Gamanvísur um atburði vikunnar

 

  Eftirfarandi gamanvísur,  limrur,  fékk ég sendar.  Og hafði gaman af.  Af góðmennsku ætla ég að leyfa ykkur að brosa glaðlega yfir þessum vísum einnig.  Ekki fylgdi sögunni neinar upplýsingar um höfunda umfram þær sem hér fylgja með.  Fyrsta limran er sögð vera eftir Hjálmar Freysteinsson á Akureyri.  Ég hef engar forsendur fyrir efasemdir um að það sé rétt.  
                                               
Bollur skal éta á bolludaginn,                  

baunir og saltkjöt á sprengidaginn,            

en iðrast hann má                              

maðurinn sá                                    

sem át konuna sína á konudaginn. 

               
                                                             
Ólafur Halldórsson bætti um betur:
                                               

Bollur skal éta á bolludaginn,                  

baunir og saltkjöt á sprengidaginn,            

en þótt hugur sé á                              

ekki húsfreyjan má                              

hafa bóndann í matinn á bóndadaginn.            

                                               

Björn Ingólfsson spurði:                     

                                               
Ef bollur skal éta á bolludaginn                

og baunir og saltkjöt á sprengidaginn,          

Þá er mér spurn                                

spekingar: Hvurn                                

andskotann étiði á öskudaginn?                  

                                               

Kristján Eiríksson svaraði: 
             

Ég bollurnar ét á bolludaginn                  

og baunir og saltkjöt á sprengidaginn,          

svo fæ ég mér bjór                              

og byrja mitt þjór                              

og verð öskufullur á öskudaginn.

 

Athugasemdir

[Magnús Geir Guðmundsson, 18.2.2010 kl. 13:45]

margblessaður!

Þessar limrur hafa já gengið manna á millum sl. daga bæði á Fési og bloggi, hin skemmtilegasta yðkun, þó þetta sé nú kveðskapur ærið "Frjálslegur í fasi og vexti"

Nema hvað að þetta eru nú kallar mest hér nyrðra hygg ég mér sé óhætt að fullyrða, Hjálmar er t.d. heimilislæknir hérna í bænum, en er reyndar borin og barnfæddur í Mývatnsveitinni. Björn Ingólfsson er held ég skólamaður á Greinivík og fræðimaður m.a.

[Magnús Geir Guðmundsson, 18.2.2010 kl. 13:48]

Held reyndar að limrurnar hafi verið fleiri.

[Jens Guð, 18.2.2010 kl. 23:43]

  Magnús Geir,  sæll og blessaður.  Vissulega eru limrurnar ekki "dýrt kveðnar".  En þær eru broslegar sem nettir brandarar.  Takk fyrir fróðleiksmolana um höfunda. 

[Jens Guð, 18.2.2010 kl. 23:45]

  Til gamans,  af því að þú þekkir til,  þá eru dömurnar sem fremstar standa á myndunum hér fyrir ofan,  dætur Auðjóns.