Það er hægt að drekka þorramat

  Ég á ekki við að þorramatnum sé skellt í blandara ásamt hálfum lítra af Brennivíni eða einum lítra af bjór.  Svoleiðis er bara subbulegt og út í hött.  Það er engin reisn eða stæll yfir því.  Þorramat á aldrei að blanda eða hræra saman við eitthvað utanaðkomandi.  Það er grundvallaratriði.

  Til að drekka þorramat þarf að velja súrsaða sviðasultu,  svínasultu,  hrútspunga og þess háttar með háu hlutfalli af bindiefni (hlaupi).  Þessu er komið fyrir snyrtilega á undirskálar.  Þeim er síðan raðar með jöfnu millibili ofan á snarkandi heitan stofuofn. 

  Hægt og bítandi bráðnar hlaupið og súrmaturinn verður eins og litlir bitar í þunnri súpu.  Á meðan þetta gerist er upplagt að laga þunnan jafning.  Þegar jafningurinn er til er honum ásamt súrmetinu hellt í glös.  Svo er þorramaturinn drukkinn hægt og virðulega. 

  Þetta er góð tilbreyting frá því að snæða daglega þorramat með hnífi og gaffli.     

Athugasemdir

[Hörður Sigurðsson Diego, 26.1.2011 kl. 04:29]

Hljómar lystugt.

[doctore (IP-tala skráð) 26.1.2011 kl. 08:46]

Sama og þegið, fæ mér bara pizzu :)

[Ásthildur Cesil Þórðardóttir, 26.1.2011 kl. 13:05]

OOH Jens ég fæ vatn í munnin við myndina sem fylgir með.  Þetta er það sem ég sakna að heiman núna, þorramat.  namminamm

[Jens Guð, 26.1.2011 kl. 15:54]

  Hörður,  og smakkast ennþá betur en það hljómar.

[Jens Guð, 26.1.2011 kl. 15:57]

  DoctorE,  á Ísafirði var gerð tilraun með að bjóða upp á þorrapizzur fyrir mörgum árum.  Því miður urðu viðtökur ekki eins og vænta mátti og þetta "floppaði".

  Í Skotlandi aftur á móti er í páskamánuði boðið upp á pizzur með súkkulaði.  Ég smakkaði svoleiðis.  Ég held að þorrapizzan hafi verið betri.

[Jens Guð, 26.1.2011 kl. 15:58]

  Ásthildur Cesil,  það er kannski hálfgerður hrekkur af mér að glenna þennan veislumat framan í ykkur Íslendingana í útlöndum á þorra?

[Sigurbjörg Sigurðardóttir, 28.1.2011 kl. 15:24]

Hummm,þorrapizza?? en ég get smakkað súrt slátur og súran hval allt hitt neiiiiii.

[Jens Guð, 29.1.2011 kl. 02:11]

  Sigurbjörg,  hangikjötið og harðfiskurinn eru líka lostæti.