Brúðkaup aldarinnar - klúður!

 

  Það er ekki sjálfgefið að allt gangi fyrir sig eins og vel smurð vél þegar fólk setur stefnu á að ganga í hjónaband.  Einkum er eins og hlutir vilji fara úr skorðum þegar markið er sett hátt varðandi brúðkaupsveisluna og allt sem henni fylgir.  Þannig fór fyrir pari sem hér verður sagt frá.  Leikar fóru þannig að parið skiptist á málsóknum í stað þess að skiptast á giftingarhringum þegar stóra stundin var við það að renna upp.  Brúðguminn væntanlegi hafði frumkvæði af því að aflýsa brúðkaupinu er hann uppgötvaði að tilvonandi eiginkonan hafði stofnað til útgjalda upp á 100.000 dollara (næstu 12 milljóna íslenskra kr.) við undirbúning brúðkaupsins í Illinois í Bandaríkjum Norður-Ameríku. 

.  Honum var svo brugðið við þessa uppgötvun að hann harðneitar að vera ábyrgur fyrir útgjöldunum.  Þess í stað hefur hann farið í mál við konuna og krefst endurgreiðslu frá henni fyrir giftingarhringum þeirra.  Þeir kostuðu 45.000 dollara (röskar 5 milljónir íslenskra kr.).  Sennilega er kostnaðurinn við hringana inni í 100.000 dollara tölunni (þó það komi ekki fram í fréttum af málinu).  Konan hefur á móti stefnt manninum til að standa skil á þessum 100.000 dollara útgjöldum sem þegar eru að hluta fallin í gjalddaga.  Enda kannast hún ekki við að maðurinn hafi sett nein skilyrði fyrir að skorið væri við nögl við undirbúning brúðkaupsins. 

  Hugsanlega má leysa þetta á ljúfu nótunum:  Skila hringunum,  brúðardressinu og afpanta veislusalinn,  hljómsveitina,  matinn,  skreytingar,  myndatökur,  hárgreiðsluna og svo framvegis.  Einhver kostnaður er þegar fyrirliggjandi,  svo sem prentun og póstgjald vegna boðskorta í veisluna.  Sá hængur er á að það er hlaupin illska í málið.  Parið,  sem nú er fyrrverandi par,  talast ekki við nema í gegnum lögfræðinga sína.  Lögfræðingar þeirra beggja vilja sækja málin af fullum þunga og telja sig,  hvor um sig,  vera með unnið mál í höndunum fyrir sinn skjólstæðing.  Hver sem niðurstaðan verður er næsta víst að drjúgur lögfræði- og málskostnaður eigi eftir að bætast ofan á upphæðirnar sem málið snýst um.  Spurningin er á hvoru þeirra fyrrverandi tilvonandi hjónakorna kostnaðurinn lendir þegar upp er staðið. 

Athugasemdir

[Sigurður I B Guðmundsson, 25.3.2011 kl. 00:00]

Verður ekki okkar "sérstakur" að leysa þetta flókna mál?

[Jens Guð, 25.3.2011 kl. 00:05]

  Sigurður I.B.,  ég er á fullu í að reyna að finna lausn á þessu fyrir fólkið.

[Axel Jóhann Hallgrímsson, 25.3.2011 kl. 00:12]

Hér sannast reglan; því meira sem sóðað er í umgjörð brúðkaupsins því skemur endist hjónabandið!

[Jóna Kolbrún Garðarsdóttir, 25.3.2011 kl. 00:31]

[Aðalbjörn Steingrímsson (IP-tala skráð) 25.3.2011 kl. 20:30]

Hef reyndar tvö af baki, en enga lausn í þessu máli.