Nauðsynlegt að vita um kjötfars

 

  Ég kom við í versluninni Nóatúni í dag.  Mig langaði í Malt.  Í leiðinni datt mér í hug að vita hvort til væri súrsað hvalkjöt.  Fyrir framan kjötborðið stóð öldruð kona.  Hún virti fyrir sér tvo bakka með kjötfarsi.  Annar var kyrfilega merktur "Nýtt kjötfars".  Hinn var merktur "Saltað kjötfars".  Þetta vakti forvitni konunnar.  Hún spurði kjötafgreiðslumanninn:

  - Hver er munurinn á nýju kjötfarsi og söltuðu kjötfarsi?

  Afgreiðslumaðurinn útskýrði það samviskusamlega:

  - Nýtt kjötfars er nýtt.  Saltað kjötfars er saltað.

  Sú gamla var nú mun fróðari en áður og átti auðvelt með að taka ákvörðun:

  - Já,  þá líst mér betur á nýja kjötfarsið.  Láttu mig fá eins og 600 grömm af því.

 

 

Athugasemdir

[Hörður Halldórsson, 24.3.2011 kl. 07:25]

Nýtt hljómar betur, nýtt er betra "PR".

[Óskar Þorkelsson, 24.3.2011 kl. 09:06]

nýtt er kjötfars sem ekki hefur verið bætt í söltuðu kjöti eins og gert er við "saltaða" kjötfarsið.. sama kjötfars í raun en fyrst er það "nýja" tekið úr hrærivélinni áður en saltkjöti er bætt í restina .. einfalt og óætt

[Sigurður I B Guðmundsson, 24.3.2011 kl. 09:48]

Kjötfars er ekki gott myndefni!!!

[Ásthildur Cesil Þórðardóttir, 24.3.2011 kl. 09:56]

Hahahahaha  Ég held að þið strákarnir hafi bjargað fyrir mér deginum.

[Jens Guð, 24.3.2011 kl. 11:51]

  Hörður, ég er sammála því.  Nema fyrir þá sem eru sólgnir í saltið.

[Jens Guð, 24.3.2011 kl. 11:53]

  Óskar, takk fyrir þessar upplýsingar.  Ætli það sé rétt að kjötfars sé séríslenskt fyrirbæri?

[Jens Guð, 24.3.2011 kl. 12:01]

   Sigurður I.B., svo sannarlega rétt hjá þér!

[Jens Guð, 24.3.2011 kl. 12:02]

   Ásthildur Cesil, takk fyrir innlitið.

[Ásdís Sigurðardóttir, 24.3.2011 kl. 12:26]

Kjötfars er nú eiginlega ekki matur :)

[Óskar Þorkelsson, 24.3.2011 kl. 16:55]

kjötfars eins og við íslendingar erum vanir er líklega einsdæmi í heiminum (rollukjöt).. en svipað stuff (úr svínakjöti)er framleitt út um allan heim í öllum menningarkimum.

[Sigurbjörg Sigurðardóttir, 24.3.2011 kl. 17:06]

ekki fallegt að sjá.

[Axel Jóhann Hallgrímsson, 24.3.2011 kl. 19:42]

Mér finnst kjötfars úr saltkjöti til muna betra en "nýtt". 

En það fer enn hrollur um mig þegar ég hugsa til kjötfarsins sem ég keypti eitt sinn í verslun KH á Skagaströnd. Það leit ansi vel út í kjötborðinu "nýtt" og ferskt og ekki bar á neinu fyrr en það var soðið. Þegar suðan kom upp gaus upp þvílík fýla að það hálfa hefði verið nóg. Potturinn var rifinn af hellunni og hlaupið með hann út og hann losaður þar. Við nánari athugun og við skil á kvöldmatnum daginn eftir kom í ljós að kjötfarsið hafði í búðinni verið sett í bakka sem í hafði verið geymdur hákarl.

Lykt af kæstri skötu við suðu, er hreinasta blómaangan miðað við þessi ósköp. Ég hef oft hugsað að gaman væri að prufa hverskonar pest væri hægt að framkalla með því að sjóða Hákarl, en ekki tímt að sóa í slíka tilraun þessum líka dýrindis mat.

[Jens Guð, 24.3.2011 kl. 23:53]

  Ásdís,  það er magafylli í harðindum.  Held ég.  Annars hef ég ekki borðað kjötfars í áraraðir.  Er meira fyrir rauðsprettuna.

[Jens Guð, 24.3.2011 kl. 23:54]

  Óskar,  takk enn og aftur fyrir fróðleikinn.

[Jens Guð, 24.3.2011 kl. 23:55]

  Sigurbjörg,  ég tek undir það.  Kjötfars er ólystugt myndefni.

[Jens Guð, 24.3.2011 kl. 23:57]

  Axel,  mér varð á að skella upp úr.  Sá fyrir mér Hallbjörn Hjartar við kjötborðið.

[Axel Jóhann Hallgrímsson, 25.3.2011 kl. 00:41]

Hallbjörn er alsaklaus af þessu Jens, hann var löngu hættur hjá KH þegar þetta var.

[Jens Guð, 25.3.2011 kl. 01:41]

  Axel,  ég kom einu sinni við í KH fyrir margt löngu og sá þá Hallbjörn vera að fylla á hillur.  Mörgum árum síðar keypti ég mér hamborgara hjá honum.  Það var ekkert kjötfars í því dæmi.