Grænlenskar pönnukökur

  Grænlenskar pönnukökur eru bestu pönnukökur í heimi.  Því eru allir sammála sem smakkað hafa.  Og jafnvel fleiri.  Mestu munar um fyllinguna.  Því eru allir sammála.  Svo skemmtilega vill til að það er alveg hægt að matreiða grænlenskar pönnukökur á Íslandi.  Það eina sem til þarf er eftirfarandi: 

• 2 egg
• 49 g bráðið smjör  
• 205 g hveiti
• 1/2 lítri mjólk
• 1/2 teskeið vanilludropar 

  Mikilvægt er að sykur sé fjarri góðu gamni.  Öllu öðru en hveitinu er hrært saman.  Síðan er hveitinu bætt út í hægt og bítandi og svo laumulega að nærstaddir taka varla eftir því.  Þegar deigið er orðið jafnt og laust við kekki er það látið standa í 37 mínútur áður en pönnukökubaksturinn hefst.  Þannig verða pönnukökurnar þéttari og þykkri.  Grænlenskar pönnukökur eru nefnilega heldur matarmeiri en þær íslensku.

  Daginn fyrir pönnukökubaksturinn er lagaður grænlenskur jafningur.  Í hann þarf eftirfarandi:

• 16 g hveiti
• 88 g fisksoð  
• 17 g smjörlíki
• smávegis salt
• smávegis pipar

  Þetta er hrært vel saman og síðan hitað í potti þangað til suða kemur upp.  Þá er jafningnum í rólegheitum hellt í glerskál og geymdur í ísskáp.  

  Þegar pönnukökurnar hafa verið bakaðar er beðið með frekari aðgerðir þangað til þær eru kaldar.  Þá er rykið dustað af jafningnum og 2 matskeiðar af honum settar á hverja pönnuköku.  Yfir jafninginn er stráð dilli og 77 g af pílaðri grænlandsrækju (má vera íslensk).  Pönnukökunum er rúllað upp og 2 settar hlið við hlið á eldfastan disk.  Ofan á þær er sett smjörklípa (um helgar og á hátíðisdögum.  Á virkum dögum er smjörinu sleppt) og rifnum osti stráð yfir.  Herlegheitin eru hituð í 213 g snarkandi heitum ofni í 11 mínútur,  eða þangað til osturinn er vel bráðnaður.

  Áður en veislumaturinn er snæddur skal kreista sítrónu yfir hann.  Svo er bara að reima á sig smekkinn,  hella köldu hvítvíni í glas,  setjast í snjóskafl og hefjast handa.  Til að skerpa enn frekar á grænlensku stemmningunni er upplagt að fá Grænlending til að syngja og spila trommudans skammt frá. 

Athugasemdir

[Agla (IP-tala skráð) 4.4.2011 kl. 09:40]

Kærar þakkir fyrir uppskriftina!

[Ásthildur Cesil Þórðardóttir, 4.4.2011 kl. 10:26]

Hljómar vel, sérstaklega þetta með grænlendinginn

[Sigurbjörg Sigurðardóttir, 4.4.2011 kl. 14:28]

þetta líst mér vel á og ætla sko að prufa.Ekki fékk ég þetta þegar ég fór til Kulusuk,en upplifði trommurnar

[Kristín M. Jóhannsdóttir, 4.4.2011 kl. 16:45]

Ótrúlegt hversu margt er líkt með menningu Grænlendinga og indjána í N-Ameríku. Og þá á ég ekki við inúítana í norðrinu sem eru að sjálfsögðu náskyldir inúítum Grænlands, heldur hina eiginlegu indjána sem í Kanada eru kallaðir First nations people, ef maður vill vera politicially correct. Flestir indjánar sem ég þekki kalla sig reyndar indjána þannig að mér líður ekkert of illa yfir því að nota það orð.

Ég hef séð töluvert margar sýningar frá mismunandi þjóðflokkum, og þetta sem þú sýnir hér að ofan minnir á mjög margt frá bæði Salish þjóðflokkum, Athabaskan, Alconquin og jafnvel Tshimshian. Sönglið er svipað, sporin svipuð...en þú fyrst og fremst þegar maður ber saman við dans kvenna.

Hef líka komist að því að margt í þjóðsögum þjóðflokkanna hér á vesturströndinni minnir jafnvel á þjóðsögur á Íslandi.

[Sigurður I B Guðmundsson, 4.4.2011 kl. 21:16]

Hvort er þetta Yoko Ono eða Björk Guðmundsdóttir að tromma og syngja?

[makki (IP-tala skráð) 4.4.2011 kl. 22:56]

Iss ljóti viðbjóðurinn

[Jens Guð, 4.4.2011 kl. 23:00]

  Agla,  njóttu.

[Jens Guð, 4.4.2011 kl. 23:00]

  Ásthildur Cesil,  ég er sammála.

[Jens Guð, 4.4.2011 kl. 23:04]

  Sigurbjörg,  það er stundum hægt að fá svona pönnukökur á hótelinu á milli Kulusuk þorpsins og flugvallarins.  Annars held ég að pönnukökurnar séu vinsælli á vesturströndinni.

[Jens Guð, 4.4.2011 kl. 23:19]

  Kristín,  ég hef tekið eftir þessu líka.  Það eru einhver sameiginleg gen úr fortíð sem kallast þarna á.  Ég var giftur konu af indíánaættum (Cherokee) í næstum aldarfjórðung og kynntist ýmsu í sögu og menningu Indíána.  Sömuleiðis hef ég átt töluverð samskipti við Grænlendinga.  Það er ýmislegt þarna sem rímar saman.  Margir Grænlendingar eru hrifnir af nútímalegri indíánamúsík,  einkum rokkaðri með keim af gömlu hefðinni.   

[Jens Guð, 4.4.2011 kl. 23:22]

  Sigurður I.B.,  Björk hefur sótt í grænlenska músík.  Til að mynda hafa grænlenskir söngvarar sungið inn á plötur með henni og túrað með henni um heiminn.  Glæsilegt dæmi.  Ég veit ekki með Yoko.

[Jens Guð, 4.4.2011 kl. 23:23]

  Makki,  þetta er alvöru nammi.  Grænlenskur matur er sælgæti.