Olli skelfingu

  Færeyingar fylgdust spenntir með sjónvarpsútsendingu á forkeppninni hérlendis í Söngvakeppni evrópskra sjónvarpsstöðva í gærkvöldi.  Enda hinn vinsæli færeyski söngvari og söngvahöfundur,  Jógvan Hansen,  í fremstu víglínu.  Gallinn var sá að það hafði alveg gleymst að vara Færeyinga við laginu  Eldgosi.  Á fésbókar- og bloggsíðum hefur í dag mátt sjá fjölda einhæfra ljósmynda af viðbrögðum skelfingu lostinna færeyskra sjónvarpsáhorfenda þegar flutningurinn á  Eldgosi  hófst:

 

  Sumir leituðu skjóls undir bók eða á bakvið húsgögn.

  Verst fór þetta með blessuð börnin.  Það fórst fyrir að setja aldurstakmörk á sýninguna.  Börnin urðu miður sín og áttu erfitt með svefn í nótt.  Voru tryllt af myrkfælni.  Þegar þeim loks kom dúr á auga undir morgun tóku martraðir við. 

   Í dag þjást margir af slæmum eyrnaverk,  sem hefur varað alveg frá fyrstu tónum lagsins.  Þeir hafa ekki tekið hendur frá eyrum síðan.

  Á elliheimilum hefur verið reynt á slá á viðvarandi hræðslu með kvíðastillandi lyfjum.  Án árangurs.

   Einn hefur vakið athygli og aðdáun fyrir að láta sér hvergi bregða.  Það er Hansi heyrnalausi.  Sumir rekja stillingu hans til rauðvínskúta sem hann gerði góð skil fyrir og eftir útsendingu Söngvakeppninnar.   

  Um viðbrögð við sigurlaginu fara færri sögum.  Það er eins og athygli á því hafi farið framhjá fólki.  Sjálfur held ég að ég hafi ekki ennþá heyrt það.  En næsta víst er að það er hið vænsta lag. 

„Aftur heim“ sigraði

Athugasemdir

[Sigurður I B Guðmundsson, 13.2.2011 kl. 22:29]

Hvers á kötturinn að gjalda?

[DoctorE (IP-tala skráð) 13.2.2011 kl. 23:22]

Stöðluð viðbrögð við eurovision... hjá þeim sem eru ekki tóndaufir.
Það má vel segja að eurovision sé einskonar krabbamein á tónlist.

[Grefill (IP-tala skráð) 14.2.2011 kl. 10:37]

Þarf ekki að senda áfallateymi austureftir til að redda þessu? Ótrúlegt annars hvað sá gamli er glettilega líkur Bilbó Baggasyni.

[Sigurður I B Guðmundsson, 14.2.2011 kl. 19:59]

Er þetta kötturinn hans Rasmusar í Götu?

[Jens Guð, 16.2.2011 kl. 21:57]

  Sigurður I.B.,  kettir og önnur heimilisdýr sem urðu vitni að ósköpunum fældust og hafa ekki sést síðan.

[Jens Guð, 16.2.2011 kl. 21:58]

  DoctorE,  ég skal ekki segja hvort júrivisjón sé krabbamein.  En það er mein.  Svo mikið er víst.

[Jens Guð, 16.2.2011 kl. 21:59]

  Grefill,  sá gamli er líkur mörgum.  Ég held að hann jafnvel geri í því að líkjast fólki.