Maðurinn sem fann upp taktinn

21.9.2010 | 21:59

Maðurinn sem fann upp taktinn

Einu sinni voru ekki til tölvur. Ekkert internet. Engin fésbók og ekkert blogg. Ótrúlegt en satt. Aðeins lengra er síðan það voru ekki til neinir bílar og engar flugvélar. Oft hefur verið talað um þá byltingu sem varð þegar hjólið var fundið upp. Án hjólsins væri erfitt að búa til þokkalega bíla og flugvélar.

Önnur bylting - sem minna er talað um en er ekki síður merkileg - er þegar maður að nafni Idnagrag fann upp taktinn. Þetta var í sunnanverðri Afríku. Fyrir þann tíma dansaði fólk og gólaði án takts. Einn daginn var Idnagrag með magakveisu og treysti sér ekki til að dansa með hinu fólkinu. Hann sat aðgerðalaus á trjádrumbi og fylgdist með. Hann langaði samt að vera með í leiknum. Fremur en gera ekki neitt gólaði hann smávegis og fór að slá með flötum lófa á ber lærin. Sín, vel að merkja. Fyrst var þetta óreglulegur ásláttur. Vegna magakveisunnar hægði á áslættinum - miðað við það sem Idnagrag hafði vilja til. Hægt og bítandi varð áslátturinn reglubundinn. Klappið á lærin glumdi við með jöfnu millibili. Fólkið varð furðu lostið. Það hætti að dansa og góndi opinmynnt á Idnagrag. Þeir kjörkuðustu laumuðust til að prófa að slá á læri sér með jöfnu millibili. Þegar þeir sáu og heyrðu að þeir gátu það þá slógu þeir fastar. Fleiri og fleiri bættust í hópinn og slógu í takt.

Takturinn breiddist út eins og eldur í sinu. Hann barst meðal annars til Asíu. Þar er maður að nafni Travis Barker. Hann hefur getið sér vænt orð fyrir góð tök og glöggan skilning á takti. Á þessu myndbandi fer hann ítarlega yfir fyrirbærið. Trommuleikarar um allan heim liggja gapandi yfir þessu myndbandi.

Meginflokkur: Tónlist | Aukaflokkar: Menning og listir, Spaugilegt, Vísindi og fræði | Breytt s.d. kl. 22:00 | Facebook

Athugasemdir

Verst að Gunnar Jökull og þessi fundu ekki hvorn annan og gerðu dúett

Gsss (IP-tala skráð) 21.9.2010 kl. 22:05

Gsss, það hefði orðið svakalegt dæmi.

Jens Guð, 21.9.2010 kl. 22:09

Hvaða ár var, þegar hann fann upp takkan ?

Aðalsteinn Agnarsson, 21.9.2010 kl. 22:50

Aðalsteinn, þegar þetta var áttu Afríkumenn eftir að uppgötva ártalið. Þess vegna er jafn erfitt að staðsetja það og hvenær hjólið var fundið upp. Þetta var þó klárlega fyrir einhverjum hundruð ára. Í Biblíunni er hvergi minnst á takt og ekki heldur í Íslendingasögunum. Við getum skotið á þetta hafi verið fyrir um það bil 500 eða 700 árum.

Jens Guð, 21.9.2010 kl. 23:03

Jens, Kári Stefáns segir að þú hafir verið biksvartur, fyrir ca. 50.000 árum.

Hvernig líst þér á það ?

Aðalsteinn Agnarsson, 21.9.2010 kl. 23:15

Aðalsteinn, mér líst vel á það. Ég er litblindur á fólk, eins og Janis Joplin orðaði það. Þegar hún var í framhaldsskóla í Austin í Texas varð hún fyrir einelti vegna þessa. Henni var ómögulegt að skilgreina fólk eftir húðlit. Var eini nemandinn í skólanum sem hataði ekki svertingja. Hún elskaði blús og djass og sagðist aldrei hafa getað hugsað um músík eða fólk út frá hörundslit. Skólasystkini hennar ofsóttu hana vegna þessarar "litblindu". Þau kusu hana á opinberri skólaskemmtun sem ljótasta nemanda skólans. Sem frægt varð.

Jens Guð, 21.9.2010 kl. 23:34

Því má bæta við um Janis Joplin að hún ein af öllum sínum skólasystkinum í Austin náði frægð og frama. Einmitt út á aðdáun sína á blökkumannamúsík. Varð frægasta blússöngkona rokksögunnar.

Jens Guð, 21.9.2010 kl. 23:43

Flottur, Jens.

Aðalsteinn Agnarsson, 21.9.2010 kl. 23:48

Aðalsteinn, alltaf.

Jens Guð, 22.9.2010 kl. 00:07

Til gamans má geta að fyrsta alvöru skref Janisar Joplin (það á aldrei að fallbeygja eftirnafn kvenna. Bara kalla) inn á markaðinn var að hún söng inn á sjónvarpsauglýsingu fyrir banka. Það var útúrsnúningur á lagi vísnasöngvarans Woodys Guthries This Land is your Land. Í auglýsingunni söng Janis "This bank is your bank". Hún sagðist hafa síðar skammast sín rosalega fyrir að misþyrma í þágu banka sönglagi um frelsi allra Bandaríkjamanna til eignarréttar á landi. En auglýsingin opnaði fyrir henni dyr inn á rokkmarkaðinn.

Jens Guð, 22.9.2010 kl. 00:25

Sæll Jens. Einn vinur minn sagði mér að þú værir með lista á síðunni þinni yfir nokkra bestu kven-trommuleikara í heiminum. Nú, ég fór að leita - en fann ekki þennan lista. Sá vinur minn þetta einhversstaðar hjá þér ..... eða ???

Gróa Hreinsdóttir, 22.9.2010 kl. 09:35

Gróa, um daginn birti ég lista yfir bestu rokktrommuleikara heims, óháð því hvers kyns þeir eru. Mig rámar að í athugasemdum við færsluna hafi komið upp umræða um kventrommuleikara. Þetta er ekki gömul færsla. Kannski 3ja vikna eða eitthvað svoleiðis.

Jens Guð, 22.9.2010 kl. 10:12

Síðan hvenær er blús blökkumanna tónlist ??? Af hverju skellir þú þér bara ekki í trúboð guðmann, það er orðið hálgert innavel í pistlunum þínum og kanski ættir að breiða sjóndeildarhringinn lengra austur en áður

Sjóveikur, 22.9.2010 kl. 19:43

Sjóveikur, blúsinn hefur verið blökkumannatónlist síðan blökkumenn í suðurríkjum Bandaríkjanna fundu upp þennan músíkstíl með því að blanda saman vinnusöngvum svartra þræla, sálmasöng svertingja, ballöðuforminu og fleiru.

Ég er þegar í trúboði og ættaður að austan. En takk samt fyrir gott ráð.

Jens Guð, 22.9.2010 kl. 20:03

nei minn góði guð aldeilis hefur propagandann fest sig í sessi eins og mörg trúin gerir enn, blús er blanda af skandinavískri og skotskri tóngerð og var spilaður á góðum fylleríum eftir unnin og töpuð stríð, töluvert fyrir þann tíma sem blökkumenn tróðu sér inná vinnumarkað í henni Ameríku síðan gerist það eins og allt sem gerist, að léleg hljóðfæragerð og fátækt skapar sound sem af staðbundnum aumingjaskap leiðir, eins og vel ber að fylgjast með í vælinu á Ísamannalandi í dag og sjá eftir þeirri þróun sem hin og þessi eiturlyf sem vinsældum ná skapa, eins og djassinn sem skapaðist uppúr áhrifum róandi lyfja blandað með smygluðu og bönnuðu áfengi á sínum tíma og hefur illt að halda velli í hraðefna tíma þeim sem nú er í gangi og hrundi þegar reykurinn náði völdum á hugarheimi hvíta mannsins, þar sem truflandi taktur úr svæfandi ryttma hafði neikvæð áhrif á ástarflæði doðans eins og að flestir gætu ef vildu vitað að reaggy taktur er frá Nígersvæði afríku, þá á ég við upprunann en ekki flæðið sem kennt er við sjarmann sem kom því í gang og varð fyrsta sölustjarnan með góðri hjálp lagaþjófa frá englamannalandi og sem voru orðnir uppskroppa með heilsu og hugvit þá, en veiða laxfiska í boði stjörnuvildarmanna norður í höfum, svolítið er vammborið hér, en satt þó og ekki illa meinað

Sjóveikur, 22.9.2010 kl. 21:20

Sjóveikur, þú ert að rugla fugladansinum og blúsinum saman.

Jens Guð, 22.9.2010 kl. 21:26

Hefur takturinn ekki verið til síðan hjörtu fóru að slá? Mér var sagt það ... og að þaðan kæmi tónlistin.

Hoppandi (IP-tala skráð) 22.9.2010 kl. 21:37

Hoppandi, nei, tónlist er eldri en takturinn. Fólk heyrði ekki hjartsláttinn í gamla daga. Að minnsta kosti ekki til að skynja hann sem takt. Framan af var músík mannsins gól og garg, þar sem að hluta var hermt eftir dýrahljóðum. Það var enginn taktur.

Til að átta sig betur á þessu er gott að hafa í huga hvernig fuglar syngja. Þeir hafa ekki ennþá tileinkað sér taktfastan söng. Sama má segja þegar hundar spangóla á milli bæja í sveitum. Sá söngur eða gól varir heilu og hálfu klukkutímana. En án takts. Eins jarma kindur hver í kapp við aðra þegar þeim hefur verið smalað í réttir. Og líka stundum á leiðinni í réttir. Jarmið getur verið fjórraddað og fagurt. En án takts.

Jens Guð, 22.9.2010 kl. 21:59