Gömul kona villtist í Hörpu

  Öldruð kona gerði sér dagamun í dag.  Hún fór í leigubíl ásamt vinkonu sinni í bæinn til að skoða Hörpu.  Í fyrstu atrennu tókst ekki betur til en svo að þær stöllur flæktust til tónlistarskólans Hörpu í Grafarvogi.  Þeim þótti það hús alveg ágætt.  Eftir að hafa rætt við viðstadda þar kom misskilningurinn í ljós.  Þá var hóað í annan leigubíl.  Áður en langt um leið komust þær í námunda við Tónlistar- og ráðstefnuhúsið Hörpu niður við höfn.

. Vopnaðar sitthvorri ljósmyndavélinni byrjuðu þær á því að taka tugi ljósmynda af húsinu utan frá.  Þar var þröngt á þingi.  Þúsundir annarra Reykvíkinga voru einnig að ljósmynda húsið utan frá.  Eitt hús hefur aldrei áður verið ljósmyndað jafn grimmt á einum degi í Reykjavík.  Hvað gerir allt þetta fólk við þessar myndir?  Hengir þær upp í stofunni?

  .Þegar inn í Hörpu kom var margfaldsinnum meiri örtröð.  Það var stappað af fólki.  Sú gamla týndi vinkonu sinni með það sama.  Bara rétt á meðan hún góndi upp í loftið og undraði sig á því hvað Harpa er miklu stærri innan dyra en utan.   

  Verið var að spila djass á gangi á annarri hæð.  Sú gamla vatt sér í rúllustigann til að komast á þá hljómleika.  Stiginn mjakaðist varla úr stað.  Gamla konan var hneyksluð yfir seinagangi stigans.  Eftir nokkrar mínútur uppgötvaði hún að þetta var ekki rúllustigi heldur venjulegur stigi.  Hún hneykslaðist ennþá meira yfir því.  Heilsan leyfir ekki langar stigagöngur.  Eflaust er lyfta í húsinu.  Einhversstaðar. 

.

  Þá var ekki um annað að ræða en skoða sig um á jarðhæðinni.  Það var hægara sagt en gert.  Troðningurinn var svo mikill að sú gamla réði ekki hvert hún fór.  Hún barst hjálparlaus með straumnum.  Og rammvilltist með það sama.  Svo rækilega að hún vissi ekki af fyrr en hún var komin í verslun 10-11 í Austurstræti,  mörgum götum frá Hörpu.  En hún hélt að hún væri ennþá í Hörpu og hélt áfram að vera villt,  Það var þó rýmra um hana í 10-11.  Hún var því fegin.  Hún bað viðstadda um að leiðbeina sér út úr Hörpu.  Það reyndust aðeins vera útlendir ferðamenn í 10-11.  Gamla konan talar ekki útlensku.  Einhvernvegin tókst þó svo til að hópur útlendinga fylgdi konunni út og fann fyrir hana leigubíl.

.

  Sú gamla er hin ánægðasta með ljósmyndirnar sem hún tók af Hörpu.  Hún hefur ekki hugmynd um hvað hún sá af Hörpu innan húss.  Vinkona hennar hafði ekki ennþá skilað sér heim þegar gamla sagði mér frá ævintýri dagsins.  Kannski er hún ennþá að skoða Hörpu.  Af nógu er að taka.

„Bylting í músík“

Athugasemdir

[Númi (IP-tala skráð) 14.5.2011 kl. 23:07]

Þú ert mikið skáld,þú leynir á þér gamli.

[Jens Guð, 14.5.2011 kl. 23:15]

  Númi,  ójá.  Ég er að skrásetja söguna.

[Óli minn, 15.5.2011 kl. 10:59]

Er vinkonan búin að skila sér? Held ég hafi séð hana í Þorlákshöfn áðan að kíkja ofan í fiskikassa.

[Jens Guð, 15.5.2011 kl. 12:24]

  Óli minn,  var hún ekki ofan í fiskikassanum?

[Manni (IP-tala skráð) 15.5.2011 kl. 14:13]

Hefðir getað bætt við söguna að leigubílstjórinn væri að sp´í að fá sér gps tæki til að þetta kæmi ekki fyrir aftur.

[Óli minn, 15.5.2011 kl. 15:31]

Hún er þar núna.

[Úrsúla Jünemann, 15.5.2011 kl. 16:18]

Þetta var ágætis pistill og ég brosti nokkrum sinnum. Þegar maður eldist er ekki allt svona auðvelt eins og áður fyrr. Og Harpa verður okkur til mikils sóma, ég efast ekki um það þrátt fyrir allan kostnað.

[Jens Guð, 15.5.2011 kl. 16:27]

  Manni,  ég þekki ekkert til leigubílstjórans.  Eru þeir ekki allir komnir með gps tæki,  þessir leigubílstjórar?

[Jens Guð, 15.5.2011 kl. 16:27]

  Óli minn,  þetta grunaði mig.

[Sigurbjörg Sigurðardóttir, 15.5.2011 kl. 16:28]

Þú ert frábær penni,og bjargaði deginum hjá mér.

[Jens Guð, 15.5.2011 kl. 16:28]

  Úrsúla,  ég gæti trúað að spá þín um sóma Hörpu muni rætast.

[Jens Guð, 15.5.2011 kl. 16:54]

  Sigurbjörg,  það er aldeilis.  Takk fyrir.

[Magnús Geir Guðmundsson, 15.5.2011 kl. 17:39]

Heilsa þér félagi Jens og opinbera þá visku mína, að margur eldri borgarinn er ansi seigur með myndavélina og ekki bara það, heldur líka við tölvuskrattana, kann að setja afraksturinn inn í þær líkt og yngra liðið, setur myndir jafnvel á Fésbókarsvæði!

[Jens Guð, 15.5.2011 kl. 19:17]

  Magnús Geir,  ég kann ekkert á tölvur og á ekki myndavél.  Mamma og annað áttrætt og nírætt fólk er hinsvegar eins og fagmenn við hvorutveggja.  Ég er búinn að reyna í marga mánuði að koma Skype-inu mínu í gang.  Án árangurs.  Skil ekkert hvernig hægt er að koma því í gang.

[Hjóla-Hrönn, 15.5.2011 kl. 20:40]

hehehe, varstu nokkuð að skrifa um mig?  Ég er annálaður villingur, villist hægri, vinstri á stöðum þar sem fólk er almennt ekkert að villast.  Ég get bara hlakkað til ellinnar, maður lendir alltaf í einhverju skemmtilegu og sér eitthvað nýtt þegar maður tekur ranga beygju.

Ég veit ekki hvenær ég mun hætta mér í Hörpu.  Ég er nefnilega með innilokunarkennd, hætti mér ekki í Kolaportið eða aðra staði þar sem ég á von á mikilli mannþröng.  Hef einu sinni fengið fóbíukast innst inni í Kolaportinu og ruddi mér leið út áður en það myndi líða yfir mig.  Skildi eftir mig slóð af föllnu fólki og barnavögnum.  Stysta leiðin út úr Hörpu er væntanlega í gegn um glerið.  Það yrði full dramatískt....

Svo ég bíð róleg, Harpan fer ekkert...  Vonandi...

[Jens Guð, 15.5.2011 kl. 21:07]

  Hjóla-Hrönn,  þú ert nú ekki öldruð kona.  Þannig að frásögnin er ekki um þig.  Annars skil ég ekki hvers vegna tugir þúsunda Reykvíkinga tróðst um í Hörpu um helgina.  Eins og þú segir:  Harpa fer ekkert.

[Kristján Kristjánsson, 19.5.2011 kl. 15:12]

Frábær frásögn :-) En þetta segir dáldið um hjarðeðli okkar að allir reyna að troðast í húsið á sama tíma :-)