Kvikmyndarumsögn

 - Titill:  Hafið (Oceans)

 - Flokkur:  Heimildarmynd

 - Einkunn:  *** (af 5)

 - Sýningarstaður:  Háskólabíó

  Ég hef grun um að kvikmyndin  Hafið  (Oceans) hafi tengingu við frönsku mörgæsakvikmyndina sem var svo vinsæl fyrir nokkrum árum.  Það er einhver samhljómur með þessum myndum.  Samt eru þær ólíkar.  Hafið  er ósvífin áróðursmynd.  Hún byrjar sakleysislega.  Er lengi í gang.  Það er allt í lagi að missa af fyrsta korterinu.  Þar sjást bara selir,  hvalir og fleiri skepnur synda í fjarlægð,  fuglar stinga sér í hafið og eitthvað svoleiðis.

  Að nokkrum tíma liðnum birtast nærmyndir af hinum fjölbreyttustu sjávardýrum.  Það er skemmtilegasti hluti myndarinnar.  Sem betur fer er hann einnig lengstur.  Þetta er mikill ævintýraheimur.  Margt fallegt og furðulegt á að líta.

  Undir lokin eru hugljúf myndskeið af vinalegum samskiptum manns og hákarla og hvala.  Skepnurnar eru eins og elskuleg gæludýr sem ekkert aumt mega sjá.  Þetta er yndislegt líf.

  Skyndilega hellist ljótleikinn yfir í formi villimennsku mannsins.  Góðu dýrin eru illa leikin af veiðifærum mannsins.  Sporður og uggar eru skornir af lifandi hákarli.  Honum er hent ósjálfbjarga aftur í sjóinn.  Hann getur lítið synt án þessara sundfæra.  Niðurlægður og örkumla bíður hans hægur dauðdegi á sjávarbotni. 

  Það kemur ekki fram í myndinni hver ástæðan er fyrir þessari villimennsku.  Ég hef óljósan grun um að sporðurinn og uggarnir séu notaðir í lyf. 

  Í myndinni er reynt að hræða fólk frá því að vera á sjó.  Það eru sýndar myndir af skipum í vonsku veðri.  Lítið má út af bregða til að illa fari.

  Myndinni lýkur í svartsýniskasti yfir útrýmingu dýrategunda. 

  Vegna langa miðkafla myndarinnar er ástæða til að mæla með henni sem ágætis skemmtun.  Ég varð var við að krakkar sátu heillaðir undir myndinni og þurftu margs að spyrja fullorðna sessunauta.  Blessuð börnin fara snöggtum fróðari heim af myndinni.  Það þarf bara að segja þeim að það sé ekki bara maðurinn sem er vondur við dýr.  Dýr eru líka vond við dýr þó því sé leynt í myndinni.     

 

Athugasemdir

[Grefillinn Sjálfur - Koma svo! (IP-tala skráð) 3.6.2010 kl. 01:49]

Þessi "aðferð" að skera ugga og sporð af lifandi hákörlum og henda þeim síðan lifandi aftur í sjóinn þar sem þeir geta sér enga björg veitt er eitt það viðbjóðslegasta grimmdarverk sem ég hef séð "veiðimenn" fremja.

Ég meina ... það væri ekki flókið að aflífa skepnurnar í hvelli með skoti í heilann, t.d., og væri mun mannúðlegra en að láta þær kveljast svona. Skil ekki svona óþarfa grimmd.

[Jens Guð, 4.6.2010 kl. 00:14]

  Grefill,  ég tek undir þessi orð þín.  Þetta er grimmd og illmennska.

[Ásta (IP-tala skráð) 6.6.2010 kl. 17:31]

Uggar af hákörlum eru notaðir í svokallaðar sælkerasúpur í Asíu hákarlauggasúpu og verður alltaf fínna og fínna að borða þær eftir því sem þarlendir eignast meiri pening (gæti líka snúist um gamlar hefðir samanber íslenskt hákarla át). Held samt að þetta sé bannað á flestum stöðum þ..e að koma með eintóma ugga, hákarlinn á að fylgja með en fyrir hann fæst ekkert. Svo veiðiþjófar fylla bátanna af uggum og græða á því.

[Jens Guð, 6.6.2010 kl. 23:17]

  Ásta,  takk fyrir þennan fróðleik.