taka á móti þeim. Gott ef þeir heimtuðu ekki áfallahjálp, skaðabætur og örorkubætur ásamt geðröskunarlyfjum. Kunningi minn sat uppi með lögfræðikostnaðinn af því að verjast gegn vesælum snýkjudýrum. Ég  átti smá þátt í því að gera þetta ekki eins ljótt og það stemmdi í en spítthausarnir höfðu ákveðið sig löngu áður en kunningi minn varð fórnarlambið. Það að þetta sé komið til að vera gagnvart nýbúum er eitthvað sem þarf að ræða og takast á við. Pólverjar sem eru fluttir til landsins eru margir komnir til að vera og ef þessi stemmning fær að grassera er stutt í að við segjum "sieg Heil". Þegar eins og stefnir í að fasteignamarkaður frystist og hægir á framkvæmdum þá eru útlendingarnr sem leituðu að betra lífi ekkert á leiðinni heim. Þeir verða eins og við að leita að betri vinnu. Og þá er stutt í meiri fordóma. Og þetta ofbeldi verður daglegt brauð.