Nálin komin á flug

  Splunkuný útvarpsstöð fór í loftið um helgina.  Stöðin heitir Nálin og er í eigu Útvarps Sögu.  Útvarpsstjóri Nálarinnar er Einar Karl,  sonur Arnþrúðar Karlsdóttur útvarpsstjóra Útvarps Sögu.  Nafnið Nálin er tilvísun í algengt orðatiltæki þeirra sem spiluðu (og spila ennþá) vinylplötur.  Sagt er að þessi eða hin platan sé undir nálinni.  Nafnið Nálin vísar þannig til daga vinylplötunnar áður en geisladiskurinn kom til sögunnar.  Músíklína Nálarinnar spannar einmitt klassíska rokkið frá gullaldarárum Lp-vinylplötunnar. 

  Hugtakið "klassískt rokk" er notað yfir rokk hippaáranna (´67-´72) og skylda músík.  Eldri rokklög á borð við  You Really Got Me  með The Kinks (1965),  Like a Rolling Stone  með Bob Dylan (1965) og  Wild Thing  með The Troggs (1966) eru dæmigerð "klassík rokk" lög. 

  Þungarokk hljómsveita eins og Deep Purple og Black Sabbath er "klassík rokk".  Einnig fyrstu vinsælu pönkslagararnir (Sex Pistols,  The Clash...).  Harðara og þyngra rokk (death metal,  svartmálmur,  harðkjarni,  speed-metal,  þrass-metall) telst aftur á móti ekki til "klassík rokks".  Heldur ekki grugg (grunge) tíunda áratugarins.  Né heldur gamla rokk og ról sjötta áratugarins.  Nema þegar gömlu rokk og ról lögin eru krákuð (cover) af yngri rokkurum með "fössuðum" gítarhljóm og þess háttar.

  Það sem ég hef heyrt á Nálinni lofar afskaplega góðu.  Þar á bæ eru engir talibanar sem rígbinda lagavalið við Hendrix,  Joplin og Doors.  Lagavalið er kryddað með gömlum blús,  afrískri sveiflu og ýmsu öðru áhugaverðu.

  Á morgun,  laugardag,  á milli klukkan 11.00 og 13.00 verður spennandi þáttur á Nálinni.  Hann er í umsjón snillingsins Gunna "Byrds" (Gunnar Gunnarsson).  Gunni var lengi kenndur við verslunina Faco.  Þar var hann verslunarstjóri hljómplötu- og hljómtækjadeildar.  Hann vann líka í Japis og fleiri slíkum búðum. 

  Gunni er hafsjór af fróðleik um músík og segir lifandi og skemmtilega frá.  Hann sá í gamla daga um músíkskrif í Tímanum og síðar í Dagskrá vikunnar.  Það sem gerir þáttinn hans á Nálinni einnig forvitnilegan er að kappinn á risastórt plötusafn sem hefur að geyma fjölda sjaldgæfra platna.  Næsta víst er að hlustendur eiga eftir að heyra hjá honum ýmsar perlur sem þeir hafa aldrei heyrt áður.  Lög með þekktum flytjendum í öðruvísi útsetningu en maður á að venjast;  allskonar "rare" og "out takes" og "alternative versions"...

  Mig minnir að þátturinn hans Gunna heiti  Fram og til baka.  Eða eitthvað svoleiðis,  sem gefur til kynna að hann fari um víðan völl.  Ég ætla að kíkja inn í þáttinn og spjalla um annan þátt á Nálinni.  Sá er á dagskrá á sunnudagskvöldum á milli klukkan 19.00 og 21.00.

   Nálin sendir út á fm 101.5.

    

Athugasemdir

[Glámur (IP-tala skráð) 6.8.2010 kl. 02:44]

Þetta gæti orðið nokkuð skemmtilegt.

[Margrét Birna Auðunsdóttir, 6.8.2010 kl. 04:55]

Veistu hvort það sé hægt að hlusta á netinu? Svona fyrir landsbyggðarlúðana...

[Gísli Ingvarsson, 6.8.2010 kl. 09:15]

Ég er alltaf svo neikvæður. Þarf að fara í meðferð.. Útvarp Saga færir út kvíarnar, ný fjárfesting og allt.... yfirmaðurinn er !!!! SONUR útvarpsstjórans Arnþrúðar. Nepótisminn á Íslandi er okkur svo í blóð borinn að þetta er ekki einusinni vandræðalegt. Bara ánægulegt að lillinn fái eitthvað að gera í auðnuleysi sínu.... hvað ætli augasteinninn hennar mömmu fái mörg tækifæri í lífinu? Viðskiptahugmyndin að nýju stöðinni er að fá góða vinnu fyrir afkvæmið.

Annars vil ég þakka Jens Guð fyrir góða nærveru á blogginu og yrði það mikið tjón fyrir blog.is að missa hann.

[Jens Guð, 6.8.2010 kl. 09:54]

  Glámur,  þetta er og verður skemmtilegt.

[Jens Guð, 6.8.2010 kl. 09:56]

  Margrét Birna,  Nálin verður á netinu.  Það er verið að vinna í því.  Mér skilst að þess sé skammt að bíða.  Ég skal láta vita um leið og Nálin fer á netið.

[Jens Guð, 6.8.2010 kl. 10:03]

  Gísli,  Einar Karl hefur unnið í útvarpi í 7 ár.  Hann kann þetta og veit alveg hvernig á að gera þetta.  Það er eðlilegt í alla staði og heppilegt að hann stýri Nálinni.  Það hefði verið út í hött og klúður að fá einhvern annan í þetta verkefni. 

[Þórarinn (IP-tala skráð) 6.8.2010 kl. 16:14]

Þessi stöð hljómar rosalega vel og blandar saman reynsluboltum og minna reyndum útvarpsmönnum í glæsilegan kokkteil!

[hilmar jónsson, 6.8.2010 kl. 17:34]

Góð hugmynd. Ekki veitir af að vega upp á móti öllu ruglinu sem stöðin annars býður upp á..

[Þórarinn (IP-tala skráð) 6.8.2010 kl. 17:49]

Upplýstu okkur nú, Hilmar, hvaða rugl er Nálin að bjóða upp á?

[hilmar jónsson, 6.8.2010 kl. 17:52]

Æ..smá misskilningur Þórarinn..las ekki nógu vel. Hélt að þetta væri þáttur á Sögu...

[Hannes, 6.8.2010 kl. 19:05]

Áhugavert.

[Jens Guð, 6.8.2010 kl. 19:38]

  Þórarinn,  ég tek undir það hjá þér.  Og bæti því við að aldur dagskrárgerðarmanna tryggir einnig ákveðna breidd,  ætla ég.  Þeir yngstu eru 18 ára og elstu 57 ára. 

[Jens Guð, 6.8.2010 kl. 19:40]

  Hilmar (#8),  það er hellingur af skemmtilegri dagskrá á Útvarpi Sögu.  Þar á meðal er áhugverðir þessir símatímar þar sem þverskurður af landanum tjáir sig um hitamál dagsins.  Það er nauðsynlegt að heyra þær raddir.

[Jens Guð, 6.8.2010 kl. 19:41]

  Þórarinn (#9),  mér heyrist Nálin vera ruglfrí útvarpsstöð.

[Jens Guð, 6.8.2010 kl. 19:42]

  Hilmar (#10),  mig grunaði það.

[Jens Guð, 6.8.2010 kl. 19:42]

  Hannes,  mjög áhugavert.

[Hannes, 6.8.2010 kl. 20:21]

Eða þannig gamli.

[Jens Guð, 6.8.2010 kl. 20:40]

  Hannes,  ég tók eftir tákninu/teikningunni 

[Jóhann Kristjánsson (IP-tala skráð) 6.8.2010 kl. 23:36]

Hér er slóðin til að hlusta á netinu http://media.vortex.is/nalinfm

 Svo verð ég auðvitað að auglýsa þáttinn minn hér í leiðinni :D  Hann heitir rómantíski hálftíminn og er frá 22-01 á miðvikudagskvöldum.  Hvet ykkur til að hlusta á Nálina, Hellingur af góðum þáttum þar, Til dæmis Morgunþátturinn, Þáttur Ragga Palla. Gunna Ásgeirs að ógleymdum Gunna Byrds.

[Jens Guð, 7.8.2010 kl. 00:14]

  Jói,  takk fyrir þetta.  Ég bæti við að Kalli Sigurðs hefur farið á kostum á milli klukkan 16.00 og 19.00 á virkum dögum.  Enda þaulvanur af rás 2 og Útvarpi Suðurlands.  Ég sá hann líka vera á góðu flugi í uppfærslu á leikritinu "Sódóma Reykjavík" í Loftkastalanum fyrir nokkrum árum.  Gott ef hann skrifaði ekki handritið með Sigurjóni Kjartanssyni. 

[Markús frá Djúpalæk, 7.8.2010 kl. 16:49]

það er óneitanlega mjög spennandi að taka þátt í þessu dæmi; ég efast ekki um að stöðin á eftir að verða gríðarlega öflug!

[Jens Guð, 7.8.2010 kl. 17:05]

  Markús,  ég hef þegar orðið var við að ótrúlegasta fólk er að hlusta á Nálina fm 101,5.  Ég held að mig misminni ekki að ég hafi heyrt þig spila Audioslave um daginn. 

[Markús frá Djúpalæk, 7.8.2010 kl. 17:07]

Jens, það er meira en líklegt. Það verður frábært að fá að henda gömlum og nýjum uppáhalds undir nálina!

[Jens Guð, 7.8.2010 kl. 21:22]

  Markús,  ég hlakka til hvers dags síðan Nálin hóf göngu sína.  Þið eruð að standa ykkur glæsilega.

[Markús frá Djúpalæk, 8.8.2010 kl. 10:46]

Ég trúi því að það hafi verið þörf fyrir svona útvarpsstöð...

[Ólafur Guðvarðarson (IP-tala skráð) 17.8.2010 kl. 06:08]

Nú er gjörsamlega búið að rústa lífi mínu, var svo fjári glaður með Sögu þar sem ekki var þessi síbylja (eins og á öllum hinum) heldur talað mannamál, svo skýtur allt í einu upp stöð sem spilar almennilega músik, þannig að ég þarf alltaf að vera á takkanum og skifta. Áður var bara ein stöð sem hlustandi var á en nú eru þær allt í einu orðnar tvær og oft erfitt að velja á milli. Þið standið ykkur eins og hetjur öll saman og innilega til hamingju Kv.ÓG.