Kvikmyndarumsögn

 - Titill:  Klovn: The Movie

 - Sýningarstaðir:  Sam-bíóin

 - Einkunn: **** (af 5)

.

  Flestir þekkja eflaust dönsku sjónvarpsþættina  Klovn  (Trúður).  Þeir eru fyndnir og þegar best lætur rosalega fyndnir.  Frank (Klovn) er klaufskur í mannlegum samskiptum.  Barnalegur og laginn við að koma sér í vandræðalegar aðstæður.  Casper,  besti vinur hans,  er sjálfhverfur töffari;  kvensamur,  slóttugur og tækifærissinnaður.  Saman mynda þeir frábært tvíeyki. 

  Það hefur ekki alltaf gefist vel að yfirfæra fyndna sjónvarpsþætti í bíómyndaform.  Dæmi um slíkt eru Mr. Bean og Ali G.  Hér gengur hinsvegar allt upp.  Klovn The Movie  er virkilega fyndin bíómynd.  Vel upp byggð með mörgum góðum hápunktum og fyrirsjáanlegum en hressilegum endi.  Þarna eru margar senur pínlegar fyrir persónurnar.  Frank og Casper eru sannfærandi í sínum hlutverkum.  Áhorfendur finna til samúðar.  Ósjaldan mátti heyra áhorfendur hrópa:  "Æ, nei!",  "Úps!",  "Guð minn góður!" og annað álíka á milli hláturgusanna.  Sum atriðin eru nokkuð gróf og alls ekki barnvæn.  Í frjálslynda Baunaveldi er myndin leyfð til sýningar fyrir eldri en 11 ára.  Íslensku teprurnar hafa aldursmarkið 14 ára. 

  Það má ekki skemma fyrir væntanlegum áhorfendum með því að vísa í tilteknar senur.  Þó er óhætt að gefa upp söguþráðinn.  Hann gengur út á að félagarnir halda í sögulegt ferðalag.  Frank rænir með sér í ferðalagið ungum dreng til að sannreyna fyrir sér og kærustunni að hann sé hæfur í föðurhlutverk.  Sumar senur eru á við það besta í sjónvarpsþáttunum.  Myndin í heild er samt ekki að öllu leyti á við bestu sjónvarpsþættina.  En nálægt því.  Þetta er tvímælalaust ein af bestu myndum ársins 2011. 

  Ég hvet fólk til að sjá hana í bíósal:  Á stóru tjaldi með góðum hljómgæðum og hlæja með salnum sem grenjar úr hlátri undir fyndnustu senunum. 

Athugasemdir

[Gunnar Th. Gunnarsson, 4.1.2011 kl. 23:06]

Frank er ekki "klovn", heldur Hvam. Frábærir karakterar.

[Jens Guð, 4.1.2011 kl. 23:12]

  Gunnar Th.,  ég hef meðtekið nafn sjónvarpsþáttanna og myndarinnar þannig að það eigi við um Frank.  Vissulega ber leikarinn ættarnafnið Hvam.  Kannski er ég að misskilja þetta?  

[Gunnar Th. Gunnarsson, 4.1.2011 kl. 23:32]

Veit svo sem ekki... má vel vera. Ég hef ekki tekið því þannig að það sé bara átt við hann, en Frank er auðvitað algjör trúður... klúður

[Jens Guð, 5.1.2011 kl. 01:12]

  Gunnar Th.,  ég veit það ekki heldur.  Gaman væri að heyra frá fleirum um hvernig þeir skilja nafn sjónvarpsþáttanna og myndarinnar. 

[Tómas Hallgrímsson (IP-tala skráð) 5.1.2011 kl. 02:20]

að sjálfsögðu er Frank trúðurinn. Það er ekki spurning. Frábær bíómynd, mæli sérstaklega með því að fólk geri sér leið norður til Akureyrar og kíki á hana í Nýjabíó, hún er lang best þar ;)

[Ómar Ingi, 5.1.2011 kl. 10:35]

MUST SEE.

[Óskar Þorkelsson, 5.1.2011 kl. 14:18]

Frank er klovn, ekki séns að miskilja það nema að skilja ekki þættina ;)

[Jens Guð, 5.1.2011 kl. 22:33]

  Tómas,  ég hef einmitt heyrt að fólk leggi á sig ferðalög frá öllum stöðum landsins til að kíkja í bíó á Akureyri.  Er ekki GNR í græjunum á milli sýninga og í hléi?  Þegar Stebbi bróðir var þarna gat fólk gengið að Black Sabbath sem vísum þarna í bíóinu.

[Jens Guð, 5.1.2011 kl. 22:37]

  Ómar Ingi,  ég trúi þessu varla.  Ertu ekki ennþá búinn að sjá Klovn?  Ég sá "treilerinn" fyrst hjá þér. 

[Jens Guð, 5.1.2011 kl. 22:37]

  Óskar,  ég hélt þetta.

[Siggi Lee Lewis, 6.1.2011 kl. 23:13]

Hehehe þetta er reyndar snilldaratriði. Snilld þegar Casper stekkur yfir þjónustustúlkuna sem er að skrúbba gólfið!

Þetta er án efa allra besta evrópska mynd ársins 2011 og örugglega eins sú allra besta kvikmynd sem Evrópa hefur náð að drulla út úr sér!

[Ómar Ingi, 7.1.2011 kl. 00:37]

Hvað er þetta drengur , myndin er MUST SEE fyrir alla.

Klovn Party á morgun.

[Gunnar (IP-tala skráð) 11.1.2011 kl. 12:03]

"Þetta er án efa allra besta evrópska mynd ársins 2011 og örugglega eins sú allra besta kvikmynd sem Evrópa hefur náð að drulla út úr sér!"

Rólegur, það eru nú enn rúmlega 11 mánuðir eftir af 2011 

[Jens Guð, 13.1.2011 kl. 00:04]

  Ziggy Lee,  Klovn:  The Movie kom út á síðasta ári,  2010.  Þetta var mest sótta kvikmynd ársins 2010 í Danmörku.  Ég tek undir að það er virkilega fyndið þegar Casper stekkur yfir konuna sem er að skúra gólfið. 

[Jens Guð, 13.1.2011 kl. 00:06]

  Ómar Ingi, ég kvitta undir að þetta sé "Must see" mynd.  Ég kvitta einnig undir lokaorð í kvikmyndagagnrýni Fréttablaðsins í dag að myndin sé hrikalega fyndin.

[Jens Guð, 13.1.2011 kl. 00:07]

  Gunnar,  rétt athugað.  Það eru aðeins 11 dagar liðnir af árinu 2011.