Sérkennileg dómsmál - sérkennilegir dómar

Stelluverðlaunin eru kennd við konu sem hellti sjálf niður á sig kaffi á MacDonalds og fékk ríflegar bætur fyrir. Nýlega voru Stelluverðlaunin fyrir atburði síðustu missera veitt í Bandaríkjunum.

5. verðlaun hlutu tveir dómar: 

a)  Kathleen Robertsson frá Texas fékk 780 þúsund dollara (um 100 milljónir ísl. kr.) í bætur vegna þess að hún hrasaði um ungbarn sem var að skríða á gólfinu. Verslunareigandinn,  sem var dæmdur til að borga bæturnar undrast dóminn,  einkum vegna þess að Kathleen átti sjálf barnið á gólfinu.

  b) Terence Dickson frá Pennsylvaníu var að ræna bílskúr. Sjálfvirki opnarinn bilaði.  Terence varð að dúsa í bílskúrnum í átta daga af því eigendurnir voru í fríi. Hann fann kassa af Pepsí-kóla og poka af hundamat.  Á þessum kræsingum dró hann fram lífið.  Eftir að hann losnaði úr prísundinni var fyrsta verk að höfða mál gegn húseigendum.  Ákæruefnið var að vondar aðstæður í bílskúrnum hefðu skaðað hann verulega andlega. Dómarinn féllst á að hann fengi 500 þúsund dollara (65 milljónir ísl. kr.) í bætur.

4. sæti:

  19 ára Carl Truman frá Los Angeles fékk 74 þúsund dollara (10 milljónir ísl. kr.) og sjúkrakostnað vegna þess að nágranni hans ók yfir hönd hans.  Kauði hafði ekki veitt því athygli að nágranninn sat undir stýri á bílnum sem Carl var að reyna að stela hjólkoppunum af.

3. sæti:

  Veitingahús í Fíladelfíu varð að greiða Amber Carson 113.500 dollara (15 milljónir ísl. kr.) eftir að hún rann í kók-polli og braut rófubeinið. Ástæðan fyrir bleytunni á gólfinu var sú að 30 sekúndum áður hafði Amber skvett úr glasinu sínu á kærasta sinn í rifrildi við hann.

2. verðlaun:

  Kara Walton frá Ohio lögsótti veitingahússeiganda eftir að hún féll ofan úr glugga á snyrtingunni og braut úr sér tvær framtennur. Þetta gerðist þegar Kara reyndi að troða sér út um gluggann til að komast hjá því að greiða 3 dollara og 50 cent (ísl 388 krónur) í fatahenginu. Henni voru dæmdir 12.000 dollarar (1,5 milljónir ísl. kr.) og tannlæknakostnaður að auki.

1. verðlaun:

  Frú Gravinski keypti sér glænýjan 10 metra húsbíl. Í jómfrúarferðinni, þegar hún var komin út á hraðbrautina, setti hún "krúskontrolið" á.  Bíllinn var á 100 kílómetra hraða.  Frúin skellti sér aftur í til að smyrja sér samloku. Bíllinn lenti í árekstri og endaði á hvolfi utan vegar. Frú Gravinski lögsótti framleiðandann fyrir að hafa ekki útskýrt í leiðarvísi að "krúskontrolið" væri ekki sjálfstýring. Dómarinn taldi hæfilegar bætur vera 1.750.000 dollara (227 milljónir ísl.kr.) og nýjan húsbíl.

----------------------

 Eftirskrift:  Reynslan segir að margar af þeim sögum sem kenndar eru við Stelluverðlaunin séu færðar í stílinn og jafnvel upplognar.  Einskonar flökkusögur.  En góð saga má ekki gjalda sannleikans. 

Athugasemdir

[Hannes, 13.5.2010 kl. 02:14]

Ég er búinn að sjá þetta áður og skemmta mér konunglega yfir þessu rugli.

[Jens Guð, 13.5.2010 kl. 02:22]

  Hannes,  það er skemmtanagildi í þessum sögum.  Rétt eins og í aðra röndina af sumum sérkennilegum íslenskum dómum.

[tommi (IP-tala skráð) 13.5.2010 kl. 02:33]

Þetta er náttútulega bara snilldin ein.Mikið skemmtanagildi og eins og þú segir Jens vafasamir dómar ala íslenskir ;)Veit ekki með skemmtanagildi þeirra íslensku!

[Bragi Haraldsson (IP-tala skráð) 13.5.2010 kl. 03:02]

Sæll var að reyna að skoða þetta en einhver banner frá Nova hylur alltaf hægri partinn af textanum, þeir virðast ekki hafa neinn svona loka glugga möguleika, er reyndar á mac sem gæti verið málið.

[Bragi Haraldsson (IP-tala skráð) 13.5.2010 kl. 03:04]

já ok um leið og ég ýtti á senda þá færist bannerinn frá Nova lengst til hægri og ekki lengur fyrir neinu, eru þeir að njósna um okkur hehe.

[Jens Guð, 13.5.2010 kl. 03:28]

  Tommi,  þeir eru kannski meira dapurlegir sumir íslenskir dómar fremur en broslegir.  En sérkennilegir engu að síður.  Andlega vanheill maður fékk þungan dóm fyrir að stela í Nóatúni súpupakka sem kostaði 80 kall eða eitthvað álíka.  Á sama tíma skilar Jón Steinar á færibandi sératkvæðum til sýknu nauðgurum og allskonar öðrum alvöru krimmum.

[Jens Guð, 13.5.2010 kl. 03:30]

  Bragi,  ég veit að í sumum tölvum eru þessi auglýsingaborði til leiðinda.  Gott að vita að ráðið til að láta hann víkja til hliðar sé þarna komið fram. 

[J. Einar Valur Bjarnason Maack , 13.5.2010 kl. 08:18]

Minnir mann um margt á Darwinverðlaunin...

[Ómar Ingi, 13.5.2010 kl. 10:48]

Hressandi og það er þessi gaur líka http://ommi.blog.is/blog/ommi/entry/1053666/

[Jens Guð, 13.5.2010 kl. 14:15]

  Einar Loki,  já,  eru þau ekki veitt heimskustu glæpamönnunum?  Eða þeim sem falla frá á klaufalegastan hátt?

[Jens Guð, 13.5.2010 kl. 14:18]

  Ómar Ingi,  frábært myndband!  Takk fyrir ábendinguna.

[Sverrir Einarsson, 17.5.2010 kl. 14:34]

Kannski fara bankaræningjarnir í mál við ríkið vegna slælegs eftirlits.

Jens er þetta ekki þannig að góð saga á ekki að gjalda sannleikans?

[Jens Guð, 17.5.2010 kl. 23:07]

  Sverrir,  bestu þakkir fyrir að leiðrétta viðsnúninginn hjá mér.  Ég var eldsnöggur að laga þetta í færslunni.