Lemmy um Bítlana

  Ég var svo heppinn að upplifa Bítlaæðið á fyrri hluta sjöunda áratugarins.  Þetta voru ótrúlegir tímar.  Þessi breska hljómsveit kom inn á markaðinn eins og hvítur stormsveipur.  Lagði undir sig heimsbyggðina á örskömmum tíma.  Valtaði yfir allt sem var í gangi í dægurlagamúsík.  Sem dæmi þá áttu Bítlarnir í júní 1964 sex lög í sex efstu sætum bandaríska vinsældalistans.  Þetta verður aldrei endurtekið.  Seinni tíma poppstjörnur hafa í besta árferði átt 2 lög samtímis á "Topp 10".  Þar á meðal bítillinn John Lennon.

  Í áramótauppgjöri bandaríska tónlistariðnaðarins kom í ljós að Bítlarnir höfðu selt 60% af heildarsölu platna í Bandaríkjunum 1964.  Og það þó þeir hafi ekki komið inn á markaðinn fyrr en um vorið 1964.  Þetta var skrýtin staða vegna þess að fram að þessu voru bandarískir skemmtikraftar allsráðandi á heimsmarkaðnum.

  Ein allra skemmtilegasta bloggsíða landsins er www.this.is/drgunni.  Á dögunum birti Dr.  Gunni opnu úr bók,  ævisögu Lemmys í Motorhead.  Ég las þá bók fyrir nokkrum árum.  Hún er um margt fróðleg og áhugaverð.  Meðal annars vegna fyrstu kynna Lemmys af Bítlunum.  Þar segir (mikið stytt):

    Bítlarnir kollvörpuðu rokki & róli og útliti fólks.  Það hljómar hjákátlegt í dag en á þeim árum fannst fólki Bítlarnir vera mjög síðhærðir.  Ég hugsaði:  "Vá,  hvernig geta strákar verið svona síðhærðir?"...

  Ég var svo heppinn að sjá Bítlana spila á upphafsárum þeirra.  Þeir voru virkilega fyndnir,  étandi snakk á meðan þeir sungu og reittu af sér brandara.  Þeir voru ótrúlegir.  Þeir hefðu getað verið uppistandarar.

  Bítlarnir voru hörku naglar... Ég kunni vel við The Rolling Stones.  En þeir komust ekki með tær þar sem Bítlarnir höfðu hælana.  Hvorki varðandi kímnigáfu,  frumlegheit,  lagasmíðar eða fas...

  Allir vissu að umboðsmaður Bítlanna var hommi.  Einhver úti í sal hrópaði:  "John Lennon er helvítis hommi!"... John hljóp að honum og sló hann niður með tilheyrandi blóðgusum,  blóðnösum og (brotnum) tönnum.

  "Vilja fleiri leggja orð í belg?" spurði John.  Þögn.  "Þá höldum við áfram."

  Bítlarnir opnuðu allar dyr upp á gátt.  Þetta var eins og Seattle-dæmið á tíunda áratugnum.  Plötufyrirtækin mættu á svæðið og allir fengu plötusamning.

.

Athugasemdir

[Gjagg (IP-tala skráð) 6.10.2010 kl. 21:48]

DJÖFILLI hafa their NEGLT thad.  Thad er EKKERT sambaerilegt hvorki fyrr né seinna.

[Jens Guð, 7.10.2010 kl. 23:40]

  Gjagg,  í sögu rokksins verða afrek Bítlanna aldrei jöfnuð.  Yfirburðir þeirra á svo mörgum sviðum voru svo afgerandi.  Ég held að þú sért það mikið yngri en ég að þú hafir ekki upplifað byltingu Bítlanna í rauntíma.  Bylting þeirra var ótrúlega afgerandi og hraðvirk.  Enginn sem ekki varð vitni að þessu getur fullkomlega áttað sig á stöðunni.

  Fyrir daga Bítlanna var bandaríska rokkbyltingin ´56-´58:  Presley,  Jerry Lee Lewis,  Chuck Berry,  Little Richard...  Allt fjaraði út upp úr 1958.  Fram að þessu höfðu komið upp margar tískubylgjur í músík.  Þær voru alltaf tímabundnar (2 - 3 ár).  Svo kom eitthvað annað.

  Bítlarnir endurvöktu rokkið 1963 - ´64 eftir mikla ládeyðu.  Þeir spiluðu eigin lög,  sem hljómsveitir þess tíma gerðu ekki.  Það er alveg klárt að fersk kímnigáfa þeirra hafði mikið að segja.  Fram til þessa voru blaðamannafundir með dægurlagasöngvurum á formlegum nótum.  Sumir popparar voru smá fyndnir innan ramma formlegheitanna.  Blaðamannfundir Bítlanna voru hinsvegar eins og uppistand.  Blaðamannafundirnir voru eins og sjálfstætt skemmtiefni.  Bítlarnir voru svo fyndnir og orðheppnir.  

  Í dag eru fyrstu lög Bítlanna og fyrstu plötur þeirra ekkert merkilegt dæmi.  En í tíðaranda þess tíma var glaðværðin í músíkinni,  spilagleðin og öskursöngstíllinn sprengja.

  Svo bara voru Bítlalögin góð fyrir sinn hatt.  Miðað við forsögu dægurlagaheimsins hefði mátt ætla að Bítlarnir væru tískufyrirbæri.  Þannig voru þeir meðal annars skilgreindir af bandaríska músíkbransanum.  Það eru til ótal bókanir bandarískra plötufyrirtækja og umboðsskrifstofa sem vitna um staðfast álit um að "Bítlaæðið" vari fram á haust (1964).  Það var engin trú á að Bítlarnir væru komnir til að vera.

  Þá framþróuðu Bítlarnir óvænt músík sína inn á nýtt svið:  Hipparokk,  sýrurokk,  þungarokk og svo framvegis.  Þeir urðu leiðandi afl í ástarsumrinu ´67,  flower-power tímabilinu og forsprakkar ´68 kynslóðarinnar.  

  Eftir á að hyggja er ótrúlegt að hljómsveit sem starfaði aðeins á markaðnum ´63 - ´69, sé enn í dag á toppnum.  Bítlaplötur hafa selst í 1,2 milljarði eintaka (jarðarbúar eru 6,4 milljarðar).  Sú hljómsveit sem kemst næst er Abba með næstum hálfan milljarð.  Þá eru ótaldar sólóplötur Bitla.  Ég veit ekki hvað mörg hundruð milljón eintök Paul,  John eða George Harrison hafa selt af sínum plötum eftir daga Bítlanna.  Það er góður slatti.  Ringo hefur sennilega aldrei selt mikið.