Besti þátturinn var frumfluttur á Nálinni í dag

 

 Besti tónlistarþáttur í íslensku útvarpi er  Fram og til baka og allt um kring  með Gunna "Byrds" (Gunnar Gunnarsson,  Gunni í Faco,  Gunni í Japis).  Þátturinn er að öllu jöfnu frumfluttur á Nálinni 101,5 á fimmtudögum á milli klukkan 19.00 og 21.00.  Hann er síðan endurfluttur á laugardögum á milli klukkan 11.00 og 13.00.  Síðasta fimmtudag brá aftur á móti svo við að Gunnar lá lasinn heima.  Í stað frumflutnings var endurfluttur eldri þáttur.  Sem var ekki mikill skaði því sá þáttur var meiriháttar flottur.  Í seinni hluta hans var stiklað á stóru í ferli Guðmundar heitins Ingólfssonar píanósnillings.  Þar voru spilaðar sjaldheyrðar djassperlur með kappanum ásamt því sem gestur Gunnars,  Birna Þórðardóttir barnsmóðir og ekkja Guðmundar,  sagði frá.

  Þrátt fyrir slæma haustflensu reif Gunnar sig á fætur í morgun og frumflutti þátt sinn.  Ég veit ekki hvernig verður staðið að endurflutningi á honum.  Hvort það verður á fimmtudaginn eða hvort Gunni frumflytur þá að venju nýjan þátt.  Hvenær sem þátturinn frá í dag verður endurfluttur þá hlakka ég til að heyra hann aftur.  Bæði var lagavalið að venju verulega áhugavert og sömuleiðis flæðir fróðleikurinn af vörum Gunnars. 

  Í þættinum í dag kynnti Gunnar meðal annars Gene Clark,  bandarískan söngvahöfund,  söngvara og gítarleikara.  Gene var í The Byrds og dúettinum Dillard & Clark.  Hann gerði líka nokkarar plötur með Clöru Olsen.  Gunnar kynntist þessum Gene persónulega en Gene dó sama daginn og Bob Dylan vinur hans hélt upp á 50 ára afmæli sitt.

  Sitthvað fleira spilaði og kynnti Gunnar í þættinum í dag.  Til að mynda Elvis Costello,  Roger McGuinn og írska söngkonu sem ég man ekki nafnið á.  Þá upplýsti Gunnar hvaða Bítlalag er byggt á því lagi sem The Byrds flytja í myndbandinu hér fyrir neðan.  Ég ætla ekki að upplýsa það hér heldur láta ykkur vita hvenær þátturinn verður endurfluttur - þegar það liggur fyrir.  Það er nefnilega skemmtilegra að heyra lögin spiluðu í röð í þættinum.

 

Athugasemdir

[Sigurður I B Guðmundsson, 18.9.2010 kl. 22:51]

Ekki gleyma "The Show must go on" á morgun!!!

[Jens Guð, 18.9.2010 kl. 23:38]

  Sigurður,  ég hef ekki fundið það lag en ég er búinn að finna "Luck of the Irish".  Ég ætla að spila það fyrir þig á morgun.  Ég ætla að vita hvort einhver verður þarna á Nálinni á morgun sem getur leitað að "The Show Must Go On" í lagabanka Nálarinnar.  Ég kann ekkert á lagabankann sjálfur.

[hilmar jónsson, 18.9.2010 kl. 23:57]

Frábærir þættir..

[Jens Guð, 19.9.2010 kl. 00:10]

  Hilmar,  ég kvitta undir það.  Gunni fer alltaf á kostum í þessum þáttum.  Þó ég sé búinn að þekkja hann í 35 ár eða eitthvað og spjalla við hann um músík klukkustundum saman ótal kvöld heldur hann áfram að bæta við fróðleiksmolum sem mér eru ný tíðindi í þáttum sínum.

[hilmar jónsson, 19.9.2010 kl. 00:12]

Gaman að svona gaurum...

[Jóhann Kristjánsson (IP-tala skráð) 19.9.2010 kl. 01:41]

Þátturinn var brilljant snilld!!!!

[Jens Guð, 19.9.2010 kl. 13:28]

  Hilmar (#5),  svo sannarlega.

[Jens Guð, 19.9.2010 kl. 13:28]

  Jóhann,  heldur betur!