Af hverju lýgur Viðskiptablaðið upp á Útvarp Sögu?

  Meðal mest lesnu frétta á netmiðlum um helgina var endurskrifuð lygafrétt Viðskiptablaðsins um Útvarp Sögu.  Í Viðskiptablaðinu var eftirfarandi haldið fram:  Björn Valur,  þingmaður VG,  mætti í viðtal á ÚS.  Í lok viðtalsins tók Pétur Gunnlaugsson skapofsakast,  sópaði öllu af borði hljóðstofunnar og gekk í skrokk á Birni Vali.

  Vissulega var þetta stórfrétt.  Ef rétt hefði verið.  Hver netmiðillinn á fætur öðrum endurómaði fréttina.  Hið rétta er að þetta var lygafrétt.   Viðbrögð netmiðlanna var eðlileg.  Nema hvað að þeir hefðu mátt leita eftir sannleiksgildi fréttarinnar.  Það hefði verið góð fréttamennska.

  Í fyrsta lagi:  Pétur Gunnlaugsson,  lögfræðingur og stjórnlagaþingmaður,  er ljúfmenni.  Hann getur alveg verið aðgangsharður spyrill.  Það er hans aðall.  En skapofsamaður.  Nei.  Það þekkir hann enginn af slíku.

  Í öðru lagi:  Að sópa öllu af borðinu í hljóðstofu nær yfir tölvur,  heyrnartól,  pappíra,  ritföng,  kaffikönnur og þess háttar.  

  Í 3ja lagi:  Viðstaddir í hljóðstofu voru,  auk Péturs og Björns Vals,  Arnþrúður Karlsdóttir,  tæknimaðurinn Jóhann Kristjánsson og fréttamaðurinn Haukur Hólm.  Enginn þeirra kannast við atburðarrás líkri þeirri sem fréttin í Viðskiptablaðinu greindi frá.

  Lygafréttin í Viðskiptablaðinu byggir ekki á frásögn neinna viðstaddra.  Hún er upplogin.  Það hefði verið hægðarleikur hjá Viðskiptablaðinu að hafa samband við einhvern ofantaldra til að ganga úr skugga um að enginn fótur var fyrir sögunni. Lygafréttin var greinilega skrifuð og birt gegn betri vitund.  Ætlað að skaða Útvarp Sögu og trúverðugleika þeirrar útvarpsstöðvar.

   Næsta skref er sennilega það að birta svo lítið beri á smávægilega "leiðréttingu" í næsta tölublaði.  Í millitíðinni hafa allir helstu netmiðlar japlað á fréttinni ásamt nafnleysingjum á bloggi og fésbók.  Allur hópurinn hefur farið mikinn í að leggja út af lygafréttinni.

   Það er alveg sjálfsagt og eðlilegt að fólk hafi skiptar skoðanir á ÚS.  Eigendur og dagskrárgerðarmenn hafa sterkar skoðanir á mönnum og málefnum.  Og liggja ekki á þeim.  Það er kostur.  Sjálfur er ég ekkert alltaf sammála öllu sem þar er haldið fram.  Fremur en allir sem þar viðra sínar skoðanir.  En það er ósanngjörn ófrægingarherferð í gangi geng ÚS.  Eins og þessi lygafrétt í Viðskiptablaðinu er gott dæmi um. 

  Á tímabili fóru mikinn nafnleysingjar sem héldu því fram að úrslitum í daglegum skoðanakönnunum ÚS væri hagrætt.  Það var út í hött.  Bara svo eitt dæmi af mörgu furðulegum sé dregið fram.

  Vissulega er íslenski fjölmiðlamarkaðurinn harður.  Eftir bankahrunið er togast á um auglýsingar.  Hagsmunaaðilar fara hamförum.  Grátkór LÍÚ hefur fjárfest í dagblaði,  sjónvarpsstöð og öllum meðölum er beitt.  Lygafréttin í Viðskiptablaðinu er lágkúrulegasta útspilið til þessa.

   Ég er ekkert vel að mér um hvernig kaupin gerast á Eyrinni.  Getur verið að ritstjóri LÍÚ-Morgunblaðsins sé eigandi Viðskiptablaðsins?  Ég spyr vegna þess að héðan í frá er ekki hægt að trúa orði af því sem stendur í Viðskiptablaðinu. 

  

Athugasemdir

[Ásthildur Cesil Þórðardóttir, 16.5.2011 kl. 23:48]

Það skyldi þó aldrei vera. 

[Helga Kristjánsdóttir, 17.5.2011 kl. 00:34]

  Ég trúi þessu ekki,veit hvað Pétur er þolinmóður við alla. Sem betur fer er ég að sjá þetta hér í fyrsta sinn,það er vont að verða reiður. Ég er með uppá stungu,allir hafi á sér síma með myndavél og taki upp hvaðeina,sem getur afsannað upp lognar  ávirðingar. 

[Jóhann Kristjánsson (IP-tala skráð) 17.5.2011 kl. 01:09]

Ég bíð spenntur eftir að fá að heyra skýringar Viðskiptablaðsins á fréttinni. Það sem vekur líka athygli að það er enginn fréttamaður skrifaður fyrir fréttinni, Hún er skrifuð undir dulnefninu "Huginn og Muninn". Það er engu líkara en að nafnlausu bloggararnir séu komnir í vinnu á Viðskiptablaðinu.

 Dulnefnið Huginn og Muninn á þó vel við því fréttin var aumingjalegt hrafnaspark.

[Óli minn, 17.5.2011 kl. 13:04]

Er þetta ekki bara misskilningur eins og maðurinn sagði þegar hann var gripinn í Bónus með þrjú frosin lambalæri í nærbuxunum? Mig grunar það.

Annars sýnir þetta auðvitað hvert menn eru komnir í rætninni í íslenskri fjölmiðlun. "Látum þá neita því"-aðferðin lifir þar góðu lífi.

[Jens Guð, 17.5.2011 kl. 13:54]

  Ásthildur Cesil,  ja,  maður spyr sig.

[Jens Guð, 17.5.2011 kl. 13:57]

  Helga,  uppástunga þín er góð.  Í þessu tilfelli nægir hinsvegar að 5 manneskjur voru á staðnum og ber í alla staði saman um að fréttin er upplogin að öllu leyti.

[Jens Guð, 17.5.2011 kl. 14:03]

  Jóhann,  hann var assgoti lúpulegur þessi Björgvin á Fréttablaðinu sem Arnþrúður ræddi við í morgun.  Hann hafði engar útskýringar á þessu uppátæki Viðskiptablaðsins og bar því við að hann væri óundirbúinn upphringingunni frá Arnþrúði.

  Nú sitja þeir sveittir á Viðskiptablaðinu við að kokka saman einhverja útskýringu.

[Jens Guð, 17.5.2011 kl. 14:04]

  Óli minn,  þessi var góður!

[Hlynur Þór Magnússon (IP-tala skráð) 17.5.2011 kl. 19:04]

Meira að segja sjálfur Björn Valur hefur borið þetta til baka, opinberlega. Hann hlær að svona rugli.

[Jens Guð, 17.5.2011 kl. 19:34]

  Hlynur Þór,  þau hafa öll borið þetta til baka.  Það er ekki flugufótur fyrir lygafréttinni. 

[Sigurgeir Jónsson, 17.5.2011 kl. 20:41]

Ekkert hefur verið fjallað um þetta á öðrum ljósvakamiðlum.Það er skiljanlegt.Það hefðu allir svissað umsvifalaust á Útvarp Sögu þar sem hlutirnir gerast,jafnvel upplognir.Og svo grípa menn Viðskiptablaðið til að athuga hvort Siggi Stormur hafi nokkuð tekið æðiskast.En það er klárt að Viðskiptablaðið stuðlaði að því að fólk vill fylgjast með Pétri og hlustar á útvarp Sögu meira en nokkru sinni.Og Viðskiptablaðið biður afsökunar, eftir að hafa vakið athygli á sér.En Huginn og Muninn voru Sandgerðingar.

[Jens Guð, 17.5.2011 kl. 21:05]

  Sigurgeir,  ert þú ekki líka frá Sandgerði?

[Júlíus Valsson, 20.5.2011 kl. 07:10]

Jafn greindir menn og Pétur Gunnlaugsson þurfa ekki að lyfta lóðum til að ná fram markmiðum sínum. Lifi frjálst útvarp!