Öruggast að eiga Lödu

  Ég er með undir höndunum tölur yfir þær bílategundir sem helst verða fyrir barðinu á bílaþjófum í Danmörku.  Tölurnar eru úr samantekt frá því í fyrra yfir bílategundir sem mest var stolið af 2008.  Þetta breytist lítið sem ekkert á milli ára.  Sú bílategund sem oftast var stolið er Mercedes Benz.  455 slíkum var stolið yfir árið.  Það jafngildir að svo gott sem einn af hverjum 100 stoltum dönskum Mercedes Benz bíleigendum hafi verið rændur.

   Dani sem á Benz er í 400% meiri hættu á að bíl hans verði stolið heldur en sá sem á Volvo eða Opel.   

  Þær bílategundir sem var rænt næst oftast á eftir Benzinum eru BMW og Audi.   Danir sem aka um á Lödu eru í minnstri hættu gagnvart bílaþjófum.  Aðeins 2 Lödum var stolið 2008.  Það þykir líklegra að þeim hafi verið stolið af einhverjum á fylleríi eða til að nota við innbrot heldur en að þær hafi verið selfluttar til Austur-Evrópu til endursölu.

  Ég veit ekki hver afstaða a-evrópskra er til bíla.  Hinsvegar sagði fyrrverandi tengdafaðir minn,  Bandaríkjamaður,  mér eitt sinn að ríka fólkið í Bandaríkjunum kaupi sér Benz.  Fólkið sem er ekki ríkt en vill láta aðra halda að það sé ríkt kaupi sér Volvo. 

Stolnir bílar Dana í Austur-Evrópu

Athugasemdir

[Óskar Þorkelsson, 18.12.2010 kl. 20:05]

volvo er langflottastur

[Jens Guð, 18.12.2010 kl. 21:07]

  Óskar,  ég þekki þann bíl ekki af eigin raun.  En tek þín orð trúanleg.  Ég á bara Volkswagen Caddy.  Ég mæli ekki með þeim bíl.  Mesta drusla sem ég hef átt. 

[Hörður Sigurðsson Diego, 18.12.2010 kl. 21:17]

Það gleymist að taka inn í myndina að flestir Lödueigendur nenna ekki að tilkynna um stuldinn til lögreglu eða eru hræddir við að verða að athlægi ef þeir gera það.

[Jens Guð, 18.12.2010 kl. 21:40]

  Hörður,  það er mikið til í þessu.  Sennilega fagna þeir því að bílnum hafi verið stolið.

[Skorrdal (IP-tala skráð) 19.12.2010 kl. 00:19]

Eða það séu bara 2 Lödur eftir í landinu, Jens? Hvað eru margar eftir á Íslandi? (Persónulega átti ég 2 Lödur - 1978 módel 1600; klikkaði aldrei - nema stundum, og 1200 Lödu, árgerð 1988, ný úr kassa - var alltaf að bila...)

[Jens Guð, 19.12.2010 kl. 16:33]

  Skorrdal,  ég hef átt nokkrar Lödur.  Bæði nýjar úr kassanum og eldri.  Þetta var lang ódýrasti bíllinn á sínum tíma.  Og þau eintök sem ég átti stóðu sig vel.  Biluðu sjaldan og aldrei þannig að viðgerð væri dýr.  Hinsvegar heyrði ég af Lödum sem voru kallaðar mánudagsbílar.  Voru alltaf að bila.  Skýringin var sögð sú að þær hafi verið settar saman á mánudegi þegar allir í vinnunni voru skelþunnir og pirraðir eftir helgardrykkjuna.