10.2.2010 | 23:19

Smásaga um systur í sjávarþorpi

  3sisters

  Myrkrið grúfir sig yfir litla sjávarþorpið hinumegin við fjallið.  Allir þorpsbúar eru í fasta svefni.  Samt er miður dagur.  Komið langt fram yfir hádegi.  Þorpsbúar hafa ruglað sólarhringnum.  Ástæðan er sú að stóra útiklukkan á eina torgi þorpsins er vitlaus.  Þorpsbúar stilla grunlausir sín úr og klukkur eftir torgklukkunni.

  Það styttist í að þorpsbúar vakni.  Í lágreistu timburhúsi býr gömul kona með sjal ásamt manni sínum og þremur dætrum.  Þorpsbúar gera enga athugasemd við það.  Systurnar eru ekki í neinni vinnu og eru tekjulausar.  Foreldrarnir eru í vinnu,  hafa þokkalegar tekjur og eiga húsið skuldlaust. 

  Systurnar vakna ein af annarri.  Þær heita ekki neitt.  Þess í stað eru þær kallaðar: Sú elsta.  Hún er 7 ára;  Miðsystirin.  Hún er 6 ára;  Og Yngsta barnið.  Hún er 5 ára.  Foreldrarnir eru kallaðir Pabbi og Mamma en heita Pétur og Páll.  Foreldrarnir vakna líka. 

  Þegar fjölskyldan er í miðju kafi við að snæða smjörsteiktan hvítlauksristaðan humar með nýlöguðu og heitu Irish Coffie segir Mamma skyndilega skrækrómuð og taugaveikluð:  "Stelpur,  þið hafið kannski tekið eftir því að ég hef fitnað að undanförnu."

  Yngsta barnið kannast við það og segir ávítandi:  "Það er af því að þú drekkur mikið af bjór þegar enginn sér.  Allir krakkarnir í leikskólanum segja að þú skolir honum niður með Einiberja-brennivíni og 8 ára Bacardi."

  Mamma leiðréttir hana:  "Nei,  ég hef aldrei á ævi minni bragðað bjór eða neitt áfengi.  Áfengi er óhollt.  Ég sprauta mig bara einstaka sinnum með heróíni.  Varla einu sinni tvisvar á dag.  Ástæðan fyrir því að ég er orðin mikil um mig miðja er sú að ég er með barn í maganum.  Ég veit ekki hvernig það hefur gerst.  Læknirinn staðfesti þetta í gær og grunar Pabba um að hafa verið eitthvað að fíflast.  Þið eruð að eignast nýtt Yngsta barn."

  Yngsta barnið fölnar upp,  fer að hágráta og spyr á milli ekkasoga:  "Nýtt Yngsta barn?  Hvað verður þá um mig?"

  Mamma dæsir og segir sorgmædd og róandi:  "Það þýðir að við verðum að henda þér í ruslið."

  Pabbi grípur fram í blíðróma en ákveðinn:  "Nei,  elskan mín.  Mamma er að bulla og dramatísera.  Þér verður ekki hent í ruslatunnuna.  Ég set þig í poka og hendi þér í sjóinn."  Og það gerði hann.

 

---------------------------------------------------------------------
Fleiri smásögur og leikrit:
 - Jólasaga
.
- Á rjúpnaveiðum:
.
- Ólétta nunnan:
.
- Gullfiskur:
.
- Flugvélamódel:
.
- Miðaldra maður:
.
- Leyndarmál stráks:
.

Meginflokkur: Bækur | Aukaflokkar: Lífstíll, Menning og listir, Vinir og fjölskylda | Breytt 31.3.2010 kl. 03:44 |

« Síðasta færsla | Næsta færsla »

Athugasemdir

1 identicon

Þetta er alveg fáránlega fyndið

Tommi (IP-tala skráð) 11.2.2010 kl. 08:53

2 Smámynd: J. Einar Valur Bjarnason Maack

súúúúrt...

J. Einar Valur Bjarnason Maack , 11.2.2010 kl. 09:42

3 Smámynd: Jens Guð

  Tommi,  takk fyrir það.

Jens Guð, 11.2.2010 kl. 13:10

4 Smámynd: Jens Guð

  Einar Loki,  það er dáldil sýra í lokasetningunni. 

Jens Guð, 11.2.2010 kl. 13:11

5 Smámynd: Sveinn Elías Hansson

Ert þú eitthvað skrýtinn? !!!!!!!!!!!!!!

Sveinn Elías Hansson, 11.2.2010 kl. 13:55

6 Smámynd: Sveinn Elías Hansson

Ljúf smásaga fyrir svefninn.

Allar athugasemdir koma eftir kl 8,50  að morgni.

Þorði enginn að lesa þetta í gærkvöldi???

Sveinn Elías Hansson, 11.2.2010 kl. 13:57

7 Smámynd: Jens Guð

  Sveinn Elías,  já,  ég er skrýtinn.  Ástæðan fyrir því að kommentin komu að morgni er að fólk þarf að tvílesa söguna:  Fyrst seint að kvöldi.  Síðan mallar hún í heilanum yfir nóttina.  Að morgni er sagan lesin yfir aftur.  Þá loks áttar fólk sig á henni.

Jens Guð, 12.2.2010 kl. 00:56

8 Smámynd: Sveinn Elías Hansson

Já. Nú skil ég, ég er svona tregur.

Sveinn Elías Hansson, 12.2.2010 kl. 11:56

9 Smámynd: Sveinn Elías Hansson

Það býr gömul kona í húsinu, ásamt manni sínum og þremur börnum.

Foreldrarnir heita Pétur og Páll. Það er von á nýju barni.

Þetta er nú dálítið sýrukennt, og fyrir ofann minn skilning, enda tregur mjög.

Sveinn Elías Hansson, 12.2.2010 kl. 12:02

10 Smámynd: Jens Guð

  Sveinn Elías,  sjálfur er ég mjög tregur.  Dæmi sem þú nefnir eru misheppnuð viðleitni mín til að setja dýpt í söguna.  Fyrra dæmið er tilvísun í eitt þekktasta kvæði Steins Steinarr,  Í tvílyftu timburhúsi.  Það hefst á orðunum "Í tvílyftu timburhúsi / býr trúuð kona með sjal..."

  Seinna dæmið er tilvísun í skemmtilegustu heimildarmyndasyrpu íslenskrar sjónvarpssögu.  Syrpan hét "Pétur og Páll" og var á dagskrá Skjás 1 um aldamótin.  Snilldarþættir.    

Jens Guð, 12.2.2010 kl. 19:10

11 Smámynd: Sveinn Elías Hansson

Hvor er mamman?

Sveinn Elías Hansson, 12.2.2010 kl. 20:13

12 Smámynd: Jens Guð

  Ég veit það ekki.  Svo ég vísi áfram í sjónvarpssyrpuna "Pétur og Pál" þá voru Pétur og Páll syrpunnar enginn tiltekinn Pétur eða Páll.  Það hljómaði bara betra sem nafn á sjónvarpssyrpu að kalla hana "Pétur og Páll" en "Hinir og þessir" eða "Vinir" eða eitthvað álíka.

  Sagan mín er samanpakkað bull.  Sýrt og steikt bull.  Ef svoleiðis bull er krufið fer fyrir því eins og ef lifandi froskur er tekinn og krufinn:  Hann drepst.

Jens Guð, 12.2.2010 kl. 20:42

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.